Read dhopadhola Cakirok 46 Bible Online

Cakirok 46 - dhopadhola bible

Cakirok 46

¹Ameno opanga kisi gim'oyido nitie gine to kidho Berseba kama go omiy'iye Were pa bamere Isaka cowirok.

²Were oluwo gi go i menyirok wor, aka owaco ni, “Yakobo, Yakobo!” Yakobo odwoko ni, “Ey, an e.”

³Kenyo Were owaco ni, “An Were, Were pa benin. Ikir'ilwor kidho piny i Misir rupiri abino miyo nyikwayin bedo piny madwoŋ kenyo.

⁴Abino kidho piny kodin, aka abino doko kelin malo. Yozefu bino bedo kodin k'itho.”

⁵Kenyo Yakobo oay wok Berseba. Wot Yakobo joketho go, nyithindho maŋic kodi mon pajo i cawila madongo ma Farawo oyido odhiro tiŋo go.

⁶Jotero ogwaŋe pajo kodi lim pajo m'oyido jolimo i Kanan to jokadho i Misir. Yakobo okadho gi nyikwaye je,

⁷wote, nyikwaye ma cwo, nyiki go kodi nyikwaye manyir.

⁸Onyo me a nyikway Yakobo ma jobino gi go i Misir kodi wote. Ruben okayo pere,

⁹kodi wot Ruben; Hanok, Palu, Heziron, kodi Karim.

¹⁰Simeo gi wote; Yemuel, Yamin, Ohad, Yakin, Zohar, kodi Saulo, wot dhako Jakanan.

¹¹Levi gi wote; Gerison, Kohath, kodi Merari.

¹²Yuda gi wote; Eri, Onan, Sela, Perez, Zera, (to Eri kodi Onan jotho i piny Kanan.) Aka wot Perez oyido Heziron kodi Hamul.

¹³Isakar gi wote; Tola, Puwa, Yob, kodi Simiron.

¹⁴Zebulun gi wote; Sered, Elon, kodi Yalal.

¹⁵Me oyido wot Leya m'onywolo ri Yakobo i Mesopotamia kanyacel gi nyare Dina. Kanyacel nyikway Yakobo m'olimo gi Leya oyido tundo piero adek g'adek.

¹⁶Gad gi wote; Zefon, Hagi, Suni, Ezibon, Eri, Arodi, kodi Areli.

¹⁷Aser gi wote; Imina, Isiva, Isivi, Beria, kodi nyamin jo Sera. Wot Beria oyido Heber kodi Malikiel.

¹⁸Joje, apar g'aucel me jobedo nyikway Yakobo ma kwoŋ Zilipa; dhako ma Laban omiyo nyare Leya paka ŋeca.

¹⁹Laker cipa Yakobo onywolo rigo wote ario, Yozefu kodi Benyamin.

²⁰I Misir Yozefu olimo wote ario, Manase kodi Efrayim ma Asenath nyar Potifera jacway ri Were i wi migam onywolo rigo.

²¹Wot Benyamin oyido jobedo, Bela, Beker, Asibel, Gera, Naman, Ehi, Ros, Mupim, Hupim, kodi Arid.

²²Joje apar g'aŋwen me jobedo nyikway Yakobo ma kwoŋ Laker.

²³Dan gi wode Husim.

²⁴Nafital gi wote; Yazel, Guni, Yezer, kodi Silam.

²⁵J'abirio me jobedo nyikway Yakobo ma kwoŋ Biliha, ŋeca ma Laban omiyo nyare Laker.

²⁶Ji je ma jobedo apa Yakobo tirtir ma jobino Misir k'iweyo woko mon pere oyido jonitie piero aucel g'aucel.

²⁷Yozefu olimo wote ario i Misir to medo welo ji ma peco pa Yakobo tundo piero abirio ma jobino Misir.

²⁸Yakobo ooro Yuda yuwiye kwayo Yozefu wobin worom gi jo i Gosen. Aka munyo jobino,

²⁹Yozefu odonjo i cawila pere to kidho Gosen romo gi bamere. Munyo joromo, Yozefu opodho i ŋuti bamere to ywak ma hongo mabor.

³⁰Yakobo owaco ri Yozefu ni, “Nyo weyi atho, paka atieko nenin aka aŋeyo ni fodi ikwo.”

³¹Kenyo Yozefu owaco ri wutmin gi jopeco pa bamere m'odoŋ ni, “Aripo kidho awaci ri Farawo ni wutmera gi jopeco pa baba je m'oyido jobedo i Kanan jobino bongan.

³²Abino waco rigo ni wibedo jokwath aka wikuro ogwaŋe aka ni wikelo mwendi gi dhok kodi gigipiny je m'obedo mewin.

³³Ka Farawo olwoŋi win to penjo win ni witimo tic aŋo,

³⁴wiwaci ni wikuro ogwaŋe i kwo mewin je paka kwarere mewin jotimo. I nger me go laweyo win bedo iy'adec Gosen.” Yozefu owaco gime rupiri Jomisir jongoye gi gir'atima gi jokwath.