Read dhopadhola Cakirok 40 Bible Online

Cakirok 40 - dhopadhola bible

Cakirok 40

¹Hongo moro rumacen ma gime, jadwoŋ pa jotimi vini ri kere kodi jadwoŋ pa jotedi ri kere mugat jotimo raco kwoŋ jadwoŋ pajo kere.

²Aka Farawo omako nge kodi jodhum pere ario,

³aka oketho jo i twec i ot pa jakur i jiera m'oyido okan'iye Yozefu.

⁴Jakur ma jiera omiyo Yozefu kuro jo, aka jobedo ma hongo malac i jiera.

⁵Wor acel, joje joleko aka lek pa kisi nyatoro oyido nitie gi dwoŋ pere.

⁶Munyo Yozefu obino bongi jo odikin to neno jo, oyido paro pajo onywowere.

⁷Ameno go openjo ni, “Raŋo wicalo joma rembo konon?”

⁸Jodwoko go ni, “Wajoje waleko, aka ongoye ŋat'otiti riwan dwoŋ pajo.” Yozefu owaco ni, “Obedo Were ama miyo nyalo ma tito lek. Akwayo wiwaci ran lek mewin.”

⁹Ameno jatel pa jotimi vini owaco ri Yozefu lek pere ni, “I lek paran oyido nitie yath vini ruwaŋan,

¹⁰aka oyido nitie gi jange adek. Tekin boke mere lothi, othiwo, to nyinge cek.

¹¹Kikopo pa Farawo oyido nitie i cingan, aka akwanyo nyingi vini t'abiy'iye, aka amiyo go i cinge.”

¹²Yozefu owaco ni, “Me dwoŋ mere. Jangi vini adek jobedo ndelo adek.

¹³I ndelo adek Farawo bino gonyin to dwokin i kabedo perin; aka doko ilaketho kikopo pa Farawo i cinge paka con mere munyo oyido ijatel pa jotimi rigo vini.

¹⁴To poyan, ka ber kodin aka itimi ran wor akwayin tucan ri Farawo t'ikonyan wok i ot me.

¹⁵Rupiri okwalan adieri wok i piny pa Joebulaniya, aka kiri ka, ongoye gim'atimo ma ripo wokethan i jiera.”

¹⁶Munyo jatel pa jotedi mugat oneno ni dwoŋ ma lek pa jatel pa jotimi vini ber ye, owaco ri Yozefu ni, “An bende aleko ni, oyido atiŋo aditin adek ma mugat i wiyan,

¹⁷aka iy'adita ma wiye mere oyido nitie nger cemo je m'otedi ri Farawo, to winyin oyido jocamo wok iy'adita gi wiyan.”

¹⁸Yozefu odwoko ni, “Me dwoŋ mere. Aditin adek meno ndelo adek.

¹⁹I ndelo adek Farawo bino ŋado wiyin to ŋawin wi yath aka winyin jobino camo delkwoŋin.”

²⁰I ndelo mar'adek, m'oyido obedo ndelo ma poyo nywolirok pa Farawo, otimo kalima ri ŋecin pere je, aka ogonyo jatel pa jotimi vini kodi jatel pa jotedi mugat.

²¹Odwoko jatel pa jotimi vini i kabedo pere, aka oketho kikopo i cingi Farawo,

²²to ŋawo jatel pa jotedi mugat paka Yozefu oyido otito rijo.

²³To jatel pa jotimi vini k'opoyo Yozefu, wiye owil gi go.