Read dhopadhola 2 Kerin 10 Bible Online

2 Kerin 10 - dhopadhola bible

2 Kerin 10

¹Onyo Ahab oyido nitie gi nyikwaye piero abirio ma jobedo i Samaria. Yehu ondiko balwin ri jodhum ma tindin madongo, jodongo, kodi ri jokur pa nyikway Ahab. Balwa no oyido waco ni,

²“Nyikway kere jonitie i cingin aka winitie gi cawilin, kayinin, gilweny, kodi tindin madongo m'othok gi cel. Ameno tekin wilimo balwa me,

³yer win nyakwar jadwoŋ mewin manitie gi nyalo, kethi win go kere, aka wilweny rigo.”

⁴Jodhum ma Samaria jobwok aka jowaco ni, “Neni, kerin ario jok'onyalo cungo ruwaŋe, wan wanonyal nedi?”

⁵Ameno jatel pa jolweny ma cel pa kere kodi jadhum ma tindi madwoŋ, kanyacel gi jodongo kodi jokur jodhiro ri Yehu mikwenda me ni, “Wabedo ŋecin perin aka wayikere timo gim'iwaco je. To wakibino ketho nyatoro kere; tim gimaber i waŋin.”

⁶Yehu ondiko rijo balwa man ni, “Ka winitie i thenge paran aka wiyikere luwo cik paran, keli ran win wic nyikway Ahab i sawa me dikin.” Onyo jodongo ma Samaria ama oyido jokuro nyikway Ahab.

⁷Munyo balwa pa Yehu otundo, jotel ma Samaria joneko nyikway Ahab piero abirio je, joketho wic gin i aditin, aka jodhiro ri Yehu i Yezirel.

⁸Munyo owaci ri Yehu nike okeli wic nyikway Ahab, owodho or nike wodhur jo i kidhur ario i waŋkac ma tindi madwoŋ aka wowey kenyo tundo yawere odikin.

⁹Odikin, Yehu owok i waŋkac aka owaco ri ji ma kenyo ni, “An aŋat'acamo sereko ri kere Yoram t'aneko go; win wingoye gi banja. To ŋa m'oneko me gin?

¹⁰Me ridho nike gima Rwoth owaco je kwoŋ nyikway Ahab bino tundo i kare. Rwoth otimo gim'ociko luwo bongi jatuci wac Were pere Elia.”

¹¹Kenyo Yehu oneko wade pa Ahab m'odoŋ je m'oyido jobedo i Yezirel, jotel pa jolweny pere, merin, kodi jocway ri Were i wi migam, cuka ongoye ŋat'odoŋ.

¹²Yehu oeye Yezirel kadho i Samaria. I yo i kabedo m'ilwoŋo ni “Kambi pa jokwath rombo.”

¹³Oromo gi wade pa Ahazia kere ma Yuda mogo, aka openjo jo ni, “Wibedo jokune?” Jodwoko ni, “Wabedo wade pa Ahazia. Wakadho wendo ri nyithindho pa Yezebel yok kere kodi jopeco pa kere man.”

¹⁴Yehu omiyo cwo pere cik ni, “Maki win jo makwo.” Jomako jo aka Yehu oneko jo cegin gi bur kenyo. Joje oyido piero aŋwen g'ario aka ongoye kwoŋ jo m'owey makwo.

¹⁵Yehu oeye kenyo aka oromo gi Yehonadab wod pa Rekab. Yehu omotho go aka owaco rigo ni, “In, kodi an wanitie gi paro acel. Inothielan?” Yehonadab odwoko ni, “Ey.” Yehu odwoko ni, “Miyan cingin to.” Jogwaro cingi gin, aka Yehu okonyo Yehonadab idho i cawila,

¹⁶ka waco ama: “Biye kodan ineni nger m'amiyere ri Rwoth.” Aka ogweyo Yehonadab i cawila pere.

¹⁷Aka munyo Yehu otundo i Samaria, oneko wade pa Ahab m'oyido jodoŋ je ma k'oweyo kad'acel. Me a gima Rwoth oyido owaco ri Elia nike bino timere.

