Read dhopadhola 2 Samwiri 1 Bible Online

2 Samwiri 1 - dhopadhola bible

2 Samwiri 1

¹Munyo Saulo otieko tho, Daudi odwoko wok i lweny gi Joamalek, aka obedo Ziklag ma ndelo ario.

²I ndelo mar'adek odikin, jayac moro obino wok i kambi pa Saulo. Ma nyutho rem pere, oyeco nanga pere to konjo fukefuke i wiye. Okidho bongi Daudi aka obwonere to kule piny i wor.

³Daudi openjo go ni, “Iwok kune?” Go odwoko ni, “Akwale wok i kambi pa Joisiraili.”

⁴Daudi owaco rigo ni, “Waci ran gim'otimere.” Jayac no odwoko ni, “Jolweny mawan joringo wok i lweny, aka cwo mawan madit oneki. Saulo gi wode Yonathan bende oneki jo.”

⁵Daudi openjo go ni, “Iŋeyo nedi ni Saulo gi Yonathan bende jotho?”

⁶Jayac no odwoko ni, “Onwaŋere ni oyido anitie wi got Gilbowa, Saulo oyido othenere kwoŋ toŋ pere, aka cawila gi jolweny oyido jobino yu bongi go gi kayina.

⁷To go wire, onenan, aka olwoŋan; t'adwoko ni, ‘Jadwoŋ’

⁸Saulo openjan ŋat'abedo, t'awaco rigo ni oyido abedo Jaamalek.

⁹Kenyo go owaco ran ni, ‘Biye nekan! Rupiri aditi g'adhola kwoŋan, aka acegin tho.’

¹⁰Ameno akidho bongi go, aka aneko go, rupiri oyido aŋeyo ni go k'okwo k'opodhi piny. Aka akwanyo sangaria pere gi atego pere wok i cinge, aka akelo rin jo jadwoŋ.”

¹¹Daudi oyeco woko law pere i rem, aka cwo pere bende jotimo ameno

¹²jobedo gi geregere aka joywak to joriyo tundo othieno ri Saulo gi wode Yonathan kodi ri ji pa Rwoth rupiri kweth m'oyido oneki i lweny.

¹³Daudi openjo jayac m'okelo rigo wac ni, “Iwok kune?” Jayac no odwoko ni, “Abedo japath, Jaamalek, t'abedo i piny perin.”

¹⁴Daudi openjo go ni, “Raŋo lworo k'omakin neko ŋata Rwoth owiro gi mo bedo kere?”

¹⁵Kenyo Daudi olwoŋo acel kwoŋ cwo pere, aka owaco rigo ni, “Neki go!” Aka jalo ocwowo Jaamalek to wumiya go.

¹⁶Daudi owaco ri Jaamalek ni, “In won ikelo gime kwoŋin; rupiri dhokin won ama osegeya in munyo iwaco ni, ‘Aneko ŋata Rwoth owiro gi mo bedo kere.’ ”

¹⁷Daudi owero ywak ajore ri Saulo gi Yonathan.

¹⁸Aka owodho or ni wofonji ji ma Yuda; aka ondikere i kitawo ma Jasar.[1]

¹⁹Wer no kadho ama: I wi tendere ma Isiraili, jotel mawan jotho! Jolweny mawan ma jomiseni jopodho!

²⁰Ikir'ilanga wac me i Gath kosa i yo ma Asikelon. Ikir'imiy mon ma Filistia jowosangala, ikir'imiy nyir pa joma bu Were jowosiemere.

²¹Weyi koth kosa thoyo okir ooy wi got Gilbowa; ndelin mere wobedi abar! Kwot pa jomiseni onindo i wickwot; kwot pa Saulo doko kigoy gi mo.

²²Kwot pa Yonathan oyido otiŋo tho abor pa Saulo oyido ongoye gi wor, turo jomaker, aka neko jokwor.

²³Saulo gi Yonathan merin aka jomare kanyacel i kwo kiri gi i tho; Jodwir loyo otengo, aka jomeni loyo simbwor.

²⁴Mon ma Isiraili goy win ndur ri Saulo Go oruko win gi nangin mafoth m'obokere aka gi thiwino ma zahabu.

²⁵Jolweny ma jomiseni jopodho, oneki jo i lweny Yonathan onindo m'otho i wi tendere.

²⁶Arem rin, omin an Yonathan; oyido ibedo mere paran ma kacunyan! Mar perin ran oyido oasere, oyido oasere loyo kiri mar pa mon.

²⁷Jolweny ma jomiseni jopodho, aka gilweny pajo ojwangere aka bukony.