Read dhopadhola Cakirok 41 Bible Online

Cakirok 41 - dhopadhola bible

Cakirok 41

¹Rumacen ma oro ario gipi, Farawo oleko nike go oyido ocungo cegin gi malawa Nayil

²aka neni, dhok abirio ma ragaŋ ma joleny jowok i malawa Nayil camo lum midole.

³Aka panen, dhok abirio man ma moso aka jomok, jowok wok i malawa Nayil, aka jocungo cegin gi dhok meca mere.

⁴Aka dhok ma moso aka jomok jocamo dhok ma ragaŋ ma joleny. Aka Farawo ocew.

⁵Doko nindo okwalo go aka doko oleko. Aka panen, withi ŋano abirio, ma jopoŋ aka jocek oyido jodongo i kanja acel.

⁶Aka neni, withi ŋano abirio man jowok, mathindho aka jothwo gi koyo mar'abar.

⁷Aka withi ŋano mathindho jomwonyo woko withi ŋano ma jopoŋ. Farawo ocew, aka neni oyido obedo lek.

⁸Ameno odikin go oyido rembo, aka ooro wolwoŋi rigo jothieth ma Misir gi jorieko je. Farawo owaco rijo lek pere, to ngoye ŋat'onyalo tito.

⁹Kenyo jatel pa jotimi vini owaco ri Farawo ni, “Apoyo komo paran konon.

¹⁰Munyo imako nge gi ŋecin perin, t'iketho an gi jatel pa jotedi mugat i jiera i ot pa jotel pa jokur,

¹¹waleko wor acel, aka kisi lek oyido nitie gi dwoŋ mere.

¹²Jayuda majayac oyido nitie kenyo gi wan, ŋeca pa jatel pa jokur. Aka munyo wawaco rigo, otito lek mawan, to tito ri kisi nyatoro lek pere.

¹³Aka paka go otito riwan, ameno apaka obedo. Idwokan i kabedo paran, t'iŋawo jatel pa jotedi mugat.”

¹⁴Farawo ooro to lwoŋo Yozefu, aka okeli go piyo wok i jiera. Munyo go otieko lielirok to wiro nangin pere, obino ruwaŋ kere.

¹⁵Aka Farawo owaco rigo ni, “Aleko, aka ongoye ŋata nyalo tito, t'awinjo iwaco ni k'iwinjo lek inyalo tito.”

¹⁶Yozefu odwoko Farawo ni, “K'obedo an; Were bino miyo tito maber.”

¹⁷Kenyo Farawo owaco ri Yozefu ni, “Neni, i lek paran oyido acungo cegin gi thengi malawa Nayil

¹⁸aka dhok abirio ma ragaŋ ma joleny jowok i Nayil camo lum midole.

¹⁹Aka dhok abirio man ma moso aka jomok. Jobedo dhok mareco swa kwoŋ dhok m'atieko neno kamoro je i Misir.

²⁰Dhok ma moso jocamo dhok ma ragaŋ.

²¹To ngoye ŋat'oyido oŋey rupiri oyido fodi joreco paka i cakirok. Kenyo acew.

²²An bende aneno i lek paran withi ŋano abirio jodongo i kanja acel m'oyido jopoŋ aka jocek,

²³kodi withi ŋano abirio ma jothwo aka thindho aka koyo mar'abar owaŋo jo

²⁴aka ithe abirio mathindho jomwonyo woko ithe abirio ma jopoŋ. Aka awaco ri jothieth paran, to ngoye ŋat'oyido nyalo tito ran.”

²⁵Yozefu owaco ri Farawo ni, “Lek ario jonyutho gimoro acel. Were omenyo rin gima go cegin timo.

²⁶Dhok abirio ma ragaŋ meno oro abirio, aka withi ŋano abirio ma jopoŋ meno oro abirio. Jonyutho dwoŋ acel.

²⁷Dhok abirio ma moso ma jowok rumacen kodi withi ŋano mathindho ma koyo mar'abar owaŋo jobedo oro abirio ma kec.

²⁸Obedo paka awaco ri Farawo, Were onyutho Farawo gima go cegin timo.

²⁹Bino bedo oro abirio ma dito i lowo ma Misir gipi

³⁰aka rumacen, bino bedo oro abirio ma kec, ma k'opoy oro ma dito je i lowo ma Misir. Kec bino kisika woko lowo

³¹aka dito k'oŋeyere ro kec ma bino luwo rupiri bino bedo makec.

