Read dhopadhola Cakirok 48 Bible Online

Cakirok 48 - dhopadhola bible

Cakirok 48

¹Rumacen ma gime owaci ri Yozefu ni, “Neni, benin two swa.” Ameno okwanyo wote ario, Manase kodi Efrayim to kidho neno bamere.

²Aka munyo owaci ri Yakobo ni wode Yozefu oyido obino, olimo meni to ay bedo i wi kanindo.

³Yakobo owaco ri Yozefu ni, “Were Majameni je onenere ran i Luz i piny Kanan to miyan silwany.

⁴Aka owaco ran ni, ‘Neni, abino miyin nyithindho kweth, ŋey nyikwayin jowolokere piny madongo. Abino miyo nyikwayin lowo me paka lim pajo kicutho.’ ”

⁵Yakobo omedere waco ni, “Wotin ario m'onywol rin i Misir mafodi akibino ka, jobedo aparan; Efrayim gi Manase jobedo wotin paka Ruben gi Simeo.

⁶K'inolim wotin man, jokilakwanere paka aparan. Jobino limo gir'alunja pajo kwoŋ Efrayim gi Manase.

⁷Atimo gime ro yokin Laker. I rem paran madwoŋ go otho i lowo ma Kanan, kama kibor gi Efratha munyo nyaka adwoko wok Mesopotamia. Ayiko go kenyo i thengi yo ma kidho Efratha.” (Efrath pama oŋeyere paka Bethelehem.)

⁸Munyo Yakobo oneno wot Yozefu, openjo ni, “Me yac mene?”

⁹Yozefu odwoko ni, “Me wotan ma Were omiyan jo ka i Misir.” Yakobo owaco ni, “Keli jo bongan ŋey amiy jo silwany.”

¹⁰Onyo waŋ Yakobo oyido riprip ro oro pere aka oyido kinen maber. Ameno Yozefu okelo jo cegin gi go, aka ocwiyo lembi jo to podho i kor jo.

¹¹Aka Yakobo owaco ri Yozefu ni, “Oyido akipar ni anonenin kendo, to neni, Were oyeyan neno kiri nyithindho perin bende.”

¹²Kenyo Yozefu okwanyo jo wok i tiendi Yakobo to kule ruwaŋ Yakobo gi nyime piny.

¹³Aka Yozefu okwanyo joje to ketho Efrayim yuracam pa Yakobo aka Manase yuracuc pa Yakobo.

¹⁴To Yakobo olwowo cingi to ketho cinge maracuc i wi Efrayim makada nende go am'oyido thin; to ketho cinge maracam i wi Manase m'oyido dwoŋ.

¹⁵Kenyo Yakobo omiyo Yozefu silwany ka waco ni, “Weyi Were ma kwarere paran Abraham gi Isaka jotiyo rigo womiy yac me silwany, Were m'otelan i kwo paran je tundo gunyo ni.

¹⁶Weyi malaika m'obothan wok i raco je womiy jo silwany! Weyi nyingan kodi nyingi bacere paran Abraham, kodi Isaka womedere luwo i jo! Weyi jowobedi gi nyithindho kweth, kodi nyikway jo kweth!”

¹⁷Munyo Yozefu oneno ni bamere oketho cinge maracuc i wi Efrayim, owinjo marac aka okwanyo cingi bamere ni wokwany woko wok i wi Efrayim wokethi i wi Manase.

¹⁸Aka Yozefu owaco ri bamere ni, “K'ameno baba; me aya okayo, kethi cingin maracuc i wiye.”

¹⁹To bamere okwero to waco ni, “Aŋeyo wodan, aŋeyo. Nyikway Manase bende jobino lokere ji madongo. To omin go mathin bino bedo madwoŋ loyo go, aka nyikwaye jobino lokere nonin madongo.”

²⁰Ameno Yakobo omiyo jo silwany ndelo no ka waco ama: “Joisiraili jobino oro nyingi win ka jomiyo silwany. Jobino waco ni, ‘Weyi Were wolokin paka Efrayim gi Manase.’ ” I nger me Yakobo oketho Efrayim telo Manase.

²¹Kenyo Yakobo owaco ri Yozefu ni, “Neni, acegin tho, to Were bino bedo kodin, aka bino dwokin i lowo pa bacere perin.

²²Obedo rin aka ki ri wutmin in m'amiyo Sekem, adec maber ma mayo Joamor g'abor paran kodi asere.”