Read dhopadhola Cakirok 49 Bible Online

Cakirok 49 - dhopadhola bible

Cakirok 49

¹Kenyo Yakobo olwoŋo wote aka owaco ni, “Cokere win kanyacel ŋey awaci riwin gima lapodho kwoŋ win i hongo ma yuwiye.”

²“Cokere win kanyacel, awi wot Yakobo aka winji win bawin Yakobo.”

³“Ruben, ibedo okayo paran meni paran, aka nyathi paran marapena ma jacwo paran, ma nor loyo aka tek loyo wotan je.

⁴Icale mikula ma mol t'ikila bedo ŋata dicwe loyo, rupiri inindo gi malaya paran t'icayo kanindo paran.”

⁵“Simeo gi Levi jobedo wutmere. Jooro gilweny pajo ma timo akaka.

⁶Akibino riwirok i luwo pajo manyaliŋliŋ, kosa akibino bedo i pido pajo, rupiri joneko cwo i nge, aka joŋolo thwondhe ma nono.

⁷Lam wobedi i nge pajo rupiri obedo mager swa, kodi kwoŋ keme pajo rupiri ger swa. Abino tiako jo i lowo gipi ma Isiraili, t'akedho jo i dier ji mere.”

⁸“Yuda, wutmin in jolapakin. Cingin bino bedo i ŋuti jokwor perin. Wot benin jobino kulok rin piny ruwaŋin.

⁹Yuda cale simbwor, neko jokwor pere aka gik i ode riere to nindo piny. Ongoye ŋata temo cando go.

¹⁰Yuda bino mako luth pa kere, aka nyikwaye wangi jobedo jodhum. Piny jobino kelo ri mic to jokule ruwaŋ go i wor.

¹¹Go tweyo nyathi punde pere i tiendi yath vini, i vini ma ner loyo. Go lwoko nangin pere i vini m'obokere pa remo.

¹²Waŋe labokere ro madho vini, aka lake matar ro madho cak.”

¹³“Zebulun bino bedo i thengi nam. Thengi nam pere bino bedo kacungo pa mel. Adec pere bino tundo kiri i tindi Sidon.”

¹⁴“Isakar obedo punde matek, ma riere piny i dier mugugu pere.

¹⁵To neno ni kaywomirok ber, aka ni lowo ber. Ameno go luŋo dieŋeye ni wotiŋ mugugu to romere tic paka ŋeca.”

¹⁶“Dan bino thumo banja ri ji pere paka acel kwoŋ nonin ma Isiraili.

¹⁷Dan bino bedo thwol i thengi yo, malasaŋ i yo, ma kayo fundi kayina ŋey bolo jagwey yuŋeye.”

¹⁸“Akuro both perin Rwoth.”

¹⁹“Jokinyaga jobino monjo Gad, to go bino wire to riemo jo.”

²⁰“Lowo pa Aser bino nyak cemo m'owega. Go bino miyo cemo ma ripo gi kere.”

²¹“Nafital obedo kol ma ŋweco nono aka nywolo nyithindhe m'omore.”

²²“Yozefu cale punde madudi i thengi waŋ pi nyathi punde madudi i thengi tendere.

²³Jokwor pere jomonjo go gi gero aka joriemo gi kwot kodi aserin.

²⁴To kwot pere kiyengere aka cingi go oloki matek, gi meni pa Were Majameni pa Yakobo. Kodi jakwath, tele pa Isiraili.

²⁵Obedo Were pa benin ama konyin, Were ma Jameni je ma miyin silwany gi silwany ma koth wok malo kodi ma pi maluth wok piny i lowo, silwany ma dhok kweth kodi nyithindho kweth.

²⁶Silwany ma ŋano gi mawuwa, silwany ma gote macon gigipiny maber wok i wi tendere makicutho. Weyi silwany me je wobedi i wi Yozefu, i biendi waŋ ŋat'okethi gicen kwoŋ wutmin.”

²⁷“Benyamin cale arara mager. Odikin g'othieno neko gimoro to camo.”

²⁸Me je a nonin apar g'ario ma Isiraili; aka me a gima bajo owaco munyo miyo jo silwany, kanyo miyo kisi nyatoro silwany ma ripo gine.

²⁹Kenyo Yakobo omiyo wote cik ni, “Onyo paka akidho riwirok gi ji paran i tho, yikan win gi bacere paran i ŋungu manitie i ndelo pa Efron Jahiti,

³⁰i Makipela, yuwok ceŋ ma Mamire i piny Kanan. Abraham onyewo ŋungu me wok bongi Efron paka kayik.

³¹Kenyo oyik'iye Abraham gi cege Sara, Isaka gi mon pere Rebeka kodi Leya.

³²Ndelo kodi ŋungu manitie iye no onyew wok bongi Johiti. Yikan win kenyo.”

³³Munyo Yakobo otieko ciko wote teltel, onindo piny kendo, to go tho.