Read dhopadhola Cakirok 9 Bible Online

Cakirok 9 - dhopadhola bible

Cakirok 9

¹Aka Were omiyo Nowa gi wote silwany to waco rijo ni, “Limi win nyithindho aka wipoŋ piny.

²Ogwaŋe je gi winyin kodi rec jowobedi gi lworo riwin. Aketho joje i cingi win.

³Kisi gima wotho makwo bino bedo cemo riwin, kodi yen manyaboke pendi. Amiyo win joje paka cemo.

⁴Kwanyowoko, gimoro acel ma wikiripi timo, acamo riŋo manitie remo; akwero rupiri kwo nitie i remo.

⁵Ka nyatoro okwanyo kwo, ibino miyo go gir'acula. Abino miyo gir'acula ma tho ri ogwaŋ ma kwanyo kwo pa nyatoro.

⁶Ji ocwey jo i cal pa Were, riameno ŋata neko acel kwoŋ jo bende ŋatiman bino neko go.”

⁷ “Wiripo limo nyithindho kweth ŋey nyikway win jowopoŋ i piny.”

⁸Kenyo Were owaco ri Nowa kodi wote ni,

⁹“Neni, atimo cikirok gi win kodi nyikway win,

¹⁰kodi kisi gima kwo; winyin je kodi ogwaŋe, kodi kisi gim'owoki i ye gi win.

¹¹Atimo cikirok paran gi win ni doko akibino reyo gigipiny makwo gi mikula, aka doko mikula kilareyo piny.

¹²Paka ranyuth ma cikirok ma cil gi cil ma timo gi win me, kodi gima kwo je;

¹³Aketho lifudo i pondeponde. Meno bino bedo ranyuth ma cikirok paran gi piny gibe.

¹⁴Kisi k'akelo pondeponde i wi piny to lifudo neno i pondeponde,

¹⁵Abino poyo cikirok paran manitie i dier an gi win kodi kisi gima kwo je nike mikula doko kilareyo woko kisi gima nitie gi kwo.

¹⁶Ka lifudo oneno i pondeponde, Abino ŋiyo t'apoyo cikirok paran ma cil gi cil i dier an gi kisi gima kwo je i piny.

¹⁷Me ranyuth ma cikirok m'atimo i dier an kodi gima kwo je manitie i piny.”

¹⁸Wot Nowa ma jowok i ye jobedo Semu, Ham, kodi Yafeth. (Ham oyido obedo ba Kanan).

¹⁹Wot Nowa me ama jobedo kwari ji je ma piny.

²⁰Nowa am'obedo jafur marapena. Go opidho ndelo vini

²¹aka omadho vini to mer, aka oriere i wema pere kinyoro.

²²Munyo Ham ba Kanan oneno kinyoro pa bamere, okidho to waco ri wutmin go ario.

²³Kenyo Semu kodi Yafeth jokidho jokwanyo nanga, joketho i goki jo aka jowotho aŋey to joumo kinyoro pa bajo. Oyido jowiro waŋ gin aka jok'oneno kinyoro pa bajo.

²⁴Munyo Nowa ocew ma milengela to ŋeyo gima wode mathin otimo rigo,

²⁵owaco ni, “Akwoŋo Kanan! Go bino bedo ŋeca pa wutmin go.

²⁶Abino miyo Semu silwany gi Rwoth, Were paran! Kanan bino bedo ŋeca pa Semu.

²⁷Weyi Were womiy Yafeth nyay! Weyi nyikwaye jowobedi gi ji pa Semu! Aka Kanan bino bedo ŋeca pa Yafeth.”

²⁸Rumacen ma mikula, Nowa okwo ma oro 350

²⁹aka otho munyo jaoro 950.