Read dhopadhola 1 Kerin 21 Bible Online

1 Kerin 21 - dhopadhola bible

1 Kerin 21

¹Onyo cegin gi cel pa kere Ahab i Yezirel oyido nitie ndelo vini aka won mere oyido obedo jacwo m'ilwoŋo ni Naboth.

²Ndelo acel, Ahab owaco ri Naboth ni, “Miyan ndelo vini perin me wobedi ndelo fufa paran. Abino miyin ndelo vini man maber loyo, kosa abino culin pesa ma ripo gine.”

³To Naboth odwoko ni, “Alunjo ndelo vini me wok bongi kwarere paran, aka Rwoth wokiri woyeyan miyin.”

⁴Ahab odok peco munyo kisangala aka omako nge ro gima Naboth owaco rigo. Oriere i kanindo pere aka k'onyalo cemo.

⁵Yezebel cipa Ahab obino bonge aka openjo go ni, “Raŋo ikisangala? Raŋo ikicem?”

⁶Ahab odwoko ni, “Kwoŋbedo awaco ri Naboth nike woyeyan anyew ndelo vini pere, kosa amiy go ndelo vini man to kwero.”

⁷Yezebel openjo Ahab ni, “Iŋat'ibedo kere ma Isiraili kosa be? Ay i kanindo, ibedi gi kisangala aka icem. Abino limo rin ndelo pa Naboth!”

⁸Ameno Yezebel ondiko balwin i nyingi Ahab to mwono aka odhiro ri jodhum kodi jodongo ma Yezirel.

⁹I balwa no Yezebel ondiko ni, “Langa win ndelo ma riyo, wilwoŋ ji je kanyacel aka wikethi Naboth i kabedo ma wor.

¹⁰Nwaŋ win ji ma bukony ario jowosegeya go ruwaŋe nike okwoŋo Were kodi kere. Kenyo ter win go woko ma tindi madwoŋ aka wigoy go gi telin wotho.”

¹¹Jodhum kodi jodongo ma Yezirel jotimo gima Yezebel omiyo jo or timo.

¹²Jolanga ndelo ma riyo to jolwoŋo ji kanyacel, aka jomiyo Naboth kabedo ma wor.

¹³Ji ma bukony ario jobino to josegeya go ruwaŋ ji nike okwoŋo Were kodi kere, aka oter go woko ma tindi madwoŋ to igoyo go gi telin cuka otho.

¹⁴Odhir ri Yezebel mikwenda nike oneki Naboth.

¹⁵Tekin Yezebel limo mikwenda no, owaco ri Ahab ni, “Ay, ikadhi ilunji ndelo vini pa Naboth m'okwero kitana kodin, kole Naboth otho.”

¹⁶Aka tekin Ahab winjo nike Naboth otho, okadho lunjo ndelo vini.

¹⁷Kenyo Rwoth owaco ri Elia jatuci wac Were ma wok Tisibe ni,

¹⁸“Ay ikidhi bongi kere Ahab ma Isiraili. Ibino nwaŋo go i ndelo vini pa Naboth mito lunjo.

¹⁹Waci rigo nike Rwoth waco ni, ‘Rumacen ma neko jacwo me, onyo imito lunjo lim pere bende?’ Waci rigo nike me a gima Rwoth waco, ‘I kabedo ma gwokere jonaŋ'iye remo pa Naboth, ama bende gwokere jobino naŋ'iye remo perin!’ ”

²⁰Munyo Ahab oneno Elia, openjo go ni, “Inwaŋan, jakwor paran?” Elia odwoko ni, “Ey anwaŋin! Imiyere kicutho timo reco ruwaŋ Rwoth.

²¹Ameno Rwoth waco rin ni, ‘Abino kelo teko kwoŋin, aka abino neko kisi jacwo ma peco perin je; mathindho gi m'oti.

²²Peco perin bino cale gi pecin pa Yerobowam wod pa Nebat kodi Basa wod pa Ahija, kwoŋbedo ikwinyo nge paran gi miyo Isiraili timo reco.’

²³Aka ri Yezebel, Rwoth waco nike gwokere jobino camo delkwoŋe i tindi madwoŋ Yezirel.

²⁴Wade perin ma jotho i tindi madwoŋ gwokere jobino camo, aka ma jotho kam'othangere acut jobino camo.”

²⁵(Ongoye ŋat'oyido omiyere kicutho timo reco ruwaŋ Rwoth paka Ahab rupiri cege Yezebel oyido dwoŋo go.

²⁶Ahab otimo reco ma wickwot loyo to lamo cal pa Bal paka Joamor ma Rwoth oriemo wok i lowo no ndir ma Joisiraili jodonj'iye.)

²⁷Munyo Elia otieko luwo, Ahab oyeco woko nangin pere aka oruko kutiya. Okwero cemo, aka onindo i kutiya, to kadho kun.

²⁸Rwoth owaco ri Elia jatuci wac Were ni,

²⁹“Ineno nger ma Ahab omwole iye ruwaŋan? Kwoŋbedo omwole, akibino kelo teko i hongo pere, t'abino kelo teko peco pere i hongo pa wode.”