Read dhopadhola 2 Samwiri 24 Bible Online

2 Samwiri 24 - dhopadhola bible

2 Samwiri 24

¹Rwoth doko omako nge gi Isiraili, aka omiyo Daudi kelo kwoŋ jo teko. Rwoth owaco ri Daudi ni, “Kadhi i kwan Joisiraili gi Yuda.”

²Ameno Daudi omiyo Yowab jamituka jolweny pere cik ni, “Kadhi gi jatel perin i nonin ma Isiraili je wok Dan kiri Berseba, aka wikwan ji. Amito ŋeyo welo pajo.”

³To Yowab dwoko kere ni, “Jadwoŋ, weyi Rwoth Were perin womedi welo pa Joisiraili dipiero apar dicel ma jothoth loyo pama, aka weyi i kwo neno go kanyo go timo ameno. To raŋo imito timo gime jadwoŋ.”

⁴To kere miyo Yowab kodi jomituka jolweny pere luwo cik pere. Ameno Yowab gi jomituka jolweny jokidho aka jokwano Joisiraili.

⁵Joŋado malawa Yordan aka joketho kambi i tindi madwoŋ Arower manitie i dier milelo iy'adec ma Gad; aka wok kenyo jokidho yumalo i tindi Yazer.

⁶Kenyo jobino iy'adec ma Giliad, kodi i tindi madwoŋ Kades i lowo pa Johiti. Jobino i tindi Dan, aka wok kenyo jokidho i tindi madwoŋ Sidon.

⁷Kenyo jotundo i tindi madwoŋ m'othok gi cel Tire, kodi i tindin pa Johivi, Jokanan, kiri Berseba, yupiny ma Yuda.

⁸Ameno rumacen ma dwe abuŋwen gi ndelo piero ario jogik i Yerusalem, munyo jotieko woth thoko piny gibe.

⁹Jowaco ri kere welo ji. I Isiraili oyido nitie cwo 800,000 ma jomaker, aka i Yuda oyido nitie cwo 500,000 ma jomaker.

¹⁰To rumacen cuny Daudi ocako ramo munyo go otieko waco ni wokwan ji, aka owaco ri Rwoth ni, “Atieko timo reco madwoŋ swa munyo atimo gime! Mondo cwaki ran; rupiri atimo gimiŋo.”

¹¹Aka munyo Daudi ocew odikin, wac pa Rwoth obino ri jatuci wac Were Gad, jawaci gima bino yuwaŋe pa Daudi ni

¹²“Kadhi i wac ri Daudi ni, ‘Rwoth waco ni, gigipiny adek amiyin; yer acel kwoŋ jo anyal timo rin.’ ”

¹³Ameno Gad obino bongi Daudi aka owaco rigo gima Rwoth oyido owaco, aka openjo go ni, “Kwoŋ gigipiny adek me iyero mene? Oro adek ma kec bino i lowo perin, dwe adek kanyo i ŋweco kwoŋ jokwor perin, kosa ndelo adek ma two nundu i lowo perin? Par kwoŋe aka imiyan radwok m'anoteri ri Rwoth.”

¹⁴Daudi odwoko ni, “Anitie i kidamba madwoŋ swa; weyi wapodhi i cingi Rwoth rupiri ŋono pere dwoŋ, ma wakipodho i cingi nyatoro.”

¹⁵Ameno Rwoth odhiro two nundu kwoŋ Isiraili wok odikin no, tundo sawa ma go oyido oyero; aka ji 70,000 jotho wok Dan tundo kiri Berseba.

¹⁶Munyo malaika pa Rwoth oyido cegin kisika woko Yerusalem, Rwoth owiro paro pere ma miyo ji pere gir'acula aka owaco ri malaika m'oyido neko jo ni, “Oromo, lwogi cingin.” Aka malaika pa Rwoth oyido nitie i kisia pa Arauna, janono pa Yebu.

¹⁷Kenyo Daudi oluwo gi Rwoth munyo oneno malaika m'oyido neko ji, aka owaco ni, “Neni, atimo reco, aka atimo kidakana; to rombo me, aŋo ma jotimo? Weyi cingin, akwayin, wobedi kwoŋan gi ot pa baba.”

¹⁸Ndelo no won Gad okidho bongi Daudi aka owaco rigo ni, “Kadhi malo i kisia pa Arauna, aka igeti ri Rwoth migam.”

¹⁹Daudi oluwo or pa Rwoth aka okidho paka Gad oyido owaco rigo.

²⁰Aka munyo Arauna oŋiyo piny to neno kere gi ŋecin pere jobino yubonge, okidho aka obwonere ri kere munyo kulo wiye piny

²¹aka openjo ni, “Jadwoŋ, raŋo ibino bongi ŋeca perin?” Daudi odwoko ni, “Abino nyewo kisia perin ŋey ageti iye ri Rwoth migam ŋey ji jowobothi thoyamo me.”

²²Kenyo Arauna owaco ri Daudi ni, “Jadwoŋ paran kere, miy Rwoth gimoro je m'imito. Megikwe ee ma waŋo paka cowirok i wi migam; adhere kodi majogi pajo ee ma yen.

²³Me je amiyin kere, aka weyi Rwoth wojol cowirok perin.”

²⁴To kere waco ri Arauna ni, “Be, abino culo kisia gi megikwe. Akibino miyo Rwoth Were paran gim'akicul'iye gimoro.” Ameno Daudi onyewo kisia gi megikwe gi feza piero abic.

²⁵Kenyo Daudi ogeto ri Rwoth migam aka omiyo cowirok awaŋa kodi cowirok ma siem. Ameno Rwoth owinjo kwayo pere, aka thoyamo ojukere i Isiraili.