Read dhopadhola 1 Kerin 22 Bible Online

1 Kerin 22 - dhopadhola bible

1 Kerin 22

¹Ma oro ario Siria kodi Isiraili jobedo ma jokilweny.

²To i oro mar'adek, Yehosafat kere ma Yuda okidho neno kere ma Isiraili.

³Ahab openjo jodhum pere ni, “Raŋo fodi wakitimo gimoro mayo kere ma Siria Ramoth i Giliad. Wikiŋey nike obedo mawan?”

⁴Ahab openjo Yehosafat ni, “Inokadhi kodan monjo Ramoth?” Yehosafat odwoko ni, “Ayikere ka iyikere, jolweny paran, kodi kayina paran.

⁵To weyi kutho wapenji Rwoth.”

⁶Ameno Ahab olwoŋo jotuci wac Were je 400 aka openjo jo ni, “Akadhi amonji Ramoth, kosa be?” Joje jodwoko ni, “Kadhi imonji, Rwoth bino miyin loyo.”

⁷To Yehosafat openjo ni, “Ongoye jatuci wac Were man ma wanyalo penjo?”

⁸Ahab odwoko ni, “Nitie acel man, Mikaya wod pa Imila. T'adak go kwoŋbedo go kiwaci gimaber kwoŋan, to gimarac kende.” Yehosafat odwoko ni, “Weyi kere wokiri wowaci nger gino.”

⁹Kenyo Ahab olwoŋo jalweny to waco rigo omo Mikaya piyo.

¹⁰Onyo Ahab kodi Yehosafat oyido joruko nangin pajo ma ker to jobedo i kombere pajo ma ker woko ma waŋkac ma Samaria i kisia. Jotuci wac Were je oyido joluwo ruwaŋ jo.

¹¹Acel kwoŋ jo m'ilwoŋo ni Zedekia wod pa Kenana, oyiko tungi ogwaŋ gi nyweny aka owaco ri Ahab ni, “Me a gima Rwoth waco, ‘Gi gime ibino dhiro gine Josiria cuka ireyo woko jo.’ ”

¹²Jotuci wac Were man je jowaco gimoro acel ni, “Monji Ramoth aka Rwoth bino miyin loyo.”

¹³Kucel jatel pa jalweny m'oyido okidho omo Mikaya owaco rigo ni, “Panen, jotuci wac Were man je jowaco gima kere mito winjo, aka in bende wac gimoro acel.”

¹⁴To Mikaya odwoko ni, “Akwoŋere i nyingi Rwoth makwo nike gima Rwoth owaci, meno alaluwo.”

¹⁵Munyo Mikaya otundo ruwaŋ Ahab, kere openjo go ni, “Mikaya wamonji Ramoth kosa be?” Mikaya odwoko ni, “Monji win! Rwoth bino miyo win loyo.”

¹⁶To Ahab owaco ri Mikaya ni, “Awaci rin didi nike k'iluwo kodan i nyingi Rwoth wac ran adieri?”

¹⁷Mikaya odwoko ni, “Aneno Joisiraili joywore wi gote paka rombo ma jongoye gi jakwath rombo. Aka Rwoth owaco ni, ‘cwo me jongoye gi jatel weyi jowodoki peco i siem.’ ”

¹⁸Ahab owaco ri Yehosafat ni, “Nende akiwaco rin nike go kiwaci gimaber kwoŋan, to gimarac kende?”

¹⁹Mikaya omedere waco ni, “Riameno winji gima Rwoth waco. Aneno Rwoth obedo i kom pere ma dhum i polo aka jomalaika oyido jocungo i ŋete.

²⁰Rwoth openjo ni, ŋa ma bino wondo Ahab ŋey wokidhi woneki go i Ramoth? Jomalaika man jowaco gimoro acel, aka man jowaco giman.

²¹Kenyo cuny pa Rwoth obino to cungo ruwaŋ Rwoth to waco ni, ‘Abino wondo go.’

²²Rwoth openjo ni, ‘Ibino wondo go nedi?’ Cuny pa Rwoth odwoko ni, ‘Abino kidho t'amiyo jotuci wac Were pa Ahab je waco twodo.’ Kenyo Rwoth owaco ni, ‘Kadhi iwondi go, ibino nyalo.’ ”

²³Mikaya owaco macowe ni, “Neni, me a gim'otimere. Rwoth otieko miyo jotuci wac Were perin me wondin, aka go won otieko waco nike ibino romo gi teko.”

²⁴Kenyo jatuci wac Were Zedekia okidho bongi Mikaya to payo pinde adhoŋ aka owaco ni, “Woki keraŋo ma cuny pa Rwoth oweyan to luwo kodin?”

²⁵Mikaya odwoko ni, “Ibino ŋeyo ndelo no ka inodonji i kisika ma yucen moro pondo.”

