Read dhopadhola 1 Kerin 13 Bible Online

1 Kerin 13 - dhopadhola bible

1 Kerin 13

¹Panen, jacwo pa Were obino wok i Yuda luwo i cik pa Rwoth to kidho i Bethel. Yerobowam oyido ocungo cegin gi migam miyo cowirok.

²Luwo kwoŋ cik pa Rwoth jatuci wac Were okwedo migam ka waco ama: “A migam, migam, me a gima Rwoth waco; nyathi ma nyinge ibino lwoŋo ni Yosia ibino nywolo i peco pa Daudi. Go bino thumo kwoŋin jocway ri Were i wi migam ma jotiyo i migam manyakafir ma jomiyo cowirok i wiyin, aka go bino waŋo cokin ji i wiyin.

³Migam me bino tur piny, aka buru ma wiye ibino ywoyo. Kenyo ibino ŋeyo nike Rwoth oluwo luwo i an.”

⁴Munyo kere Yerobowam owinjo gime, ocimo go aka owodho or ni, “Maki win jalo!” Aka nyaŋinya omako cingi Yerobowam dicel ŋey k'onyalo dolok.

⁵Migam bende otur piny, aka buru oywore piny paka jatuci wac Were oyido owaco i nyingi Rwoth.

⁶Kere Yerobowam owaco ri jatuci wac Were ni, “Mondo kway ran Rwoth, Were perin, aka ikway go wobothi cingan!” Jatuci wac Were okwayo aka cingi kere obothi.

⁷Kenyo kere owaco ri jatuci wac Were ni, “Biye kodan peco aka inwaŋ gir'acama. Abino miyin kemba ro gim'itimo.”

⁸Jatuci wac Were odwoko kere ni, “Makada nende inomiyan adec ma lim perin, akibino kadho kodin aka akibino cemo kanyacel kodin.

⁹Kole ameno apaka Rwoth omiyan or munyo waco ni, ‘Ikir'icam mugat kosa imadhi pi, kosa idok peco luwo i royo m'ibino gine.’ ”

¹⁰Ameno go k'oluwo i yo ma go obino gine, aka oluwo i yo man.

¹¹Onyo oyido nitie jatuci wac Were m'oti i Bethel. Aka wote jobino to jowaco rigo gimoro je ma jatuci wac Were ma wok Yuda otimo i Bethel ndelo no kodi gim'owaco ri kere Yerobowam.

¹²Aka bajo openjo ni, “Go oluwo i yo mene?” Aka wote jonyutho go yo

¹³aka owaco rijo tweyo rigo punda pere. Jotimo ameno, aka ogweyo

¹⁴to luwo jatuci wac Were ma wok Yuda aka onwaŋo go obedo i tiendi olwa. Go openjo ni, “Iŋat'ibedo jatuci Were m'owok Yuda?” Jalo odwoko ni, “Abedo go.”

¹⁵Kenyo owaco rigo ni, “Biye kodan peco aka icami mugat.”

¹⁶To jatuci wac Were ma wok Yuda dwoko ni, “Akinyali dok peco kodin, kosa yeyin ijolan, kosa camo mugat, kosa madho gimoro je kodin ka,

¹⁷rupiri Rwoth omiyan or nike akir'acem kosa amadhi gimoro, aka akir'adoki peco luwo i yo ma bino gine.”

¹⁸Kenyo jatuci wac Were m'oti ma wok i Bethel owaco rigo ni, “An bende, abedo jatuci wac Were paka in, aka luwo i cik pa Rwoth malaika owaco ran nike aterin peco kodan aka ajolin.” To jatuci wac Were m'oti oyido twodo.

¹⁹Ameno jatuci wac Were ma wok Yuda odok peco gi jatuci wac Were m'oti aka ocemo kanyacel gi go.

²⁰Aka munyo jobedo i meza, wac pa Rwoth obino ri jatuci wac Were m'oti,

²¹aka oywaki ri jatuci wac Were ma wok i Yuda ni, “Rwoth waco nike ikiwinjo go aka ikitimo gima go omiyin cik timo.

²²Kwanyo woko, igiki t'icemo i kabedo m'amiyin cik nike ikir'icem'iye. Ro gime ibino nekin, aka delkwoŋin k'oyik i kaliel ma thuwin.”

²³Rumacen munyo jotieko cemo, jatuci wac Were m'oti otweyo punda ri jatuci wac Were ma wok i Yuda,

²⁴aka go okadho. I yo, simbwor oromo gine to neko go. Delkwoŋe oriere i yo, aka punda gi simbwor jocungo i thenge.

²⁵Cwo moro oyido joluwo aka joneno del i yo, gi simbwor ocungo cegin. Jomedere i Bethel aka jowaco gima joneno.

²⁶Aka munyo jatuci wac Were m'oti owinjo, owaco ni, “Meno jatuci wac Were ma k'owinjo cik pa Rwoth! Aka Rwoth odhiro simbwor monjo gi neko go, paka Rwoth owaco nike latimo.”

²⁷Kenyo owaco ri wote ni, “Tweyi ran win punda paran.” Aka jotimo ameno,

²⁸aka go okidho to nwaŋo delkwoŋ jatuci wac Were oriere i yo, gi punda kodi simbwor fodi jocungo kenyo. Simbwor oyido k'ocamo del kosa omonjo punda.

²⁹Jatuci wac Were m'oti odimo del, oketho i wi punda, aka odwoko gine i Bethel ywako gi yiko.

³⁰Aka oyiko i kaliel ma peco pere won, aka go gi wote joywako, ka jowaco ni, “A omin an, omin an!”

³¹Rumacen ma yikirok, jatuci wac Were owaco ri wote ni, “K'atho, yikan win i kaliel me aka wipiel delkwoŋan cegin g'apere.

³²Wac ma go owaco luwo i cik pa Rwoth kwoŋ migam ma Bethel gi kalamo je i tindin ma Samaria adieri bino tundo i kare.”

³³Rumacen ma gime Yerobowam k'owire kwoŋ reco pere, to omedere yero jocway ri Were i wi migam wok kwoŋ pecin je tiyo i migam ma go oyido ogeto. Oruko kisi ŋat'oyido mito bedo jacway ri Were i wi migam.

³⁴Reco me i thenge pere okelo kisika gi reyo ker pere.