Read dhopadhola Cakirok 43 Bible Online

Cakirok 43 - dhopadhola bible

Cakirok 43

¹Onyo kec oyido gway i piny.

²Aka munyo peco pa Yakobo jotieko camo ŋano je m'oyido jonyewo wok Misir, Yakobo owaco ri wote ni, “Gik win winyew riwan cemo manok.”

³To Yuda odwoko ni, “Jal ca ociko wan teltel ni, kilayeyo wan neno go kwanyo woko ka wakidho kodi omin wan.

⁴K'ilaoro wan g'omin wan, wabino loro to wanyewo cemo;

⁵to k'ikilaoro wan gi go, wakibino loro, rupiri jal ca owaco riwan ni kilayeyo wan neno go kwanyo woko ka wakidho kodi omin wan.”

⁶Yakobo owaco ni, “Raŋo wikelo ran teko madit to wiwaco ri jalo ni winitie kodi omin win man?”

⁷Jodwoko ni, “Jalo obedo kanyo penjo kwoŋ wan gi peco mawan, ‘Bawin fodi kwo? Winitie kodi omin win man?’ Gima wawaco rigo obedo radwok ma penji pere. Oyido wanonyal nedi ŋeyo ni go oyido lawaco riwan ni wakel omin wan?”

⁸Aka Yuda owaco ri bamere ni, “Or jayac kodan, aka wabino kadho dicel. Kenyo ongoye kwoŋ wan ŋata bino riyo kec.

⁹Aciko kwo paran won, aka i penjan go. K'akidwoko go bongin maber, aŋat'abino tero apuse kicutho.

¹⁰Kabedi oyido wakikuro hongo malac, dinyo watieko kidho to wadwoko dirio.”

¹¹Kenyo Yakobo bajo owaco rijo ni, “K'inen ripo bedo ameno, ere kethi win ranyak moro mabeyo ma lowo me i kutiyin mewin, aka witer ri gavana, vini m'othwo, gigipiny maŋwe kur, mo kic, segonya kodi yath alimond.

¹²Ter win bende pesa mirundi ario, rupiri ripo widwoki pesa m'odwok riwin i dhok kutiyin mewin. Kono oyido obedo kibenga.

¹³Ter win omin win bende aka ay win wigik bongi jacwo no.

¹⁴Weyi Were Majameni je womiy win wor ruwaŋ go, ŋey wodwoki riwin Benyamin kodi Simeo. Ka ripo akeŋ nyithindho paran, ripo akeŋ jo.”

¹⁵Ameno wutmere jokwanyo mic kodi pesa mirundi ario, aka joay to joloro Misir kodi Benyamin. Kenyo, jocungo ruwaŋ Yozefu.

¹⁶Munyo Yozefu oneno Benyamin gi jo, owaco ri ŋeca ma ot pere ni, “Ter win cwo me i ot paran, aka ithumi ogwaŋ t'itedo, rupiri cwo me jolacemo kodan sawa aucel.”

¹⁷Ŋeca no otimo paka Yozefu owaco, aka otero cwo no i ot pa Yozefu.

¹⁸Munyo oyido itero jo i ot pa Yozefu, jobwok aka jowaco ni, “Okel wan ka ro pesa m'odwok i kutiyin mawan ndir marapena. Jolamonjo wan abwap to jokwanyo punde mawan, to joloko wan ŋecin.”

¹⁹Ameno joluwo gi ŋeca ma ot pa Yozefu i dhiot,

²⁰aka jowaco ni, “Jadwoŋ, waloro piny ka nyewo ŋano i weso marapena

²¹aka munyo watundo i kabedo ma wanind'iye to wayawo kutiyin mawan, pesa pa kisi nyatoro je oyido nitie i dhok kutiya pere; pesa gikululu. Ameno wadwoko gine.

²²Doko bende wabino gi pesa man nyewo cemo. Wakuya ni ŋa m'oketho pesa mawan i kutiyin mawan.”

²³Ŋeca no odwoko ni, “Aridho riwin, wikiri wibwok; Were mewin aka Were pa bawin ama ripo bedo ni oketho riwin pesa i kutiyin mewin.” Kenyo go okelo Simeo bongi jo.

²⁴Ŋeca no otero jo i ot aka omiyo jo pi ŋey jowolwoki tiendi gin to pidho punde pajo.

²⁵Joyiko mic pajo m'amiyo Yozefu k'otundi sawa aucel, rupiri oyido otiek waco rijo ni jolacemo kanyacel gi go.

²⁶Munyo Yozefu obino peco, jokelo rigo mic m'oyido jonigine i ot, aka jokule rigo piny.

²⁷Yozefu openjo jo kwoŋ kwo pajo aka owaco ni, “Bawin ber, jal m'oti ma wiluwo kwoŋe? Go fodi kwo?”

²⁸Jodwoko ni, “Ŋeca perin bawan fodi kwo.” Aka joguro congi gin jo jokule piny ruwaŋ go.

²⁹Yozefu otiŋo waŋe malo aka oneno omin go Benyamin wod pa min aka owaco ni, “Me a omin win mathin ma wiluwo kwoŋe? Were womiyin silwany wodan.”

³⁰Kenyo Yozefu oeye abwap rupiri cunye oyido opoŋ mar ri omin. Go oyido cegin tur, aka odonjo i kisika pere to ywak.

³¹Munyo otieko lwoko waŋe, owok, aka odhumere to miyo cik ni wotok cemo.

³²Otok ri Yozefu cemo kakende, aka jo bende kakendi gin. Jomisir m'oyido jocemo kenyo otok rijo cemo kakendi gin rupiri oyido jotero cemo gi Joebulaniya paka amien.

³³Oyido okethi jo bedo i meza i nywolirok pajo to joŋiyo Yozefu; cako kwoŋ okayo tundo kwoŋ ocoko. Munyo Joneno nger m'oketh'iye jo bedo, joŋiyere i dhier.

³⁴Otok rijo cemo wok i meza pa Yozefu aka otok ri Benyamin cemo maloyo apa wadi dibic. Ameno jocemo to jomedho gi Yozefu cuka jomer.