Read dhopadhola 2 Samwiri 21 Bible Online

2 Samwiri 21 - dhopadhola bible

2 Samwiri 21

¹I ndir ma dhum pa Daudi, obedo kec makec swa m'otieko oro adek gipi. Ameno Daudi openjo Rwoth gima mako kwoŋ kec no, aka Rwoth odwoko go ni, “Saulo gi peco pere ama jonek; rupiri Saulo oneko Jogibeon.”

²Ameno kere olwoŋo Jogibeon m'oyido jok'obedo Joisiraili. Jome oyido jobedo kitipa mathin pa Joamor ma Joisiraili oyido jociko kikwonga jo, to Saulo oyido otemo reyo woko jo ro miyirok pere ri Joisiraili gi Yuda.

³Ameno Daudi olwoŋo Jogibeon aka owaco rijo ni, “Aŋo m'anyalo timo riwin? Amito culo kwor ma raco m'otimi riwin, ŋey wibino kelo silwany ri ji pa Rwoth.”

⁴Jodwoko ni, “Dhaw mawan gi peco pa Saulo kinyal cowo gi feza kosa zahabu; aka wakimiti neko Joisiraili moro je.” Daudi openjo jo ni, “Aŋo to ma wiparo ni atim riwin?”

⁵Jodwoko ni, “Saulo oyido omito ni wosika wajoje aka wongoye kwoŋ wan ma wodoŋ makwo i Isiraili.

⁶Riameno miy nyikway go ma cwo abirio i cingi wan, aka wabino ŋawo jo ruwaŋ Rwoth i Gibeya tindi pa Saulo kere ma Rwoth oyero.” Kere odwoko ni, “Abino miyo jo i cingi win.”

⁷To ro kwoŋirok ma Daudi jotimo gi Yonathan i nyingi Rwoth, Daudi k'omiyo jo Mefiboseth wod pa Yonathan aka nyakwar Saulo.

⁸Kere okwanyo Armoni kodi Mefiboseth ma Rizifa nyar Aya onywolo gi Saulo; to bende kwanyo wot Merab nyar Saulo, jabic ma Merab onywolo gi Adiriel wod pa Barzilay m'oyido wok Mehola.

⁹Daudi omiyo jo i cingi Jogibeon, aka joŋawo jo wi got ruwaŋ Rwoth aka jabirio je jotho kenyo. Gime otimere i ndir ma nyaka keco cakere, munyo nyaka icako keco ŋano.

¹⁰Kenyo dhako pa Saulo ma gi thenge Rizipa okwanyo kutiya ma timo rigo tipo wi got kama delkwoŋ nyikway Saulo oyido nitie iye. Go obedo kenyo wok i hongo m'ocak'iye kec tundo i ndir ma koth. I hongo m'odieceŋ go oyido riemo woko winyin, aka wor go riemo woko ogwaŋe madudi jokiri jowocami delkwoŋ jo.

¹¹Munyo Daudi owinjo gima Rizipa oyido timo,

¹²go okidho to kwanyo cokin ma kwoŋ Saulo gi wode Yonathan wok bongi ji ma Yabes iy'adec ma Giliad. Jome oyido jokwalo wok kam'oyido Jofilistia joŋawo iye ndelo m'oneki iye Saulo i got Gilbowa.

¹³Daudi okwanyo cokin ma delkwoŋ Saulo gi Yonathan, aka ocoko cokin ma delkwoŋ cwo abirio m'oyido oneki.

¹⁴Aka oyiki cokin pa Saulo gi Yonathan i kaliel pa Kisi ba Saulo i Zela, iy'adec pa Benyamin, aka otim kisi gima kere owaco. Munyo gime otieko timirok, to nyaka Were dwoko kwayo pajo ri piny pajo.

¹⁵Lweny man otur kendo i dier Jofilistia kodi Joisiraili, aka Daudi gi cwo pere jokidho aka jolwenyo gi Jofilistia; to Daudi ol.

¹⁶Jafilistia m'ogaŋere m'ilwoŋo ni Isibibenob m'oyido otiŋo toŋ ma nyweny m'oyido timo kilo adek g'adec m'otweyo abor manyen oparo nike oyido nyalo neko Daudi.

¹⁷To Abisay wod pa Zeruya okidho to konyo Daudi, omonjo Jafilistia m'ogaŋere no to neko. Kenyo cwo pa Daudi jomiyo go kwoŋirok ni go doko k'okadhi gi jo i lweny. Cwo pa Daudi jowaco rigo ni, “Ibedo geno pa Isiraili, aka wakimiti keŋ in.”

¹⁸Rumacen ma gime, lweny obedo kendo gi Jofilistia i Gob; kenyo ama Sibekay ma wok Husa oneko iye Jafilistia m'ogaŋere m'ilwoŋo ni Safi.

¹⁹Lweny man obedo kendo gi Jofilistia i Gob, aka Elihanan wod pa Yayir ma wok i Bethelehem oneko Goliath ma wok i Gath, m'oyido nitie gi toŋ manitie gi nywol paka nyweny ma cuma ma kwoyirok.

²⁰Lweny man obedo kendo i Gath, kam'oyido nitie Jafilistia m'ogaŋere m'oyido omito lweny swa. Go oyido nitie gi lwet cinge aucel i kisi cinge, kodi lwet tiende aucel i kisi tiende.

²¹Go ocayo Joisiraili, aka Yonathan wod pa Sama omin Daudi oneko go.

²²Jofilistia aŋwen ma jogaŋere me oyido jowok Gath, aka Daudi gi cwo pere joneko jo.