Read dhopadhola 1 Kerin 4 Bible Online

1 Kerin 4 - dhopadhola bible

1 Kerin 4

¹Solomon obedo kere ma Isiraili gipi,

²aka me a jodhum pere ma malo: Azaria wod pa Zadok oyido jacway ri Were i wi migam.

³Elihoref kodi Ahija wot Sisa oyido jondiko ma kapido, Yehosafat wod pa Ahilud oyido kano ndiko je.

⁴Benaya wod pa Yehoyada oyido jamituka jolweny, Zadok gi Abiatha oyido jocway ri Were i wi migam.

⁵Azaria wod pa Nathan oyido telo jodhum mar'adec, Zabud wod pa Nathan oyido jacway ri Were i wi migam aka jamic rieko pa kere.

⁶Ahisar oyido kaŋasa tic pa ŋecin ma cel pa kere, aka Adoniram wod pa Abida oyido neno tic mar'arom.

⁷Solomon oyido nitie gi jodhum apar g'ario ma jodhumo i Isiraili gipi. Oyido jomiyo kere gi peco pere cemo wok iy'adec pajo, aka kisi jacwo oyido miyo cemo ma dwe acel.

⁸Me a nyingi jo: Behur ma piny matendere ma Efrayim,

⁹Ben Deka ma tindin madongo ma Bethsemes Elon, kodi Beth Hanan.

¹⁰Ben Hesed ma Aruboth (Ri go oyido nitie Soko kodi adec je ma Hefer)

¹¹Benabinadab m'oyido onywomo nyar Solomon m'ilwoŋo ni Tafath, adec ma Dor je.

¹²Bana wod pa Ahilud, tindin madongo ma Tanak, Megido, kodi adec macegin gi Bethsan, cegin gi tindi Zarethan, yupiny ma tindi Yezirel, tundo kiri i tindi madwoŋ Abelmehola kodi tindi madwoŋ Yokimeam.

¹³Bengeba, tindi madwoŋ Ramoth i Giliad, loka je ma Giliad m'obedo apa jonono Yayir nyakwar Manase, kodi adec ma Argob i Basan, joje tindin madongo piero aucel, g'acel m'othok gi kor ot kodi nywenye ma ywel i waŋkace.

¹⁴Ahinadab wod pa Ido, adec ma Mahanayim.

¹⁵Ahimaz m'oyido onywomo Basemath acel kwoŋ nyir pa Solomon, adec ma Nafital.

¹⁶Bana wod pa Husay, adec ma Aser kodi tindi ma Bealoth.

¹⁷Yehosafat wod pa Parua, adec ma Isakar.

¹⁸Simey wod pa Ela, adec ma Benyamin.

¹⁹Geba wod pa Uri, adec ma Giliad, m'oyido kere Sihon pa Joamor kodi kere Og ma Basan jodhumo. Aka oyido nitie jadhum acel ma dhumo lowo gipi ma Yuda.

²⁰Ji ma Yuda gi Isiraili oyido jomore pa kwoyo ma thengi nam; jocemo to jomedo aka oyido josangala.

²¹Solomon odhumo kerin wok i Yufrete tundo i lowo pa Jofilistia kiri i kew ma Misir. Joculo Solomon misolo aka jotiyo rigo i kwo pere je.

²²Gigipiny ma Solomon oyido mito kisi ndelo obedo, lita 5,000 ma moko m'onuŋere kodi lita 10,000 ma moko m'oŋakere,

²³megikwe apar ma cwe, dhok piero ario m'opidhi gi lum, rombo miya acel, medo i wi kol, jow, kodi winyin.

²⁴Kole Solomon odhumo adec je ma yupodho ceŋ ma Yufrete wok Tifsa tundo Gaza, kiri gi kerin pajo, aka obedo i siem gi piny je m'oyido othoko go.

²⁵I ndir pa Solomon ji ma Yuda gi Isiraili jobedo i siem, kisi peco obedo gi yen vini pajo kodi makuyu.

²⁶Solomon oyido nitie gi kigo 40,000 ri kayina gi cawilin pere, kodi cwo 12,000 ma jogweyo kayina.

²⁷Jodhum pa Solomon apar g'ario oyido jomiyo go gigipiny ma go mito kodi jono je ma jocemo kanyacel gi go, kisi jadhum ma dwe acel. Noknok oyido jomiyo go kisi gima go mito,

²⁸kiri gi bale[1] kodi kanja ri kayina ma cawila kodi ogwaŋe ma ceŋ.

²⁹Were omiyo Solomon rieko kodi ŋeyo ma giraura kodi paro kipimere paka kwoyo ma nam.

³⁰Ameno Solomon oyido riek loyo cwo je ma yuwok ceŋ kodi cwo ma Misir.

³¹Kole Solomon oyido riek loyo cwo man je, oyido riek loyo Ethan Jazera, Heman, Kalkol, kodi Darda wot Mahol, aka ŋeyirok pere olak i piny mager je.

³²Solomon ocwoko agecin 3,000 kodi wer ma kalo gana acel.

³³Oluwo kwoŋ yen gi dudi, wok i yath matek m'ilwoŋo ni Sida i Lebanon tundo kwoŋ cangwe ma lak i kor ot, ogwaŋe, winyin, ogwaŋe ma jomol gi kor jo, kodi rec.

³⁴Kerin ma piny gibe jowinjo kwoŋ rieko pere aka jooro ji winjo go.