Read dhopadhola 1 Kerin 2 Bible Online

1 Kerin 2 - dhopadhola bible

1 Kerin 2

¹Munyo ndelo pa Daudi ma tho ocore cegin, olwoŋo wode Solomon to miyo go fonji pere macowe, ka waco ama:

²“Acegin tho. Bedi matek aka m'imiyere,

³aka tim gima Rwoth Were perin miyin cik timo. Kur cik pere gi Or pere je paka ondikere i cik pa Musa, ŋey kisi kam'inokidh'iye kisi gim'inotimi wokidhi maber rin,

⁴ŋey Rwoth wokur cikirok pere m'owaco kwoŋan ni, ‘Ka wotin jokur yo pajo, wotho ruwaŋan g'adieri gi cuny gin je kodi adundo pajo je, jobino dhumo Isiraili.’ ”

⁵ “Giman kendo, iŋeyo bende gima Yowab wod pa Zeruya otimo ran gi neko jomituka jolweny pa Joisiraili ario, Abuner wod pa Ner kodi Amasa wod pa Yether. Ipoyo nger m'oneko iye jo i hongo ma siem iculo kwor ro ji ma joneko i lweny. Go oneko cwo m'oyido jongoye gi banja aka onyo pama acandere ro gima go otimo.

⁶Iŋeyo gir'atima, ikiripi weyo go wotho i siem i tiyo pere.”

⁷ “To nyuthi wor ri wot Barzilay ma wok Giliad aka ikwonga jo, rupiri jonyuthan wor munyo oyido aŋweco kwoŋ omin in Absalom.”

⁸ “Aka nitie bende Simey wod pa Gera, janono pa Benyamin ma wok i tindi Bahurim. Go okwoŋan matek swa i ndelo m'akidho i Mahanayim, to munyo oromo kodan i jwom Yordan, amiyo go or paran i nyingi Rwoth nike akibino neko go.

⁹To ikir'iwey go wokadhi m'ongoye gir'acula. Iŋeyo gir'atima, aka iripo neno nike oneki go.”

¹⁰Daudi otho aka oyiki go i tindi madwoŋ.

¹¹Daudi obedo kere ma Isiraili ma oro piero aŋwen. Odhumo ma oro abirio i Hebron kodi oro piero adek g'adek i Yerusalem.

¹²Solomon olunjo bamere Daudi paka kere, aka ker pere ocungo matek.

¹³Kenyo Adoniya wod pa Hagith obino bongi Bathseba yok Solomon. Aka Bathseba openjo ni, “Me wendo ma siem?” Adoniya odwoko ni, “Ey.”

¹⁴Aka Adoniya owaco kendo ni, “Anitie gi gim'amito waco rin.” Bathseba odwoko ni, “Waci.”

¹⁵Adoniya owaco ni, “Iŋeyo paka aŋat'oyido aripo bedo kere aka kisi nyatoro i Isiraili oyido geno an dhumo. To k'otimere amanago, aka omin an am'obedo kere ro mito pa Rwoth.

¹⁶Aka onyo anitie gi kwac acel; mondo ikir'iceran.” Bathseba odwoko ni, “Waci.”

¹⁷Aka Adoniya owaco ni, “Kway kere Solomon womiyan Abisagi dhako Jasunem wobedi dhako paran aŋeyo nike go k'okwer rin.”

¹⁸Bathseba odwoko ni, “Ber swa, abino luwo rin gi kere.”

¹⁹Ameno Bathseba okidho luwo ri Adoniya gi kere Solomon. Kere ocungo malo motho min aka okule piny rigo. Kenyo obedo i kom pere ma dhum aka owaco wokel ri min kom man aka min obedo piny yu cinge maracuc.

²⁰Kenyo Bathseba owaco ni, “Anitie gi kwac mathin wok bongin; mondo ikir'iceran.” Solomon owaco rigo ni, “Waci kwac perin mama akilakwero rin.”

²¹Bathseba odwoko ni, “Weyi omin in Adoniya wobedi gi Abisagi dhako Jasunem paka cege.”

²²Kere Solomon openjo min ni, “Raŋo ikwayo Abisagi ri Adoniya? Inyalo miti kwayan miyo go kiri ker je; kole go omin an madwoŋ aka Abiatha jacway ri Were i wi migam gi Yowab jonitie i thenge pere!”

²³Kenyo Solomon okwoŋere i nyingi Rwoth, ka waco ni, “Weyi Were wonekan k'akimiyo Adoniya culo gi kwo pere ro kwayo gime!

