Read dhopadhola 2 Samwiri 8 Bible Online

2 Samwiri 8 - dhopadhola bible

2 Samwiri 8

¹Rumacen ma hongo moro, kere Daudi omonjo Jofilistia kendo, aka okengila jo to kelo dhum pajo i gike i lowo no.

²Daudi bende okengila Jomowab; omako jo aka omiyo jo nindo piny i lowo aka oneko j'ario kwoŋ kisi ji adek. Jomowab jolokere ŋecin pere aka joculo go misolo.

³Daudi bende okengila kere ma piny Siria, Hadadeza wod pa Rehob munyo Hadadeza oyido kidho iy'adec ma malawa Yufrete dwoko dhum pere kenyo.

⁴Daudi omako cwo pa Hadadeza 1,700 ma jogwey kayina kodi cwo 20,000 ma jowotho atiendi. Daudi okoyo kayina ma romo cawila 100 aka otoŋo woko tiendi m'odoŋ.

⁵Munyo Josiria m'oyido jonitie Damasiko jodhiro jolweny konyo kere Hadadeza, Daudi omonjo jo aka oneko cwo 22,000.

⁶Aka Daudi oketho kambi ma lweny iy'adec pajo to jolokere ŋecin pere aka joculo go misolo. Rwoth omiyo Daudi loyo lweny kisi kama Daudi okadh'iye.

⁷Daudi omako kwote ma zahabu ma ŋecin pa Hadadeza oyido jotiŋo, aka otero jo i Yerusalem.

⁸Daudi bende okwanyo ywel madit wok Beta gi Berothay, tindin madongo ma Hadadeza oyido dhumo.

⁹Munyo Toi, kere ma Hamath owinjo nike Daudi okengila jolweny pa Hadadeza,

¹⁰odhiro wode Yoram motho Daudi kodi foyo go gi kikengila Hadadeza; m'oyido Toi olwenyo gine dikweth. Yoram otero ri Daudi mic kweth ma feza, zahabu, kodi ywel.

¹¹Kere Daudi omiyo gigipiny me ma lamo Rwoth kanyacel gi feza, kodi zahabu ma go okwanyo wok i piny je ma go oyido dhumo,

¹²Edom, Mowab, Amon, Filistia, kodi Amalek, kodi adec ma gigipiny ma go onyaga wok bongi Hadadeza.

¹³Daudi omedo ŋeyirok munyo odwoko wok i lweny m'oneko iye Joedom 18,000 milelo ma cumbi nwaŋere iye.

¹⁴Aka oketho kambi ma lweny i piny Edom gipi, aka ji ma kenyo jolokere ŋecin pere. Rwoth omiyo Daudi loyo lweny kisi kama Daudi okidh'iye.

¹⁵Daudi odhumo Isiraili paka rom; aka otero ji pere maber aka gi tiro.

¹⁶Yowab wod pa Zeruya am'oyido obedo jamituka jolweny pa Daudi; aka Yehosafat wod pa Ahilud am'oyido obedo jandiko kodi kano kisi gima timere.

¹⁷Zadok wod pa Ahitub, kodi Abimelek wod pa Abiatha am'oyido obedo jocway ri Were i wi migam; aka Seraya oyido obedo jandiko ma kapido.

¹⁸Benaya wod pa Yehoyada oyido obedo jatel pa jokur pa Daudi; aka wot Daudi oyido jobedo jocway ri Were i wi migam.