¹⁸Kenyo Yehu ocoko ji je kanyacel, aka owaco rijo ni, “Ahab oyido lamo Bal roman, to an abino tiyo rigo kicutho.

¹⁹Onyo riameno lwoŋ ran win jotuci wac were pa Bal je, ji ma jolamo go kodi jocway ri were i wi migam pere je; wongoye ŋata wokeŋ, rupiri anitie gi cowirok madwoŋ ma mito miyo Bal. Ŋata k'obino je bino tho.” (To me obedo rieko pa Yehu ŋey woneki ji m'oyido jolamo Bal je.)

²⁰Kenyo Yehu owodho or ni, “Kethi win ndelo ma lamo ma miyo Bal dwoŋ!” Ameno joketho ndelo.

²¹Yehu odhiro wac i lowo ma Isiraili gipi. Ji je m'oyido jolamo Bal jobino m'ongoye ŋata k'obino. Joje jodonjo i ot pa Bal, aka ot opoŋ wok i gike tundo i gike.

²²Kenyo Yehu omiyo jocway ri were i wi migam m'oyido jokuro kabada wodho kanzin jowomiy ji m'oyido jolamo Bal.

²³Rumacen Yehu won odonjo i ot pa Bal gi Yehonadab wod pa Rekab aka owaco ri ji ni, “Neni win nike nyaka ji ma jolamo Bal kende ama jodonjo ka aka ongoye ŋata lamo Rwoth m'odonjo.”

²⁴Kenyo Yehu kodi Yehonadab jodonjo miyo cowirok kodi mic awaŋa ri Bal. Yehu oyido otieko ketho cwo piero aboro woko thoko ot pa Bal aka owaco rijo ni, “Wiripo neko ji me je; Ŋat'owey acel kwoŋ jo kwalok bino culo gi kwo pere!”

²⁵Ameno tekin Yehu ketho mic, owaco ri jokur kodi jotel pa jolweny ni, “Donji win wineki joje, wikiri wiwey kada ŋat'acel kwalok.” Jodonjo aka joneko joje g'abor, to jowotho delkwoŋ gin woko. Kenyo jodonjo i kisika ma iy ot pa Bal,

²⁶jowodho siro m'oyido nitie kenyo to jowaŋo woko.

²⁷Ameno jonyeko siro kodi ot pa Bal, aka joloko ot pa Bal coron ma fodi nitie kiri konon.

²⁸Ameno apaka Yehu ocungo lamo Bal i Isiraili.

²⁹To Yehu oluwo reco pa kere Yerobowam m'omiyo Isiraili timo reco ma lamo rwath dhok ma zahabu m'oketho i Bethel kodi i Dan.

³⁰Rwoth owaco ri Yehu ni, “Itieko timo ri nyikway Ahab gigipiny je m'oyido amito ni itimi. Ameno acikin ni nyikwayin, kiri i luse mar'aŋwen, jobino bedo kere i Isiraili.”

³¹To Yehu k'oluwo cik pa Rwoth, Were pa Isiraili gi cunye je, kwanyo woko oluwo kite pa Yerobowam, m'omiyo Isiraili timo reco.

³²I hongo no Rwoth ocako ŋado woko adec pa Isiraili. Kere Hazael ma Siria omako adec je ma Isiraili

³³yuwok ceŋ ma Yordan, kiri yupiny kiri i tindi Arower i malawa Arnon. Me obedo adec ma Giliad kodi Basan, kama nonin pa Gad, Ruben, kodi yuwok ceŋ pa Manase oyido jobed'iye.

³⁴Gigipiny man je ma Yehu otimo kodi tim pere ma miseni ondiki i kitawo ma kigana ma mako kwoŋ kerin ma Isiraili.

³⁵Yehu otho aka oyiki go i Samaria, aka wode Yehoahaz olunjo go paka kere.

³⁶Yehu oyido odhumo i Samaria paka kere ma Isiraili ma oro piero ario g'aboro.