²⁴Rwoth otieko kethan matek i kom pa baba Daudi dhumo; Rwoth okuro cikirok pere to miyan gi nyikwayan ker. Akwoŋere i nyingi Rwoth makwo nike Adoniya ripo tho konon me!”

²⁵Ameno kere Solomon ooro Benaya wod pa Yehoyada, m'okidho to neko Adoniya.

²⁶Kenyo kere Solomon owaco ri Abiatha jacway ri Were i wi migam ni, “Dok i piny perin i Anathoth. Kole oyido iripo tho, to akibino nekin pama rupiri oyido itiŋo Kakan ma Cikirok pa Rwoth munyo initie gi baba Daudi, aka ipoko i litho pere je.”

²⁷Kenyo Solomon oriemo Abiatha bedo jacway ri Were i wi migam, aka omiyo gima Rwoth oyido otieko waco ri Eli jacway ri Were i wi migam kodi nyikwaye tundo i kare.

²⁸Yowab owinjo gim'otimere. (Kole Yowab oyido othielo Adoniya, to k'othielo Absalom.) Ameno oringo i Wema pa Rwoth aka oliero i kisi sonda ma migam.

²⁹Munyo owaci ri kere Solomon nike Yowab oringo i Wema aka oliero i migam, Solomon ooro Benaya ka waco ama: “Kadhi igoy go piny.”

³⁰Ameno Benaya obino i Wema pa Rwoth, aka owaco ri Yowab ni, “Kere miyin cik wok woko.” Yowab odwoko ni, “Be, alatho ka.” Benaya ogik bongi kere aka owaco rigo gima Yowab owaco.

³¹Kere odwoko ni, “Tim gima Yowab waco. Neki go aka iyiki go, ŋey wongoye kwoŋ an kodi nyikway Daudi man je ma wobedi g'apuse ro gima Yowab otimo munyo oneko cwo ma jongoye gi banja.

³²Rwoth bino miyo Yowab gir'acula ro neki m'otimo ma baba Daudi k'oŋeyo. Yowab oneko cwo ario ma jongoye gi banja m'oyido jober loyo go: Abuner jamituka jolweny pa Joisiraili, kodi Amasa jamituka jolweny pa Joyuda.

³³Gir'acula ma neki pajo lapodho kwoŋ Yowab gi nyikwaye cil gi cil. To Rwoth bino miyo nyikway Daudi ma jodhum siem cil gi cil.”

³⁴Kenyo Benaya wod pa Yehoyada okidho i Wema pa Rwoth to neko Yowab, aka oyiki go peco pere kam'othangere.

³⁵Kere oketho Benaya bedo jamituka jolweny i kabedo pa Yowab aka oketho Zadok jacway ri Were i wi migam i kabedo pa Abiatha.

³⁶Kenyo kere ooro wokel Simey aka owaco rigo ni, “Geti ot perin ka i Yerusalem. Bed'iye aka ikir'ingoye i tindi madwoŋ.

³⁷Rupiri i ndelo ma inokadhi kalo milelo Kidiron, ŋey adieri nike ibino tho, aka apuse labedo kwoŋin.”

³⁸Simey odwoko ni, “Gim'iwaco ber. Paka jadwoŋ paran kere owaco, ameno apaka ŋeca perin latimo.” Ameno Simey obedo i Yerusalem ma hongo malac.

³⁹Rumacen ma oro adek, ario kwoŋ ŋecin pa Simey joringo bongi kere ma Gath, Akis wod pa Maka. Munyo Simey owinjo nike oyido jonitie i Gath,

⁴⁰otweyo punda pere aka okidho bongi Akis kere ma Gath rango ŋecin pere. Simey onwaŋo jo to dwoko gi jo peco.

⁴¹Munyo kere Solomon owinjo gima Simey oyido otimo,

⁴²ooro wokel go aka owaco ni, “Amiyin kwoŋirok i nyingi Rwoth nike ikilaeye Yerusalem. Aka agwokin nike k'inoeye, adieri ibino tho. Ikiyere gine t'iwaco nike ibino winjan?

⁴³Raŋo to, ituro cikirok perin to ikwero winjo cik paran?

⁴⁴Iŋeyo maber komo m'itimo ri baba Daudi. Rwoth bino miyin gir'acula ro gino.

⁴⁵To Rwoth bino miyan silwany aka bino miyo ker pa Daudi bedo cil gi cil.”

⁴⁶Kenyo kere omiyo Benaya cik m'okidho to neko Simey. Ameno ker ocungo matek i cingi Solomon.