²⁶Kenyo kere Ahab owaco ri jatel pa jolweny pere ni, “Maki Mikaya iter go bongi Amon gavana ma tindi madwoŋ kodi Yowas wod pa kere.

²⁷Waci rijo jowoboli go i jiera aka jowomiy go mugat gi pi cuka anodwoki i siem.”

²⁸Mikaya owaco ni, “Winjan win ji je, ka inodwoki i siem, meno Rwoth k'oluwo i an.”

²⁹Ameno kere Ahab kodi Yehosafat jokidho monjo tindi madwoŋ Ramoth i Giliad.

³⁰Ahab owaco ri Yehosafat ni, “Ka wakadho lweny, in ruki nangin perin ma ker, aka an abino rukere i nger matek niaŋ kwoŋan.” Ameno kere ma Isiraili k'orukere paka kere munyo kidho i lweny.

³¹Onyo kere ma Siria oyido omiyo jomituka piero adek g'ario ma cawilin cik nike jowomonji kere ma Isiraili kende.

³²Aka munyo jomituka ma cawilin joneno Yehosafat, joparo nike oyido obedo Ahab aka jowire monjo go. To Yehosafat oywaki malo

³³to joniaŋ nike oyido k'obedo Ahab to joweyo monjo go.

³⁴To jacwo moro obayo asere to cwowo Ahab i dier kogino cinge. Ahab okoko ri jagwey cawila pere ni, “Awinjo litho, wire iywayan woko i lweny.”

³⁵Munyo lweny medere, kere Ahab odoŋ m'oliero i wi cawila pere ŋiyo Josiria. Remo ocwer wok iy'adhola pere to umo pendi cawila, aka tundo othieno otho.

³⁶Aka munyo waŋceŋ cegin podho, jolweny jomiyo or nike kisi jacwo wodoki i piny pere kodi i tindi madwoŋ pere.

³⁷Ameno kere Ahab otho, aka oter delkwoŋe yiko i Samaria.

³⁸Cawila pere olwok i kidiwa ma Samaria kama malayin jolwoker'iye, aka gwokere jonaŋo kenyo remo pere paka Rwoth oyido owaco.

³⁹Kisi gima Ahab otimo je, cel pa kere pere m'okicin gi lak liec, kodi tindin madongo m'ogeto je ondiki i kitawo ma kigana ma mako kwoŋ kerin ma Isiraili.

⁴⁰Rumacen ma tho pa Ahab, wode m'ilwoŋo ni Ahazia olunjo go paka kere.

⁴¹I oro mar'aŋwen ma dhum pa Ahab kere ma Isiraili, Yehosafat wod pa Asa obedo kere ma Yuda.

⁴²Yehosafat oyido jaoro piero adek g'abic aka odhumo ma oro piero ario g'abic i Yerusalem. Yokimere oyido ilwoŋo ni Azuba nyar Silihi.

⁴³Paka bamere Asa m'open dhumo rigo, Yehosafat otimo gim'otire ruwaŋ Rwoth, kwanyo woko k'onyeko kabedo ma lamo werin man aka ji jomedere miyo cowirok gi waŋo buban kenyo.

⁴⁴Yehosafat bende otimo siem gi kere ma Isiraili.

⁴⁵Giman je ma Yehosafat otimo, miseni pere, kodi lweny m'olwenyo je ondiki i kitawo ma kigana ma mako kwoŋ kerin je ma Yuda.

⁴⁶Yehosafat bende oriemo woko malayin je m'oyido jodoŋ i migame pa werin man i ndir pa bamere Asa.

⁴⁷Piny Edom oyido ongoye gi kere, aka oyido dhumere kodi ŋata luwo i dhum ma kere ma Yuda ama yero.

⁴⁸Yehosafat ogeto mel ma Tarsis ma omo zahabu wok Ofir to jok'onyalo omo rupiri mel jotur i Eziongeba.

⁴⁹Kenyo kere Ahazia ma Isiraili oyido omito nike cwo pere jocewere gi cwo pa Yehosafat, to Yehosafat k'oyere.

⁵⁰Yehosafat otho aka oyiki go kam'oyik'iye bacere pere i tindi madwoŋ pa Daudi to wode m'ilwoŋo ni Yehoram lunjo go.

⁵¹I oro mar'apar g'abirio ma dhum pa kere Yehosafat ma Yuda, Ahazia wod pa Ahab obedo kere ma Isiraili aka odhumo ma oro ario i Samaria.

⁵²Ahazia otimo reco ruwaŋ Rwoth paka bamere Ahab kodi min Yezebel, kodi kere Yerobowam ma jomiyo Isiraili timo reco.

⁵³Ahazia olamo to tiyo ri Bal, aka i nger acel paka bamere okwinyo nge pa Rwoth, Were pa Isiraili.