Read dhopadhola 1 Kerin 12 Bible Online

1 Kerin 12 - dhopadhola bible

1 Kerin 12

¹Rehobowam okadho i Sekem, kole Joisiraili je oyido jobino kenyo ketho go kere.

²Munyo Yerobowam wod Nebat owinjo (oyido go fodi nitie i Misir, kama go oyido oring'iye kwoŋ kere Solomon) odwoko wok i Misir.

³Ji ma nonin ma yumalo jooro wolwoŋi Yerobowam, aka jokidho gi go bongi Rehobowam to jowaco rigo ni,

⁴“Benin Solomon ojengo bieto mapek kwoŋ wan. K'inoloki bieto me masew t'iloko kwo mayot riwan, walatic rin.”

⁵Rehobowam odwoko jo ni, “Dwoki win ka ndelo adek orumo, alamiyo win radwok.” Ameno to jokadho.

⁶Kenyo Kere Rehobowam openjo jodongo m'oyido jotiyo paka jomic rieko pa Solomon ni, “Wimiyan rieko aŋo ma dwoko ji me?”

⁷Aka jodwoko go ni, “K'ibedo gi wor ri jome t'isangala jo, luw gi jo wac maber, aka jolatic rin noknok gi wor.”

⁸To Rehobowam kwero rieko pa jodongo ma jomiyo go, to kadho bongi yac ma jobedo muworo pere, aka m'oyido onyo jobedo jomic rieko pere.

⁹Openjo jo ni, “Wimiyan rieko timo aŋo? Aŋo m'adwoki ji ma jokwayan loko bieto pajo masew?”

¹⁰Jodwoko go ni, “Me a gim'iripo waco rijo ni, ‘Cingan manyako dinywol loyo pier baba!

¹¹Baba oketho bieto mapek kwoŋ win, to alaloko mapek loyo. Go ocwado win g'adasa to alacwado win gi luth kayina!’”

¹²Ameno Yerobowam gi ji je jobino bongi Rehobowam i ndelo mar'adek, paka kere Rehobowam oyido owaco rijo.

¹³Kere oweyo rieko ma jodongo jomiyo go aka oluwo gi jo gi gero

¹⁴paka yac jomiyo go rieko. Go owaco ni, “Baba oketho bieto mapek kwoŋ win, to alaloko jo mapek loyo. Baba ocwado win g'adasa, to alacwado win gi luth kayina!”

¹⁵Ameno kere k'owinjo ji; kole oyido obedo mito pa Rwoth kelo gima go oyido owaco wotundi i kare ri Yerobowam wod pa Nebat luwo bongi jatuci wac Were Ahija ma wok Silo. Meno am'omiyo kere k'owinjo ji.

¹⁶Aka munyo ji je joneno nike kere k'owinjo jo, jodwoko kere ni, “Adec aŋo ma wanitie gine i Daudi? Wangoye gi gir'alunja i wod pa Yese. Joisiraili, wadok win peco! Weyi Rehobowam won wokure!” Ameno ji jodok i wema pajo,

¹⁷aka joweyo Rehobowam paka kere pa ji m'oyido jobedo iy'adec ma Yuda kende.

¹⁸Kenyo kere Rehobowam ooro Adoram, m'oyido telo jotic gi mbaka, kadho bongi Joisiraili, to jogoyo go gi telin to tho. Aka kere Rehobowam oidho cawila pere to ringo i Yerusalem.

¹⁹Wok i hongo no kiri konon me, ker ma yumalo ma Isiraili jobedo kanyo jolwenyo gi ker pa Daudi.

²⁰Munyo Joisiraili jowinjo nike Yerobowam odwoko wok i Misir, jolwoŋo go i romo pa ji aka joketho go kere ma Isiraili. Nyaka jonono pa Yuda ama jodoŋ munyo joworo nyikway Daudi.

²¹Munyo Rehobowam otundo i Yerusalem, olwoŋo kanyacel jolweny ma jober loyo wok i nono pa Yuda gi Benyamin ma romo 180,000. Go oyido mito lweny ŋey wodwoki dhum pere kwoŋ nonin ma yumalo ma Isiraili.

²²To Rwoth waco ri Semaya jatuci wac Were ni,

²³“Waci ri Rehobowam, wod pa Solomon, gi jonono pa Yuda kodi jonono pa Benyamin, kodi ji je ni,

²⁴‘Wikiri wimonji wutmin win won, Isiraili. Dok win peco wijoje. Gim'otimere obedo mito paran.’ ” Joje jowinjo cik pa Rwoth aka jok'olwenyo gi Yerobowam.

²⁵Kere Yerobowam ma Isiraili ogeto tindi Sekem i piny matendere tendere ma Efrayim aka obedo kenyo ma hongo moro. Kenyo oeye to kidho geto tindi Penuel.

²⁶Aka Yerobowam owaco i cunye ni, “Nger ma gigipiny nitie i iye pama me, ka ji jokidhi Yerusalem miyo Rwoth cowirok i Ot pa Were kenyo, jobino cako woro kere Rehobowam ma Yuda to jonekan.”

²⁸Munyo otieko paro kwoŋe, otimo roci ario gi zahabu aka owaco ri ji pere ni, “Noknok oyido wikidho i Yerusalem kamabor lamo. Joisiraili, werin mewin ee ka ma jowodho win wok i Misir.”

²⁹Oketho roci m'otimi gi zahabu acel i Bethel kodi acel i Dan.

³⁰Aka gime olokere reco, kole ji oyido jokidho lamo i Bethel kodi i Dan.

³¹Yerobowam bende ogeto kalamo i wi riete, aka oyero jocway ri Were i wi migam wok i nonin ma jok'obedo Jolevi.

³²Yerobowam bende oketho kalima manyadini k'apar g'abic i dwe mar'aboro paka kalima m'oyido nitie i Yuda. I wi migam ma Bethel omiyo cowirok ri roci m'otimi gi zahabu, aka oketho kenyo jocway ri Were i wi migam tiyo i kalamo ma go oyido ogeto.

³³Aka k'apar g'abic i dwe mar'aboro, ndelo ma go won oketho, okidho i Bethel to miyo cowirok i wi migam ma timo kalima ma go oyido oketho ri ji.