Read dhopadhola Cakirok 50 Bible Online

Cakirok 50 - dhopadhola bible

Cakirok 50

¹Kenyo Yozefu opodho kwoŋ bamere to ywako go, aka ocwiyo lembe.

²Aka Yozefu owodho or ri ŋecin pere ma jotweyo delkwoŋ jom'otho ma yik ni jowowir delkwoŋ bamere ŋey wokiri wotopi. Aka jotimo ameno.

³Otero jo ndelo piero aŋwen ma ripo gi timo ameno. Aka Jomisir joywako go ma ndelo piero abirio.

⁴Munyo ndelo ma ywak orumo, Yozefu oluwo gi jodhum pa Farawo ni, “Mondo ter win mikwenda me ri Farawo:

⁵Munyo baba cegin tho, omiyan kwoŋirok ni abino yiko go i kaliel ma go oyiko i piny Kanan. Onyo riameno mondo weyi akidhi malo, ayiki baba t'adwoko.”

⁶Aka Farawo odwoko ni, “Kadhi malo i yik benin paka ikwoŋere rigo.”

⁷Ameno Yozefu okidho yiko bamere. Jodhum pa kere je, jodongo ma ot pere, kodi jodongo ma piny Misir je jokadho gi Yozefu.

⁸Jopeco pa Yozefu, wutmin, kodi jopeco pa bamere je jokadho gi go. Nyaka nyithindho kodi mwendi kodi dhok pajo ama jodoŋ iy'adec ma Gosen.

⁹Cwo i cawila kodi kayina bende jokadho gi go. Oyido obedo kitipa madwoŋ.

¹⁰Munyo jotundo i kisia ma Atadi yuwok ceŋ ma Yordan, joywak ma hongo mabor, aka Yozefu otimo kalima ma ywak ma ndelo abirio.

¹¹Munyo ji ma Kanan joneno jono joywak i Atadi, jowaco ni, “Nga me ywak ma kwoŋirok ma Jomisir jotimo!” Meno am'omiyo olwoŋi kabedo no ni Abel Mizirayim.[32]

¹²Ameno wot Yakobo jotimo paka go omiyo jo or.

¹³Jotiŋo delkwoŋe jotero Kanan to joyiko i ŋungu i Makipela yuwok ceŋ ma Mamire, i ndelo ma Abraham oyido onyewo wok bongi Efron Jahiti ma yik.

¹⁴Rumacen ma yiko bamere, Yozefu ogik i Misir gi wutmin kodi jono je m'oyido jokadho gi go malo yiko bamere.

¹⁵Rumacen ma tho pa bajo, wutmin Yozefu jowaco ni, “To k'obedi ni Yozefu fodi odak wan to cano culo wan ro raco je ma watimo rigo?”

¹⁶Ameno jodhiro mikwenda ri Yozefu ni, “Mafodi bawan k'otho,

¹⁷owaco nike wakwayin, ‘Mondo cwaki reco pa wutmin in munyo jotimo rin marac.’ Aka onyo wakwayin cwaki riwan gimarac ma wan, ŋecin pa Were pa benin jotimo.” Yozefu oywaki munyo owaci rigo.

¹⁸Kenyo wutmin Yozefu wegi jobino to jokule piny ruwaŋ go, aka jowaco ni, “Neni, wabedo ŋecin perin.”

¹⁹To Yozefu owaco rijo ni, “Wikiri wibedi gi lworo, rupiri akinyali kethirok i kabedo pa Were.

²⁰Wicano ran gimarac, to Were owiro i bero, gwoko kwo pa ji kweth ma konon jokwo ro gim'otimere.

²¹Ameno wikiri wibedi gi lworo; abino miyo win gi nyithindho mewin cemo.” Ameno go omedo ridho rijo to diyo adundo pajo.

²²Yozefu omedere bedo i piny Misir gi peco pa bamere, aka otieko oro 110.

²³Aka Yozefu oneno nyithindho pa Efrayim kodi nyikwaye je. Go bende oneno nyithindho pa Makir wod pa Manase paka nyithindho pere.

²⁴Aka Yozefu owaco ri wutmin ni, “Acegin tho, to Were bino wendo riwin to wotho win wok i piny me kelo win i piny ma go ociko Abraham, Isaka, kodi Yakobo.”

²⁵Kenyo go okwayo ji pere kwoŋirok ni, “Ka Were owodhi win wok i piny me, wibino tiŋo cokin paran wok ka.”

²⁶Ameno Yozefu otho munyo jaoro 110 aka owir delkwoŋe wokiri wotopi t'iketho i sanduku ma yik.