Read dhopadhola Cakirok 7 Bible Online

Cakirok 7 - dhopadhola bible

Cakirok 7

¹Kenyo Rwoth owaco ri Nowa ni, “Donji i ye gi peco perin je. Atieko nwaŋo ni in kende am'otire i luse me.

²Kwany kisi nger ogwaŋe m'olony ma cwo abirio gi ma mon abirio, to makoc, nyaka jario; ma jacwo gi madhako.

³Kwany kisi nger winyo ma cwo abirio gi ma mon abirio. Tim ameno ŋey kisi nger ogwaŋ gi winyo wobedi makwo to doko jonywol i piny.

⁴Rupiri i ndelo abirio wok pama akidho dhiro koth ma lacwe ma odieceŋ piero aŋwen gi wor; ŋey worey woko kisi gima kwo m'acweyo.”

⁵Aka Nowa otimo kisi gima Rwoth omiyo go or ni wotim.

⁶Nowa oyido jaoro 600 munyo pi mikula obino i piny.

⁷Aka go gi cege, gi wote kodi mon pajo jodonjo i ye both pi mikula.

⁸Kisi nger ogwaŋe m'olony gi makoc, ma jacwo gi madhako

⁹odonjo i ye gi Nowa paka Were oyido omiyo Nowa or.

¹⁰Aka rumacen ma ndelo abirio pi mikula obino i piny.

¹¹Munyo Nowa jaoro 600 k'apar g'abirio i dwe mar'ario, i ndelo no waŋ pi je ma piny omwomere, aka waŋ pi ma pondeponde je oyaw.

¹²Koth ocwe i piny ma odieceŋ piero aŋwen gi wor.

¹³I ndelo no won Nowa gi cege kodi wote adek, Semu, Ham, kodi Yafeth gi mon pajo jodonjo i ye.

¹⁴Gi jo okadho kisi nger ogwaŋe ma peco gi madudi, mathindho gi madongo, kodi kisi nger winyo.

¹⁵Ma jacwo gi madhako ma kisi nger gima kwo i ye gi Nowa

¹⁶paka Were oyido omiyo go or. Kenyo Rwoth ocego thigo yuŋey Nowa.

¹⁷Mikula pi omedere i piny ma ndelo piero aŋwen, aka pi olokere maluth ma romo ye mol.

¹⁸Pi olokere maluth aka ye omol i wiye.

¹⁹Olokere maluth swa to umo kiri gote maboyo loyo;

²⁰omedere ay cuka otundo mita abirio kalo wi gote.

²¹Kisi gima nitie gi kwo i piny otho; kisi winyo, kisi ogwaŋe, gi kisi nyatoro.

²²Kisi gima ywe i piny otho

²³Rwoth oreyo woko kisi gima kwo i piny; ji, ogwaŋe, kodi winyin. Nyaka ma jodoŋ obedo Nowa kodi jom'oyido nitie gi go i ye.

²⁴Aka pi obedo i piny ma ndelo 150.