Read dhopadhola 1 Kerin 3 Bible Online

1 Kerin 3 - dhopadhola bible

1 Kerin 3

¹Solomon otimo cikirok gi Farawo ma Misir to nywomo nyar Farawo. Aka Solomon okelo nyar Farawo bedo i tindi pa Daudi madwoŋ, cuka go otieko geto cel pa kere pere, Ot pa Were, kodi kor ot thoko Yerusalem.

²Ji oyido jomiyo cowirok pajo i wi migam m'opokere kwoŋbedo oyido ongoye ot m'ogeti i nyingi Rwoth.

³Solomon oyido omaro Rwoth aka oluwo fonji pa bamere Daudi, to bende miyo cowirok to waŋo buban i wi migame.

⁴Aka kere okidho i Gibeon miyo cowirok kenyo, rupiri kenyo a kama migam m'oŋeyere oyido nitie iye. Solomon oyido omaro miyo cowirok awaŋa ganin i wi migam no.

⁵Kenyo Rwoth omenyere rigo wor i lek; aka Were openjo go ni, “Kway gim'amiyin.”

⁶Solomon odwoko ni, “Noknok inyutho mar madwoŋ ri baba Daudi, ŋeca perin, rupiri owotho ruwaŋin iy'adieri, i tiro, kodi cunye macil rin. Aka fodi imedere nyutho go mar perin madwoŋ makiwire gi miyo wode ma konon dhumo i kabedo pere.

⁷Aka onyo pama, A Rwoth Were paran, iweyan lunjo baba paka kere, makada nende fodi athin aka akuya nger ma dhum.

⁸An e i dier ji m'iyero bedo ji perin, ji ma jodit ma jokikwanere.

⁹Riameno miyan rieko ma dhumo ji perin, ŋey anyal poko i dier bero kodi raco, rupiri ŋa manyalo dhumo ji perin madwoŋ me?”

¹⁰Rwoth osangala nike Solomon oyido okwayo gime.

¹¹Aka Were owaco ri Solomon ni, “Rupiri ikwayo gime, aka ikikwayo kwo mabor kosa ŋaŋo kosa kwo pa jokwor perin,

¹²neni, alatimo gim'iwaco. Abino miyin rieko kodi ŋeyo madit m'ongoye ŋat'otieko bedo gine, aka ongoye ŋata bino bedo gine kendo.

¹³Amiyin bende gim'ikikwayo, ŋaŋo kodi dwoŋ, aka ongoye kere ma bino pimere kodin i kwo perin je.

¹⁴Aka k'inowinjan t'ikuro cik gi Or paran paka benin Daudi otimo, abino miyin kwo mabor.”

¹⁵Solomon ocew aka oniaŋ nike Were oluwo gi go i lek. Kenyo obino i Yerusalem, aka ocungo ruwaŋ Kakan ma Cikirok pa Rwoth aka omiyo cowirok awaŋa gi cowirok ma siem. Rumacen otimo kalima ri jodhum pere je.

¹⁶Ndelo acel malayin ario jobino bongi kere, aka jocungo ruwaŋe.

¹⁷Acel kwoŋ jo owaco ni, “Jadwoŋ, dhako me kodi an wabedo i ot acel, aka anywolo nyathi majayac peco munyo go nitie.

¹⁸Rumacen ma ndelo ario munyo atieko nywol, go bende onywolo nyathi majayac. Waj'ario kende am'oyido wanitie i ot, aka oyido ongoye ŋatiman.

¹⁹Aka wod pa dhako me otho wor, rupiri onindo kwoŋe.

²⁰Aka dhako me ocew i dier wor aka okwanyo wodan wok kabutan munyo anindo, to pielo i kanindo pere, to pielo nyathi m'otho i kanindo paran.

²¹Munyo acew odikin to amito miyo nyathi paran dhoth, aneno nike otho. Aŋiyo gi cegin odikin aneno nike k'obedo nyathi paran.”

²²To dhako man mere owaco ni, “Be! Nyathi makwo aparan, aka m'otho aperin!” Dhako marapena odwoko ni, “Be! Nyathi m'otho aperin, aka makwo aparan!” Ameno jopiemo ruwaŋ kere.

²³Kenyo kere owaco, “Kisi moro kwoŋ win waco nike nyathi makwo apere aka nyathi m'otho apa nyawote.”

²⁴Kere ooro wokel abor, aka munyo okeli,

²⁵owaco ni, “Bar nyathi makwo i diere kadirio aka imiy kisi adec ri kisi dhako.”

²⁶Kenyo yok nyathi m'otire owaco ri kere gi mar m'opoŋ i cunye ri nyathi pere ni, “Mondo jadwoŋ, Ikir'ineki nyathi! Miy go!” To dhako ca mere waco ni, “Ikir'imiy wajoje; wobar i diere kadirio.”

²⁷Kenyo kere Solomon odwoko to waco, “Ikir'ineki nyathi! Miy dhako marapena; go a yok nyathi m'otire.”

²⁸Munyo Joisiraili jowinjo nger ma kere othumo iye banja, jopoŋ rigo gi wor, rupiri joniaŋ nike Were oyido omiyo go rieko timo tiro.