Read dhopadhola 2 Samwiri 9 Bible Online

2 Samwiri 9 - dhopadhola bible

2 Samwiri 9

¹Ndelo acel, Daudi openjo ni, “Nitie nyatoro ma fodi odoŋ wok i ot pa Saulo? K'inen nitie, amito nyutho go wor ro Yonathan.”

²To nwaŋere ni oyido nitie ŋeca ma peco pa Saulo m'ilwoŋo ni Ziba; aka owaci rigo kidho bongi Daudi. Kere openjo go ni, “In i Ziba?” Ziba odwoko ni, “An Ziba ŋeca perin jadwoŋ.”

³To kere penjo go ni, “Nitie nyatoro ma fodi odoŋ i peco pa Saulo m'anyalo nyutho wor gi kisa paka ndir no akwoŋere i nyingi Were ni alatimo?” Ziba odwoko ni, “Nitie acel kwoŋ wot Yonathan ma fodi kwo; to go oŋol.”

⁴Kere openjo ni, “Go nitie kune?” Ziba odwoko ni, “Go nitie peco pa Makir wod pa Amiel i tindi Lodebar.”

⁵Ameno kere odhiro nyatoro oomo go.

⁶Munyo Mefiboseth wod pa Yonathan aka nyakwar Saulo otundo bongi Daudi, obwonere ruwaŋ Daudi i wor. Daudi owaco rigo ni, “Mefiboseth.” Aka Mefiboseth odwoko ni, “An ŋeca perin jadwoŋ.”

⁷Daudi odwoko ni, “Ikir'ibwoki. Alatimo kodin wor ro benin Yonathan. Abino dwoko rin lowo je m'oyido obedo apa kwarin Saulo; aka wangi ibino cemo kanyacel kodan i meza paran.”

⁸Mefiboseth doko obwonere, aka owaco ri kere ni, “Akiber loyo kada gwok m'otho jadwoŋ! Raŋo itimo ran bero ama?”

⁹Kenyo kere olwoŋo Ziba ŋeca pa Saulo, aka owaco rigo ni, “Amiyo Mefiboseth nyakwar jadwoŋ perin, kisi gim'oyido apa Saulo gi peco pere.

¹⁰In gi wotin, gi ŋecin perin, wibino furo i lowo ma peco pa jadwoŋ perin, to wikelo rijo cemo; to Mefiboseth wangi cemo kanyacel kodan i meza paran.” Ziba oyido nitie gi nyithindho apar g'abic gi ŋecin piero ario.

¹¹Ziba odwoko kere ni, “Alatimo kisi gim'inowaci jadwoŋ.” Ameno Mefiboseth obedo kanyo cemo kanyacel gi kere pa acel kwoŋ wot kere.

¹²Mefiboseth oyido nitie gi wode m'ilwoŋo ni Mika. Ji je ma peco pa Ziba oyido jobedo ŋecin pa Mefiboseth.

¹³Ameno Mefiboseth, m'oyido tiende ario je oŋol, obedo Yerusalem, kanyo cemo kanyacel gi kere.