³²Kiluda ma lek perin nyutho ni gime Were am'oketho, aka Were bino ketho i kare macegin.”

³³“Onyo riameno weyi Farawo woyeri jacwo mariek aka ma neno yuwaŋe to ketho go kuro Misir gipi.

³⁴Weyi Farawo bende woyeri jodhum man kwanyo acel wiy abic ma cemo ma lowo ma Misir i ndir ma oro abirio ma dito.

³⁵Weyi jowocoki cemo je ma oro abirio maber ma bino, aka miy jo meni ma kano ŋano i tindin madongo to jokuro.

³⁶Cemo no bino bedo dero ri piny i oro abirio ma kec ma kidho bino i Misir ŋey ji jokiri joriy kec.”

³⁷Rieko me oneno maber ri Farawo gi jodhum pere

³⁸Aka Farawo owaco ri jodhum pere ni, “Wakibino nwaŋo jacwo maber loyo Yozefu, jacwo ma cuny pa Were nitie i go.”

³⁹Ameno Farawo owaco ri Yozefu ni, “Paka Were otieko nyuthin gime je, ongoye ŋati ma neno yuwaŋe aka riek paka in.

⁴⁰Alakethin dhumo piny paran, aka ji je jolawinjo cik perin. Dwoŋ perin bino bedo mar'ario nyaka ri an.”

⁴¹Aka Farawo owaco ri Yozefu ni, “Neni, atieko kethin dhumo lowo ma Misir je.”

⁴²Kenyo Farawo okwanyo peta pere ma oro ma ketho gine cinge i ndiko wok i lwet cinge, aka oketho i lwet cingi Yozefu. Oruko rigo nangin mafoth, aka oruko rigo thiwino ma zahabu i ŋute.

⁴³Omiyo go gweyo cawila pere mar'ario aka jokur pere jokadho yuwiy go ka joywak ni, “Tim yo! Tim yo!” Aka ameno okethi Yozefu gavana ma Misir.

⁴⁴Aka kiri Farawo owaco rigo ni, “Abedo Farawo, aka m'ongoye yerok perin ongoye ŋata bino tiŋo cinge kosa tiende i lowo ma Misir.”

⁴⁵Aka Farawo ocwoko nyingi Yozefu ni Zafenath Paneya to miyo go dhako m'ilwoŋo ni Asenath[31] nyar Potifera jacway ri Were i wi migam ma Oni. Ameno Yozefu owotho i lowo ma Misir gipi.

⁴⁶Yozefu oyido jaoro piero adek munyo ocako tic ri Farawo kere ma Misir.

⁴⁷I ndir ma oro abirio ma dito lowo onywolo cemo gibe.

⁴⁸Aka Yozefu ocoko cemo je to kano i kisi tindin madongo. I kisi tindi go okano cemo ma ndelin m'othoko go.

⁴⁹Oyido nitie ŋano madit ma cale kwoyo ma nam, aka Yozefu oweyo kiri kipima rupiri oyido kipimere.

⁵⁰Mafodi oro ma kec k'otundo, Yozefu onwaŋo wote ario, ma Asenath nyar Potifera onywolo rigo.

⁵¹Yozefu olwoŋo wode makayo ni Manase rupiri owaco ni, “Were omiyo wiyan wil gi kidamba paran gi ot pa baba.”

⁵²Aka nyingi mar'ario olwoŋo ni Efrayim to waco ni, “Were omiyan nyithindho i lowo ma candirok paran.”

⁵³Oro abirio ma dito m'obedo i lowo ma Misir otundo i gike,

⁵⁴aka oro abirio ma kec ocako bino paka Yozefu oyido owaco. Kec oyido nitie i kisi piny, to cemo oyido nitie i Misir.

⁵⁵Munyo Jomisir jocako winjo kec, joywak ri Farawo ri cemo aka Farawo owaco rijo ni, “Kidhi win bongi Yozefu aka gima go owaci, tim win.”

⁵⁶Ameno munyo kec olak i piny gibe, Yozefu oyawo dere aka otana gi Jomisir rupiri kec oyido olak i piny Misir paka rom.

⁵⁷Aka kiri, piny gibe jobino Misir bongi Yozefu nyewo ŋano rupiri kec oyido gway kisi kamoro.