Read dhopadhola Cakirok 47 Bible Online

Cakirok 47 - dhopadhola bible

Cakirok 47

¹Ameno Yakobo okwanyo wutmin abic to kidho bongi Farawo. Owaco ni, “Baba gi wutmera jobino wok Kanan gi mwendi pajo, dhok, kodi lim pajo je. Onyo pama jonitie iy'adec ma Gosen.”

²Kenyo go onyutho Farawo wutmin abic.

³Farawo openjo jo ni, “Witimo tic aŋo?” Jodwoko ni, “Wabedo jokwath jadwoŋ paka kwarere mawan.

⁴Wabino bedo i piny me rupiri i piny Kanan kec gway m'ongoye lum ri mwendi. Mondo yey ŋecin perin jowobedi iy'adec ma Gosen.”

⁵Kenyo Farawo owaco ri Yozefu ni, “Benin gi wutmin in jobino bongin

⁶aka lowo ma Misir nitie ruwaŋin; weyi jowobedi iy'adec ma Gosen, adec ma lowo maber loyo. Aka k'iŋeyo cwo ma jonitie gi nyalo kwoŋ jo, kethi jowokuri ogwaŋe paran.”

⁷Kenyo Yozefu okelo Yakobo bamere to nyutho Farawo aka Yakobo omiyo Farawo silwany.

⁸Aka Farawo openjo Yakobo ni, “Ija oro adi?”

⁹Yakobo odwoko ni, “Kwo paran ma woth otieko oro 130. Oro no jobedo manok to ma teko, makiweno paka oro mabor ma woth pa kwarere paran.”

¹⁰Yakobo omiyo Farawo silwany, osewila go to kadho.

¹¹Kenyo Yozefu omiyo bamere gi wutmin kabedo i Misir; aka omiyo jo lim i lowo maber loyo i tindi madwoŋ Rameses paka Farawo oyido owodho or.

¹²Yozefu omiyo bamere gi wutmin kodi jopeco pa bamere je cemo kiri gi nyithindho.

¹³Onyo kec oyido gway ma cemo oyido ongoye kisi kamoro; ma ji ma Misir gi Kanan jolocere ro kec.

¹⁴Paka jonyewo ŋano, Yozefu ocoko pesa je to tero i cel pa kere

¹⁵Munyo pesa ma Misir gi Kanan orumo, Jomisir jobino bongi Yozefu to jowaco ni, “Miy wan cemo! Ikir'iwey watho. Tim gimoro! Pesa mawan orumo.”

¹⁶Yozefu odwoko ni, “Keli win ogwaŋe mewin; abino miyo win cemo t'awilo gine ka pesa mewin orumo.”

¹⁷Ameno jokelo ogwaŋe pajo bongi Yozefu, aka omiyo jo cemo to wilo gi kayina, rombo, diegi, dhok kodi punde. I oro no omiyo jo cemo to wilo g'ogwaŋe.

¹⁸Aka munyo oro no orumo, jobino bonge i oro ma luwo to jowaco ni, “Wakilamuŋin jadwoŋ ni pesa mawan orumo, aka dhok mawan jobedo aperin; ongoye gima wadoŋ gine ma wanomiyin kwanyowoko delkwoŋ wan gi lowo mawan.

¹⁹Ikir'iwey watho. Tim gimoro! Ikir'iwey lowo mawan wojwangere. Nyew wan kiri gi lowo mawan i wil gi cemo. Walabedo ŋecin pa Farawo aka go ladoŋ gi lowo mawan. Miy wan ŋano ŋey wakwo wakiri watho kodi kodhi ma cwoyo i ndelin mawan.”

²⁰Ameno Yozefu onyewo lowo ma Misir gipi ri Farawo. Kisi Jamisir oromere kitana lowo pere, rupiri kec oyido gway. Lowo olokere apa Farawo;

²¹aka Yozefu oloko ji ŋecin wok i gike ma Misir acel tundo i meca.

²²Nyaka lowo pa jocway ri Were i wi migam ama go k'onyewo; rupiri oyido Farawo miyo jo gi kwo, aka am'omiyo jok'otana lowo pajo.

²³Kenyo Yozefu owaco ri ji ni, “Neni, konon me anyewo win gi lowo mewin ri Farawo. Onyo kodhi ee riwin ma cwoyo i ndelin mewin

²⁴I hongo ma kec, wilamiyo acel wiy abic ri Farawo, aka m'odoŋ amewin ma kodhi kodi cemo riwin kodi pecin mewin.”

²⁵Jodwoko ni, “Itieko botho kwo mawan; inyutho wan bero jadwoŋ, aka wabino bedo ŋecin pa Farawo.”

²⁶Ameno Yozefu oketho paka cik i lowo ma Misir ni acel wiy abic ma nyak ripo bedo apa Farawo. Cik me fodi cungo kiri konon; kwanyowoko lowo pa jocway ri Were i wi migam ama k'olokere lowo pa Farawo.

²⁷Joisiraili jobedo i Misir iy'adec ma Gosen kama joŋaŋ'iye to jonywolo nyithindho kweth.

²⁸Yakobo obedo i piny Misir ma oro apar g'abirio, cuka otundo oro 147.

²⁹Munyo hongo odhire cegin rigo ma tho, olwoŋo wode Yozefu aka owaco rigo ni, “K'inen pama atieko nwaŋo wor ruwaŋin, kethi cingin i ŋangan aka ikwoŋere ran nike ikilayikan i Misir,

³⁰t'ilayikan kama bacere paran jonitie iye; tiŋan wok i Misir aka iyikan kam'oyik'iye jo.” Yozefu odwoko ni, “Abino timo paka iwaco.”

³¹Yakobo owaco ni, “Kwoŋere ran n'ibino timo.” Yozefu otimo ameno, aka Yakobo omiyo foyo kenyo i wi kanindo pere.