Read dhopadhola 1 Kerin 11 Bible Online

1 Kerin 11 - dhopadhola bible

1 Kerin 11

¹Solomon omito mon jopath kweth. Medo i wi nyar Farawo kere ma Misir, Solomon onywomo mon ma Hiti, mon ma Mowab, mon ma Amon, mon ma Edom, kodi mon ma Sidon.

²Onywomo jo makada nende Rwoth oyido omiyo Joisiraili cik nike jokiri jowonywom kosa jowonywomere gi jo, rupiri oyido jonyalo miyo Joisiraili lamo werin man.

³Solomon onywomo mon 700 aka oyido nitie gi mon man woko 300. Jomiyo go wire woko kwoŋ Were.

⁴Kole munyo Solomon oti mon pere oyido jomiyo go lamo werin man. Solomon oyido ongoye gi adieri ri Rwoth Were pere paka bamere Daudi oyido nitie.

⁵Olamo were madhako Asitate ma Sidon, kodi were Molek kidakana ma Amon.

⁶Ameno Solomon otimo reco ruwaŋ Rwoth aka k'obedo gi adieri paka bamere Daudi otimo.

⁷Kenyo Solomon ogeto wi got yuwok ceŋ ma Yerusalem kalamo were Kemos, kidakana ma Mowab, kodi ri Molek kidakana ma Amon.

⁸Go bende ogeto kalamo kisi kama mon jopath pere oyido jowaŋo iye buban to jomiyo cowirok ri werin pajo.

⁹Aka Rwoth omako nge gi Solomon rupiri cunye oyido ocile kwoŋ Rwoth, Were pa Isiraili, m'omenyere rigo dirio,

¹⁰to miyo go or kwoŋ gime, nike wokiri woluwi werin man; to k'okuro gima Rwoth omiyo go or ni wotimo.

¹¹Riameno Rwoth owaco ri Solomon ni, “Paka me oyido obedo paro perin aka ikikuro cikirok paran kodi cik paran m'amiyin, adieri abino yeco woko ker perin wok bongin aka abino miyo ŋeca perin.

¹²To kucel ro Daudi benin, Akibino timo i hongo perin, t'abino yeco wok i cingi wodin.

¹³To kad'ameno, akibino yeco woko ker gibe; t'abino miyo nono acel ri wodin, ro Daudi ŋeca paran kodi ro Yerusalem m'atieko yero.”

¹⁴Ameno Rwoth omiyo Hadad, wok i ot ma ker Edom gwenyirok gi Solomon.

¹⁵Kole munyo Daudi omako Edom, Yowab jamituka jolweny pere oyido okidho kenyo yiko jom'otho, Daudi kodi cwo pere jodoŋ i Edom ma dwe aucel, aka i hongo no joneko kisi jacwo i Edom,

¹⁷to Hadad oringo i Misir, kanyacel gi Joedom moro m'oyido ŋecin pa bamere, Hadad oyido fodi thin.

¹⁸Joeye Midian to jokidho i Paran, kama cwo moro man joriwere gi jo. Kenyo jokidho i Misir bongi Farawo, m'omiyo Hadad lowo kodi ot aka omiyo go cemo.

¹⁹Hadad onwaŋo wor ruwaŋ Farawo, aka Farawo omiyo go ywore nyamin Tafenes cipa Farawo i nywomirok.

²⁰Nyamin Tafenes onywolo ri Hadad wode, aka Tafenes ama opido gi peco pa kere paka acel kwoŋ wot kere.

²¹To munyo Hadad owinjo gi Misir nike Daudi otho aka kiri Yowab jamituka jolweny bende otho, Hadad owaco ri Farawo ni, “Weyi adoki i piny paran won.”

²²Farawo openjo go ni, “Aŋo m'ingoye gine bongan ma idwaro dok i piny perin won?” Hadad odwoko ni, “Weyan nyaka akadhi.” Aka go odok i piny pere. Paka kere ma Edom, Hadad oyido obedo jakwor pa Isiraili marac makec.

