Read dhopadhola 2 Kerin 12 Bible Online

2 Kerin 12 - dhopadhola bible

2 Kerin 12

¹I oro mar'abirio ma dhum pa Yehu kere ma Isiraili, Yowas obedo kere ma Yuda aka odhumo i Yerusalem ma oro piero aŋwen. Yokimere oyido obedo Zibia ma wok i tindi madwoŋ Berseba.

²I kwo pere je Yowas otimo gim'osangala Rwoth kwoŋbedo Yehoyada jacway ri Were i wi migam oyido waco rigo gir'atima.

³To kad'ameno kalamo manyakafir k'onyek, aka ji jomedere miyo cowirok kodi waŋo buban kenyo.

⁴Yowas olwoŋo jocway ri Were i wi migam aka omiyo jo or kano pesa m'iculo ma makere gi cowirok i Ot pa Rwoth, pesa m'iculo ma cowirok ma noknok kodi pesa ma ji jomiyo paka mic ma wegi joyeyo.

⁵Kisi jacway ri Were i wi migam oyido ripo coko pesa wok bongi ji ma go tiyo rijo, aka pesa oyido iripo oro ma yiko gine Ot pa Rwoth.

⁶To i oro ma piero ario g'adek ma dhum pa Yowas, jocway ri Were i wi migam oyido fodi jok'oyiko Ot pa Rwoth.

⁷Ameno Yowas olwoŋo Yehoyada kodi jocway ri Were i wi migam man aka openjo ni, “Raŋo wikiyiki Ot pa Rwoth? Onyo riameno wok pama me wikiripi kano pesa ma wicoko; to miy win woor ma yiko Ot pa Rwoth.”

⁸Jocway ri Were i wi migam joyeyo gime aka bende joyeyo yiko Ot pa Rwoth.

⁹Kenyo Yehoyada okwanyo sanduku ma mbawo, oŋado hoŋ i wiye to ketho cegin gi migam yuracuc ka nyaka idonjo i Ot pa Rwoth. Jocway ri Were i wi migam ma jonitie i tic joketho pesa je ma ji ma jobino lamo jomiyo i sanduku.

¹⁰Kisi ka joneno nike pesa oromo i sanduku, jandiko pa kere kodi jadwoŋ pa jocway ri Were i wi migam oyido jokwano to jotweyo i mugowa pesa m'olimere i Ot pa Rwoth.

¹¹Ka jotieko ndiko welo pesa m'otire, oyido joketho i cingi cwo ma joneno paka iyiko Ot pa Rwoth, aka jome oyido joculo jopac, jogeto

¹²jogeto kor ot kodi joŋadi telin, jonyewo mbawo kodi telin m'ioro, to joculo pesa ma tic man je.

¹³To pesa me k'oor ma timo kikopere ma feza, acero, gwarin, kosa gigipiny ma tala kosa gigipiny man je ma feza kosa zahabu.

¹⁴Oor je ma culo jotic kodi nyewo gigipiny m'oor ma yiko Ot pa Rwoth.

¹⁵Cwo m'oyido joneno paka iyiko Ot pa Rwoth oyido jotimo adieri, ameno k'openji jo tito nger ma jo oro iye pesa.

¹⁶Pesa ma mic ma cul kodi pesa ma mic mareco k'okethi i sanduku; oyido obedo apa jocway ri Were i wi migam.

¹⁷I hongo no kere Hazael omonjo tindi madwoŋ Gath to mako, to yiko monjo Yerusalem.

¹⁸Kere Yowas ma Yuda okwanyo mic je ma Yehosafat, Yehoram, kodi Ahazia oyido jomiyo Rwoth, omedo kwoŋ mic pere kodi zahabu je m'oyido nitie i kakan ma Ot pa Rwoth kodi i cel pa kere, aka odhiro ri Hazael to Hazael eye Yerusalem.

¹⁹Gigipiny man je ma kere Yowas otimo ondiki i kitawo ma kigana ma mako kwoŋ kerin ma Yuda.

²⁰Jodhum pere jocamo rigo sereko to joneko go i ot m'oyido ogeti i lowo m'opoŋ yuwok ceŋ ma Yerusalem, i yo ma kidho piny i Sila.

²¹Obedo jodhum pere Yozakar wod pa Simith kodi Yehozabad wod pa Soma ama joneko go. Oyiki go i kaliel pa kerin i tindin madongo pa Daudi, aka wode Amaziya olunjo go paka kere.