Read dhopadhola 1 Kerin 19 Bible Online

1 Kerin 19 - dhopadhola bible

1 Kerin 19

¹Ahab owaco ri Yezebel gima Elia otimo je, kodi nger ma oneko iye jotuci wac were pa Bal.

²Kenyo Yezebel ooro jamikwenda bongi Elia gi mikwenda ni, “Weyi werin jowonekan k'inen tundo sawa me dikin an bende akitimo rin gimoro acel m'itimo ri jotuci wac were pa Bal.”

³Elia obedo gi lworo, aka oringo ri kwo pere. Elia okadho i Berseba i piny Yuda aka oweyo ŋeca pere kenyo.

⁴Elia won owotho ndelo gipi to kidho i thim, aka obino to bedo piny i tiendi yath moro to kwayo ni, “Onyo oasere Rwoth, ter kwo paran, kole an bende anyalo tho.”

⁵Elia onindo piny i tiendi yath aka nindo okwalo go. Malaika obino to mulo go aka owaco rigo ni, “Cew icemi.”

⁶Elia oŋiyo to neno yuwiye mugat kodi pi iy'agwata, aka ocemo to madho pi to doko nindo.

⁷Malaika pa Rwoth odwoko to cewo go kendo aka owaco ni, “Ay icem, kosa woth bino bedo rin mabor.”

⁸Elia oay to cemo to madho pi, aka olimo meni m'oromo go woth ma ndelo piero aŋwen kidho i got maleŋ Sinai.

⁹Kenyo odonjo i ŋungu nindo wor. Rwoth openjo go ni, “Elia itimo aŋo ka?”

¹⁰Elia odwoko ni, “Noknok atiyo rin kende Rwoth. To neni Joisiraili joturo cikirok pajo kodin, joturo piny migam, to joneko jotuci wac Were perin je. An kendan aŋat'adoŋ, aka jorango nekan bende.”

¹¹Rwoth owaco ri Elia ni, “Wok woko icungi ruwaŋan wi got.” Kenyo Rwoth oluwo to dhiro koyo ma nigi derino m'obaro gote to kedho woko, to Rwoth oyido ongoye i koyo. Koyo okwe to musisi yengo piny, to Rwoth oyido ongoye i musisi.

¹²Rumacen ma musisi mac oliel, to Rwoth oyido ongoye i mac. Aka rumacen ma mac dwondi jo m'ofoth owinjere.

¹³Munyo Elia owinjo, oumo waŋe gi kanzu pere to wok woko cungo i dhiot ma ŋungu. Kenyo dwondi nyatoro openjo Elia ni, “Itimo aŋo ka?”

¹⁴Elia odwoko ni, “Rwoth Were Majameni je, noknok atiyo rin, to Joisiraili joturo cikirok pajo kodin, joturo piny migam, to neko jotuci wac Were perin je. An kendan aŋat'adoŋ, aka jorango nekan bende.”

¹⁵Rwoth owaco ri Elia ni, “Gik Damasiko, aka ka itundo, wiri Hazael wobedi kere ma Siria,

¹⁶wiri Yehu wod pa Nimisi wobedi kere ma Isiraili, aka i wiri Elisa wod pa Safat ma wok Abelmehola wolunjin paka jatuci wac Were.

¹⁷Ŋat'obothi abor pa Hazael, Yehu bino neko, aka ŋat'obothi abor pa Yehu Elisa bino neko.

¹⁸Kucel abino koyo ji 7,000 makwo i Isiraili. Jono je ma fodi jok'oguro congi gin ri Bal kosa jok'ocwiyo lembi cal pa Bal.”

¹⁹Ameno Elia owok kenyo aka onwaŋo Elisa wod pa Safat furo gi megikwe i kitipin apar g'ario yuwiye, aka go oyido furo gi ma cen. Elia olunyo kanzu pere to bolo kwoŋ Elisa.

²⁰Elisa oweyo megikwe pere to luwo Elia gi ŋwec aka owaco rigo ni, “Weyi kudho asewila baba kodi mama aka ŋey aluwin.” Elia odwoko ni, “Gik kendo manago aŋo m'atimo rin?”

²¹Kenyo Elisa okadho to thumo megikwe pere, otedo riŋo gi yen majogi, aka opoko ji to jocamo. Kenyo Elisa oay to luwo Elia.