Read dhopadhola 1 Kerin 16 Bible Online

1 Kerin 16 - dhopadhola bible

1 Kerin 16

¹Rwoth oluwo gi jatuci wac Were Yehu wod pa Hanan aka omiyo go mikwenda me ri Basa:

²“Oyido isisiri, t'akethin kere pa ji paran Isiraili, t'onyo pama itieko timo reco paka Yerobowam aka imiyo ji paran timo reco. Reco pajo okwinyo nge paran,

³aka ameno abino reyin gi peco perin je, paka atimo ri Yerobowam.

⁴Nyatoro moro je ma peco perin m'otho i tindi madwoŋ gwokere jobino camo delkwoŋe, aka ma jotho kam'othangere acut jobino camo delkwoŋe.”

⁵Giman je ma Basa otimo ondiki i kitawo ma kigana ma mako kwoŋ kerin je ma Isiraili.

⁶Basa otho aka oyiki go i Tirisa, aka wode m'ilwoŋo ni Ela olunjo go paka kere.

⁷Mikwenda pa Rwoth ma Rwoth omiyo jatuci wac Were Yehu kwoŋ Basa gi peco bedo rupiri Basa otimo reco ruwaŋ Rwoth. Basa okwinyo nge pa Rwoth ki kwoŋbedo ni oyido otimo reco paka kere Yerobowam bende otimo, to bende kwoŋbedo oneko ji ma peco pa Yerobowam je.

⁸I oro ma piero ario g'aucel ma dhum pa kere Asa ma Yuda, Ela wod pa Basa obedo kere ma Isiraili, aka odhumo ma oro ario.

⁹Zimiri, acel kwoŋ jodhum pa Ela m'oyido telo adec ma cawilin ocamo rigo sereko. Ndelo acel, munyo Ela oyido medho i peco pa Arisa, m'oyido jatel ma cel pa kere i Tirisa,

¹⁰Zimiri odonjo i ot, oneko Ela, to lunjo go paka kere. Gime otimere i oro ma piero ario g'abirio ma dhum pa kere Asa ma Yuda.

¹¹Tekin Zimiri bedo kere, oneko ji ma peco pa Basa je. Kisi wat ma jacwo kosa merin oneki.

¹²Ameno Zimiri oneko ji ma peco pa Basa je paka Rwoth oyido owaco luwo i jatuci wac Were Yehu.

¹³Basa kodi wode Ela jokwinyo nge pa Rwoth, Were pa Isiraili kwoŋbedo jolamo cal to jomiyo Joisiraili timo reco.

¹⁴Giman je ma Ela otimo ondiki i kitawo ma kigana ma mako kwoŋ kerin ma Isiraili.

¹⁵I oro ma piero ario g'abirio ma dhum pa Asa kere ma Yuda, Zimiri odhumo Isiraili gi Tirisa ma oro abirio. Onyo jolweny pa Isiraili oyido jomako tindi madwoŋ Gibethon i Filistia,

¹⁶aka munyo jowinjo nike Zimiri oyido ocamo sereko ri kere Ela to neko, kenyo joketho jamituka jolweny pajo Omiri kere ma Isiraili.

¹⁷Omiri gi jolweny pere joeye i Gibethon aka jokidho to jomako Tirisa.

¹⁸Munyo Zimiri oneno nike omaki tindi madwoŋ, okidho kama tek ma cel pa kere to cwinyo mac aka otho i mac.

¹⁹Gime otimere kwoŋbedo otimo reco ruwaŋ Rwoth. Paka Yerobowam go bende omiyo Joisiraili timo reco ruwaŋ Rwoth.

²⁰Giman je ma Zimiri otimo ondiki i kitawo ma kigana ma mako kwoŋ kerin ma Isiraili.

²¹Kenyo Joisiraili oyido jotiakere dirio. Ji man oyido jomito Tibini wod pa Ginathi wobedi kere, aka ji man oyido jomito Omiri.

²²I cowe mere ji m'oyido jomito Omiri joloyo. Tibini otho, aka Omiri obedo kere.

²³Ameno i oro ma piero adek g'acel ma dhum pa Asa kere ma Yuda, Omiri obedo kere ma Isiraili, aka odhumo ma oro apar g'ario. I cakirok Omiri odhumo gi Tirisa ma oro aucel.

²⁴Omiri onyewo tendere ma Samaria gi feza 6,000 wok bongi jacwo m'ilwoŋo ni Sema. Omiri ogeto tendere no, ogeto tindi kenyo aka ocwoko i nyingi Sema m'oyido won mere ni Samaria.

²⁵Omiri otimo reco ruwaŋ Rwoth loyo kerin je ma jopen dhumo rigo.

²⁶Paka Yerobowam, go okwinyo nge pa Rwoth, Were pa Isiraili gi reco m'otimo kodi miyo Joisiraili bende timo reco kodi lamo cal.

²⁷Giman je ma Omiri otimo ondiki i kitawo ma kigana ma mako kwoŋ kerin je ma Isiraili.

²⁸Kere Omiri otho aka oyiki go i Samaria, to wode m'ilwoŋo ni Ahab lunjo go paka kere.

²⁹I oro ma piero adek g'aboro ma dhum pa Asa kere ma Yuda, Ahab wod pa Omiri obedo kere ma Isiraili, aka odhumo ma oro piero ario g'ario i Samaria.

³⁰Ahab otimo reco ruwaŋ Rwoth loyo kerin je ma jopen dhumo rigo.

³¹K'oromo go timo reco paka Yerobowam, to Ahab bende omedere to nywomo Yezebel nyar kere Ethibal ma Sidon to lamo Bal.

³²Ahab ogeto ri Bal ot kodi migam i Samaria.

³³Ahab bende ogeto cal pa were madhako Asera. Otimo gigipiny madit m'okwinyo nge pa Rwoth loyo kerin je ma jopen dhumo rigo i Isiraili.

³⁴I hongo ma dhum pere Hiyel ma wok i Bethel ogeto Yeriko kende. Paka Rwoth oyido owaco luwo i Yosuwa wod pa Nun, wod pa Hiyel makayo Abiram otho munyo ogero kindi Yeriko, aka wode mathin Segub otho munyo ogeto waŋkac.