Read dhopadhola 2 Samwiri 6 Bible Online

2 Samwiri 6 - dhopadhola bible

2 Samwiri 6

¹Daudi doko oyero cwo pere maber loyo ma romo 30,000

²aka otelo jo kadho Bala i Yuda, ŋey jowokeli wok kenyo Kakan ma Cikirok pa Were, m'ilwoŋo gi nyingi Rwoth pa lwak jolweny m'obedo i ker pere malo pa cwec ma jobwombi gin m'ilwoŋo ni Kerubim

³Jotiŋo wok peco pa Abinadab wok i kacowirok, aka joketho i magal manyen. Uza kodi Ahiyo wot Abinadab am'oyido jogweyo magal manyen me

⁴m'oyido otiŋo Kakan ma Cikirok pa Were aka Ahiyo am'oyido otelo wotho yuwiy magal.

⁵Daudi kodi Joisiraili oyido jomielo aka jowero gi meni pajo je. Aka oyido jogoyo tongol, adungu, bunde, nyweny m'irudo kodi seke.

⁶Munyo jotundo i kisia Nacon, thwondhe jocer, aka Uza otelo cinge to geyo Kakan ma Cikirok pa Were.

⁷Nge pa Rwoth oliel kwoŋ Uza aka Were oneko go rupiri otelo cinge to geyo Kakan ma Cikirok pa Were. Uza otho i ŋeti Kakan ma Cikirok pa Were.

⁸Daudi omako nge rupiri Rwoth omiyo Uza gir'acula i nge; aka kabedo no olwoŋi ni Perez Uza.[3]

⁹Daudi olworo Rwoth ndelo no aka openjere ni, “Kakan ma Cikirok pa Rwoth obin nedi bongan!”

¹⁰Ameno go owiro paro pere ma tero Kakan ma Cikirok pa Were i tindi madwoŋ pa Daudi; aka otero i ot pa Obed Edom, ma wok i tindi Gath.

¹¹Kakan ma Cikirok pa Were obedo i ot pa Obed Edom ma dwe adek, aka Rwoth omiyo Obed Edom kodi peco pere je silwany.

¹²Kere Daudi owinjo nike Rwoth oyido omiyo Obed Edom gi peco pere silwany ro Kakan ma Cikirok. Ameno Daudi okadho aka oomo Kakan ma Cikirok pa Were wok peco pa Obed Edom to tero i Yerusalem gi siemirok.

¹³Munyo cwo ma jotiŋo Kakan ma Cikirok pa Rwoth jokalo tiendi jo aucel, Daudi ojuko jo; aka omiyo Rwoth cowirok ma thwon kodi rwath dhiaŋ.

¹⁴Daudi oyido mielo malomalo gi meni pere je ruwaŋ Rwoth; aka oyido otweyo law pa jocway ri Were i wi migam i piere

¹⁵Ameno Daudi kodi Joisiraili je jotero Kakan ma Cikirok kiri Yerusalem gi koko ma kisangala aka oyido jokudho gwara.

¹⁶Munyo jotero Kakan ma Cikirok pa Were i tindi madwoŋ, Mikal, nyar Saulo oleŋo waŋe gi dirisa aka oneno kere Daudi mielo ka por malo ruwaŋ Rwoth to cayo go i cunye.

¹⁷Aka jokelo Kakan ma Cikirok pa Rwoth to joketho i wema ma Daudi oyido ogero rigo; aka Daudi omiyo Rwoth cowirok awaŋa kodi ma siem.

¹⁸Aka munyo Daudi otieko miyo cowirok, omiyo ji silwany i nyingi Rwoth pa lwak jolweny.

¹⁹Daudi opoko ji je, Joisiraili gipi, mon gi cwo, kisi nyatoro, mugat gi muma riŋo abula, gi nyingi vini m'othwo. Kenyo jokedhere aka kisi nyatoro odok peco pere.

²⁰Rumacen munyo Daudi odok peco motho jopeco pere, Mikal owok to bino romo gine aka oŋalo go ni, “Kere ma Isiraili konon olimo dwoŋ. Onyuthere pa jamiŋo ruwaŋ ŋecin pere ma jobedo mon pa jotel pere.”

²¹Daudi odwoko ni, “Oyido amielo ma miyo Rwoth dwoŋ, go m'oyeran makiweno benin gi peco pere; aka okethan jatel pa ji pere Isiraili. Aka alamedere miel ma miyo Rwoth dwoŋ,

²²aka alokere ŋatamiŋ kiri loyo. Inyalo paro nike asisiri, to mon m'iluwo kwoŋ jo no jobino miyan wor.”

²³Aka Mikal nyar Saulo k'onywolo nyithindho ro gime.