²³Were bende omiyo Rezon wod pa Eliada gwenyirok gi Solomon. Rezon oyido oringo kwoŋ jadwoŋ pere, kere Hadadeza ma Zoba,

²⁴to lokere jatel pa ji ma bukony. (Gime otimere rumacen ma Daudi kikengila Hadadeza aka oyido othumo jokony pa Siria.) Rezon gi cwo pere jokidho to jobedo i Damasiko, kama cwo pere joloko go kere ma Siria.

²⁵Rezon oyido obedo jakwor pa Isiraili i hongo pa Solomon.

²⁶Jacwo man m'owire ri Solomon obedo acel kwoŋ jodhum pere, Yerobowam wod pa Nebat, ma wok Zereda i Efrayim. Yokimere oyido obedo citho Zeruya.

²⁷Me apaka otimere. Solomon oyido poŋo lowo ma yuthenge ma yuwok ceŋ ma Yerusalem aka yiko kor ot ma tindi madwoŋ.

²⁸Yerobowam oyido obedo jayac manitie gi nyalo, aka munyo Solomon oneno nger ma otiyo matek, oketho go telo jotic mar'arom iy'adec pa nonin pa Manase kodi Efrayim.

²⁹Ndelo acel, munyo Yerobowam oyido wotho wok i Yerusalem, jatuci wac Were Ahija ma wok Silo, oromo gine kende i yo kam'othangere.

³⁰Kenyo Ahija olunyo kanzu manyen ma go oyido oruko, oyeco to wok oselin apar g'ario,

³¹aka owaco ri Yerobowam ni, “Kwany oselin apar rin, rupiri Rwoth, Were pa Isiraili waco rin ni, ‘Akidho kwanyo woko ker kwoŋ Solomon, aka abino miyin nonin apar.

³²Solomon bino kuro nono acel ro ŋeca paran Daudi aka ro Yerusalem, tindi madwoŋ m'atieko yero bedo aparan won wok i lowo ma Isiraili gipi.

³³Akidho timo gime rupiri Solomon okweran aka olamo werin pa jopath, Asitate, were madhako ma Sidon, Kemos, were ma Mowab, kodi Molek were ma Amon. Solomon k'owinjan, otimo komo, aka k'okuro cik paran kodi Or paran paka bamere Daudi otimo.

³⁴T'akibino kwanyo ker je kwoŋ Solomon, aka abino kuro go i dwoŋ kafodi go kwo. Gime abino timo ro ŋeca paran Daudi, ma yero aka m'oluwo cik paran kodi Or paran.

³⁵Abino kwanyo woko ker kwoŋ wod pa Solomon aka abino miyin nonin apar,

³⁶t'abino weyo wod pa Solomon kuro nono acel, ŋey noknok abedi gi nyakwar Daudi ma dhumo i Yerusalem, tindi madwoŋ m'ayero wolaman'iye.

³⁷Yerobowam, abino lokin kere ma Isiraili, aka ibino dhumo adec je m'inomiti.

³⁸K'inowinji gim'anomiyin or timo je, wotho i yo paran, t'itimo gim'otire ruwaŋan kodi kuro cik paran gi Or paran, paka Daudi ŋeca paran otimo, Abino bedo kodin noknok. Abino lokin kere ma Isiraili aka abino neno nike nyikwayin jodhumo rumacen ma in, paka atimo ri Daudi.

³⁹Ro reco pa Solomon Abino miyo nyikway Daudi gir'acula, to ki ma hongo je.’ ”

⁴⁰Aka Solomon otemo neko Yerobowam, to Yerobowam okwale to kidho bongi Sisak kere ma Misir aka obedo kenyo cuka Solomon otho.

⁴¹Tim pa Solomon je gi gima go otimo je, kodi rieko pere je ondiki i kitawo ma tim pa Solomon.

⁴²Solomon odhumo Isiraili gipi gi Yerusalem ma oro piero aŋwen.

⁴³Otho aka oyiki go i tindi madwoŋ pa Daudi, aka wode Rehobowam olunjo go paka kere.