Read dhopadhola 2 Samwiri 14 Bible Online

2 Samwiri 14 - dhopadhola bible

2 Samwiri 14

¹Onyo Yowab wod pa Zeruya oyido oŋeyo maber nike kere oyido paro kwoŋ Absalom swa

²aka ooro nyatoro moro lwoŋo rigo dhako mariek swa wok i tindi Tekowa. Munyo dhako no otundo, Yowab owaco rigo ni, “Rendere pa ŋata ywak, iruki nangin perin ma ywak, aka ikir'iwire gi mo. Timere pa dhako m'otieko hongo malac swa munyo ywak.

³Aka ikidhi bongi kere t'iwaco rigo gim'anowaci rin.” Kenyo Yowab owaco rigo gima wowaci.

⁴Dheno okidho bongi kere, aka oriere piny i wor to waco ni, “Konyan jadwoŋ!”

⁵Kere openjo go ni, “Teko perin aŋo?” Dheno odwoko ni, “Abedo citho; cworan otho.

⁶Jadwoŋ oyido anitie gi wotan ario, to ndelo acel joero dhaw i sa, aka oyido ongoye ŋata nyalo theko jo; ameno acel oneko omin.

⁷Aka onyo pama jadwoŋ, wade paran je jowire ran, jomito ni amiy jo wodan m'oneko omin ŋey bende woneki go. Ka jotimi gime, aladoŋ m'ongoye nyathi; jolareyo geno paran, aka to joweyo cworan ma bu wode m'ocwok nyinge.”

⁸Kenyo kere odwoko ni, “Dok peco, aka abino kweyo teko perin me.”

⁹Dheno omedere waco ni, “Jadwoŋ, gim'inotim je apuse k'obedi aperin gi peco perin to ri an gi peco paran.”

¹⁰Kere odwoko ni, “Ka ŋatimoro je obwokin, keli go bongan aka doko k'ogeyin kendo.”

¹¹Dheno owaco ni, “Jadwoŋ, mondo kway Rwoth Were perin ŋey wat paran ma mito culo kwor kwoŋ wodan m'oneko omin wokiri wotim banja madwoŋ loyo to neko wodan man.” Kere odwoko ni, “Akwoŋere i nyingi Rwoth makwo ni ongoye gimarac ma bino timere ri wodin.”

¹²To dheno kendo waco ni, “Mondo jadwoŋ, weyi awaci rin gimoro acel kendo.” Kere odwoko go ni, “Luw.”

¹³Dheno owaco ni, “Raŋo itimo gimarac ameno ri ji pa Were? Ikwero wodin won dwoko peco; aka onyo pama in won itieko thumo banja perin gi gima nyaka iwok waco.

¹⁴Wajoje walatho; wacale pi m'okir piny ma doko kinyal coko. Kiri Were kidwoki kwo pa jom'otho, to kere nyalo rango nger ma dwoko ŋat'orwenyo.

¹⁵Onyo riameno jadwoŋ, atoŋa m'omiyo abino pido kodin rupiri ji jobwokan; t'onyo aparo ni kono k'anoluwi kodin, ibino konyan.

¹⁶Aparo ni kere bino winjan to bothan wok i cingi jacwo ma mito reyan gi wodan wok i lowo ma Were omiyo ji pere.

¹⁷Aka aparo ni cikirok perin ran bino gwokan; rupiri kere cale malaika pa Were m'oŋeyo bero gi raco.”

¹⁸Kere odwoko dheno ni, “Akidho penjin gimoro, aka iripo waco ran adieri je.” Dheno odwoko ni, “Penjan jadwoŋ.”

¹⁹Kere openjo go ni, “Itiyere gi Yowab i gigipiny me je?” Dheno odwoko ni, “Paka ikwo, jadwoŋ kere, obedo adieri jadhum perin Yowab am'owaco ran gim'awaci je.

²⁰To go otimo ameno ma tiro wac me je. Jadwoŋ iriek paka malaika pa Were, aka iŋeyo kisi gima timere.”

²¹Rumacen kere owaco ri Yowab ni, “Ayere timo gim'imito. Kadhi idwoki gi Absalom peco.”

²²Yowab oriere piny ruwaŋ kere to bwonere, aka owaco ni, “Were womiyin silwany jadwoŋ! Pama onyo aŋeyo nike iwinjo kodan maber, rupiri imiyan kwac paran.”

²³Ameno Yowab oay, aka okidho Gesur to dwoko gi Absalom i Yerusalem.

²⁴Aka kere k'oyeyo Absalom bedo peco pere. Kere owaco ni, “Akimiti neno Absalom gi waŋan.” Ameno Absalom obedo i ot pere kakende, aka k'oneno ruwaŋ kere.

²⁵I hongo no, oyido ongoye ŋati m'oŋeyere ro ŋono pere paka Absalom; Kwoŋ Absalom oyido ongoye kam'ojony wok i tiende kiri i wiye.

²⁶Ye wiye oyido pek swa aka go oyido lielo dicel kende i oro; ka odongo bedo mapek. Ye wiye oyido kalo kilo ario, k'oor rapim ma cel pa kere.

²⁷Absalom oyido nitie gi wote adek, gi nyare acel m'ilwoŋo ni Tamar, aka oyido obedo nyako maŋon swa.

²⁸Absalom obedo Yerusalem oro adek ma kinen kere.

²⁹Kenyo Absalom odhiro nyatoro lwoŋo Yowab woor go wokidhi woluwi rigo gi kere. To Yowab kwero bino

³⁰Ameno Absalom owaco ri ŋecin pere ni, “Neni, ndelo pa Yowab nitie cegin gi ndelo paran, aka bale[4] dongo iye. Kadhi win wiwaŋ.” Ameno ŋecin pa Absalom jokidho, aka jocwinyo mac i ndelo pa Yowab.

³¹Yowab okidho bongi Absalom peco pere aka openjo go ni, “Raŋo ŋecin perin jocwinyo ndelo paran?”

³²Absalom odwoko go ni, “Rupiri ikwero bino munyo aoro nyatoro lwoŋin. Oyido amitin ikidhi bongi kere ipenji go ran ni, ‘Raŋo awok Gesur t'abino ka? Diber k'oyido adoŋ koro.’ Riameno woyeyan akidhi anen go, aka ka onwaŋ kwoŋan banja, wonekan.”

³³Kenyo Yowab okidho bongi kere aka owaco rigo. Kere ooro nyatoro lwoŋo Absalom, aka munyo Absalom obino, oriere piny ruwaŋ kere; aka kere ojolo go to cwiyo lembe.