Read dhopadhola 2 Samwiri 17 Bible Online

2 Samwiri 17 - dhopadhola bible

2 Samwiri 17

¹I hongo won macek, Ahithofel owaco ri Absalom ni, “Weyi ayer cwo 12,000 aka wor me abino kidho dwaro Daudi.

²Abino monjo go ka go fodi ool aka ongoye gi meni. Go labwok, aka cwo pere je jobino ringo. Abino neko kere kende,

³aka abino dwoko gi cwo pere paka mweha dwoko bongi cwore. Imito neko nyaka jacwo acel; aka ji m'odoŋ je jobino bedo i siem.”

⁴Rieko me osangala Absalom gi jotel ma Isiraili je.

⁵Absalom owaco ni, “Lwoŋ win Husay Jarakit bende wawinji gima go waco.”

⁶Munyo Husay otundo, Absalom openjo go ni, “Me rieko pa Ahithofel ma go otieko miyo wan; watim paka go miyo wan rieko? Ka be, wac riwan gima watim.”

⁷Husay odwoko ni, “Waŋin me rieko ma Ahithofel omiyo kiber.

⁸Iŋeyo paka benin Daudi gi cwo pere jobedo jolweny matek, aka joger pa arara m'okwal nyithindhe. Benin otieko bedo jalweny ma hongo malac, aka kibedi gi cwo pere wor.

⁹Miti kiri pama me go opondo i ŋungu kosa kaman. Tekin Daudi omonji cwo perin, kisi ŋat'owinji bino waco ni go okengila cwo perin.

¹⁰Nyaka kiri cwo ma jomaker, ma cuny gin cale cuny simbwor jolabwok; rupiri kisi nyatoro i Isiraili oŋeyo paka benin obedo jalweny madwoŋ, aka jolweny pere jomaker.

¹¹To rieko paran rin a me, coki Joisiraili je kanyacel wok Dan tundo Berseba, mathoth paka nyingi kwoyo ma thengi nam, aka in won itel jo i lweny.

¹²Walanwaŋo Daudi kama go nitie iye je, to wamonjo go mafodi go k'oŋeyo ni aŋo ma timere. Go kiri gi jolweny pere je jok'oboth.

¹³Ka go oringi to donjo i tindi madwoŋ, ji mawan jobino kelo thondhe to joywayo kore piny milelo. Ongoye tele kad'acel ma bino doŋ kenyo.”

¹⁴Absalom kodi cwo ma Isiraili je jowaco ni, “Rieko pa Husay loyo apa Ahithofel.” Rwoth oyido otieko yiko ni rieko pa Ahithofel wokiri woluwi, ŋey teko wopodhi ri Absalom.

¹⁵Kenyo Husay owaco ri jocway ri Were i wi migam, Zadok gi Abiatha rieko ma go omiyo Absalom gi Joisiraili, kodi rieko ma Ahithofel omiyo.

¹⁶Husay omedo waco ni, “Piyo dhiri win mikwenda ri Daudi pama won me, aka wokiri wonindi i thengi malawa Yordan, to wopor loka kama ji joŋado gine kidho i thim; ŋey okir omaki Daudi gi cwo pere t'ineko jo.”

¹⁷Yonathan gi Ahimaz oyido jokuro i waŋ pi ma Enrogel, woko ma Yerusalem, rupiri oyido jokimiti onen ka jodonjo i tindi madwoŋ. Oyido nitie ŋeca madhako ma omaro kidho aka waco rijo gima timere; aka jo bende jokidho to jowaco ri kere Daudi.

¹⁸To ndelo acel, jayac moro oneno jo aka oosa ri Absalom. Ameno joredo aka jopondo i ot pa jacwo moro i tindi Bahurim. Jalo oyido nitie gi jwom cegin gi peco pere, aka joloro i iye.

¹⁹Cipa jalo okwanyo gimoro to umo gine dhok jwom, aka oyaro i wiye ŋano ŋey nyatoro wokiri woŋey gimoro.

²⁰Jodhum pa Absalom jobino i ot aka jopenjo dhako no ni, “Nikune Ahimaz gi Yonathan?” Go odwoko ni, “Jokalo jwom.” Cwo no jorango jo, aka jok'onwaŋo jo to jogik Yerusalem.

²¹Rumacen munyo jotieko gik, Ahimaz gi Yonathan jowok i jwom aka jokidho to joosa ri Daudi. Jowaco rigo gima Ahithofel ocano rigo, aka jowaco rigo ringo woŋadi malawa.

²²Ameno Daudi gi cwo pere jocako ŋado malawa Yordan, aka munyo piny cot onwaŋo jotieko ŋado.

²³Munyo Ahithofel oneno ni rieko pere obol gicen, opor i wi punda pere to dok i tindi pere. Munyo go otieko yiko wac ma peco pere, odere to tho, aka oyiki go i kaliel pa bamere.

²⁴Kenyo Daudi otundo i tindi Mahanayim, i hongo m'oyido Absalom gi cwo pere jotieko ŋado malawa Yordan.

²⁵Absalom oyido oketho Amasa paka jamituka jolweny, lunjo Yowab. Amasa oyido obedo wod pa jacwo m'ilwoŋo ni Ithira, janono Isimayil; aka min oyido ilwoŋo ni Abigayili, nyar Nahas, aka nyamin Zeruya m'oyido obedo yok Yowab.

²⁶Absalom gi cwo pere joketho kambi pajo i lowo ma Giliad.

²⁷Munyo Daudi otundo i tindi Mahanayim, oromo gi Sobi wod pa Nahas, ma wok i tindi madwoŋ Raba i piny Amon, Makir wod pa Amiel, ma wok i tindi madwoŋ Lodebar, kodi Barzilay Jagiliad ma wok i tindi Rogelim.

²⁸Cwo me oyido jokelo gi nindo, atewe, degi, ŋano, bale, moko ŋano, ŋano m'obul, bijanjalo, ŋor,

²⁹mo kic, mo dhiaŋ gi mo rombo, kodi rombo moro. Jo oyido joŋeyo ni Daudi gi cwo pere kec oyido neko jo, jowinjo riyo, aka oyido jool i sa.