Read dhopadhola Cakirok 39 Bible Online

Cakirok 39 - dhopadhola bible

Cakirok 39

¹Onyo Joisimayili oyido jotero Yozefu i piny Misir, aka Potifa, acel kwoŋ jodhum pa Farawo m'oyido obedo jatel pa jokur ma cel pa kere am'onyewo go.

²Rwoth oyido nitie gi Yozefu, aka obedo jacwo ma kisi gimoro okidho gi go maber. Go obedo i ot pa jadwoŋ pere ma Jamisir.

³Aka jadwoŋ pere oneno nike Rwoth oyido nitie gine, aka ni Rwoth omiyo kisi gima go otimo kidho maber.

⁴Ameno Yozefu onwaŋo wor i waŋ Potifa, aka oketho go janeno ma ot pere to ketho go kuro kisi gim'oyido apere.

⁵Wok i hongo ma Potifa oketho Yozefu janeno i ot pere kodi kwoŋ gim'oyido go nitie gine je, Rwoth omiyo ot pa Jamisir silwany ro Yozefu; silwany pa Rwoth oyido nikwoŋ kisi gima go oyido nitie gine, i ot kodi i ndelin.

⁶Ameno Potifa oweyo kisi gima go oyido nitie gine i cingi Yozefu aka k'odewo kwoŋ gimoro je kwanyo woko cemo ma go ocamo. Onyo Yozefu oyido ocweyere maber, aka ŋon.

⁷Aka munyo hongo moro okadho, cipa jadwoŋ pere obolo waŋe kwoŋ Yozefu, aka owaco ni, “Nindi kodan.”

⁸To Yozefu okwero to waco ni, “Neni, jadwoŋ paran kidew kwoŋ gimoro je i ot rupiri anitie ka. Go oketho kisi gim'anitie gine i cingan.

⁹Anigi dwoŋ madit i ot me paka go nitie gine, aka go k'okano gimoro je kwoŋan kwanyowoko in, rupiri ibedo cege. T'onyo d'anotim kidakana madwoŋ me t'atimo reco kwoŋ Were?”

¹⁰Aka makada nende go oluwo gi Yozefu ndelo gi ndelo, k'owinjo go nindo gine, kosa bedo gine.

¹¹To ndelo acel, munyo Yozefu odonjo i ot timo tic pere, aka ongoye kwoŋ ŋecin ma ot m'oyido nicegin,

¹²omako go gi kanzu pere aka owaco ni, “Nindi kodan.” To Yozefu obudhere to weyo kanzu pere i cinge aka oŋweco to wok i ot.

¹³Munyo go oneno ni go oweyo kanzu pere i cinge, aka oŋweco to wok i ot,

¹⁴go olwoŋo ŋecin ma ot pere aka owaco ni, “Neni, Jayuda ma cworan okelo ka me onyo timo roro kwoŋ wan. Obino i kisika paran nindo kodan t'akoko malo.

¹⁵Aka munyo go owinjo ni atiŋo dwondan aywak, oweyo kanzu pere i cingan to ringo wok i ot.”

¹⁶Kenyo go okano kanzu pere gi go, cuka jadwoŋ pa Yozefu odwoko peco.

¹⁷Kenyo go owaco rigo wac acel ni, “Ŋeca ma Jayuda m'ikelo i dier wan, obino i kisika paran to timo roro kwoŋan.

¹⁸To tekin atiŋo dwondan t'aywak, go oweyo kanzu pere kabutan to ŋweco wok i ot.”

¹⁹Munyo jadwoŋ pere owinjo wac ma cege oluwo rigo, “Me apaka ŋeca perin oteran,” Nge pere oliel.

²⁰Jadwoŋ pa Yozefu otero go to ketho i jiera, kam'oyido ikan'iye jojiera pa kere; aka go obedo kenyo.

²¹To Rwoth oyido nitie gi Yozefu aka onyutho go mar makiwire, aka omiyo go wor i waŋ jakur jiera.

²²Aka jakur jiera omiyo Yozefu kuro jojiera man je, aka kisi gim'otimi kenyo go am'oyido jatim.

²³Jakur jiera doko k'okuro gimoro je ma Yozefu oyido kuro rupiri Rwoth oyido nitie gi go, aka kisi gima go otimo, Rwoth omiyo kidho maber.