Read dhopadhola 1 Kerin 10 Bible Online

1 Kerin 10 - dhopadhola bible

1 Kerin 10

¹Nyamicala ma Seba owinjo kwoŋ ŋeyirok pa Solomon aka okidho i Yerusalem temo go gi penji matek.

²Go obino gi kitipa madwoŋ ma jotic pere, gi ŋamin ma jotiŋo gigipiny maŋwe kur, thiwino, kodi zahabu madit. Munyo go gi Solomon joromo, openjo Solomon penji je m'oparo kwoŋe.

³Solomon odwoko penji je, aka ongoye gim'otek rigo tito.

⁴Nyamicala ma Seba owinjo rieko pa Solomon aka oneno peco pere m'ogeto,

⁵cemo m'itoko i meza pere, pecin pa jodhum pere, kitipin pa jotic kodi ŋecin pere kodi nangin pajo ma cale ma joruko, jotic pere, kodi cowirok ma Solomon miyo i Ot pa Were aka cunye okwe.

⁶Nyamicala ma Seba owaco ri Solomon ni, “Gim'awinjo i piny paran ma mako kwoŋ tim perin kodi rieko perin obedo adieri!

⁷To akinyalo yeyo cuka an won abino t'aneno. Aka neni adec mere oyido k'owaci ran. Iriek kalo kama ji jowaco.

⁸Josilwany a ji perin! Josilwany a ŋecin perin me, ma noknok jonitie ruwaŋin aka jonitie gi silwany ma winjo rieko perin.

⁹Rwoth Were perin wopak m'onyutho nger m'osangal'iye kodin to kethin kere, dhumo i nyinge. Kwoŋbedo mar pere ri Isiraili kiwire, okethin bedo kere pajo ŋey inyal kuro cik kodi tiro.”

¹⁰Nyamicala omiyo Solomon mic m'okelo; zahabu ma kalo kilo 4,000 kodi gigipiny maŋwe kur kodi thiwino madit. Ongoye kendo dito ma gigipiny maŋwe kur ma Solomon olimo paka ma nyamicala omiyo go.

¹¹(Aka ŋecin pa kere Hiram kodi kere Solomon ma jokelo zahabu wok Ofir bende jokelo mbawin ma yen m'ilwoŋo ni algum kodi telin ma welo.

¹²Solomon ooro mbawin me ma geto madala ma Ot pa Were kodi ma peco pere, kodi timo adungin kodi tongol ri jower. Nger mbawo ma yen algum no fodi k'oneno kendo tundo kiri konon i piny Yuda.)

¹³Kere Solomon omiyo nyamicala ma Seba kisi gima go okwayo, medo i wi mic man manyakwer m'oyido omiyo go. Kenyo nyamicala odok i Seba gi jotic pere.

¹⁴Kisi oro kere Solomon oyido limo zahabu ma romo kilo 23,000

¹⁵medo i wi misolo wok bongi jomitan, kerin pa Jowarabu kodi jogavana mar'adec ma Isiraili.

¹⁶Solomon otimo kwote malac 200 gi zahabu. Kisi kwot acel otim gi zahabu kilo ma romo abirio.

¹⁷Solomon bende otimo kwote mathindho 300. Kisi kwot acel otim gi zahabu ma romo kilo ario. Kwote me je okethi i Kisika ma lul ma Lebanon.

¹⁸Solomon bende otimo kom ma dhum malac gi tungi liec, aka oum gi zahabu macil.

¹⁹Kom ma dhum oyido nitie gi madalin aucel kiri malo, kodi cal ma simbwor i gike ma kisi madala, joje cal ma simbwor apar g'ario. Yuŋey kom ma dhum oyido nitie cal ma wic thwon, aka kabuti kisi cinge ario oyido nitie cal ma simbwor. Nger kom ma dhum me oyido fodi k'obedo i ker moro je.

²¹Atewe je ma medho oyido otim gi zahabu, kiri g'atewe ma Kisika ma Lul ma Lebanon je otim gi zahabu macil, rupiri i ndir pa Solomon feza oyido ongoye gi cwe.

²²Solomon oyido nitie gi bogi ma mel ma jocewere gi bogi pa Hiram. Dicel i kisi oro adek bogi pere oyido dwoko m'otiŋo zahabu, feza, tungi liec, oŋer ambu, kodi oŋere.

²³Kere Solomon oyido oŋaŋ aka riek loyo kere man je,

²⁴aka piny gibe oyido mito winjo rieko ma Were oyido omiyo go.

²⁵Kisi ŋat'obino neno go kelo rigo mic ma gigipiny m'otimi gi feza, zahabu, nangin, gilweny, gigipiny maŋwe kur, kayina kodi punde. Gime omedere kisi oro.

²⁶Solomon ocoko cawilin kodi cwo ma jogweyo kayina. Oyido nitie cawilin 1,400 kodi cwo ma jogweyo kayina 12,000. Megi okano i Yerusalem, aka m'odoŋ oketho jo i tindin madongo man.

²⁷I ndir ma dhum pa Solomon feza oyido nitie kisi kamoro pa telin, aka yen sida oyido omore pa musikamol ma tiendi tendere i Yuda.

²⁸Aka kayina ma donjo i piny pa Solomon oyido jowok i Misir kodi Kuwe, aka jomitan pere oyido jojolo gi Kuwe i welo moro.

²⁹Oyido ikelo cawilin wok i Misir i welo ma feza 600 kodi kayina i welo ma feza 150 aka jomitan pa Solomon oyido jotero kitana ri kerin pa Johiti kodi kerin ma Siria.