Read dhopadhola 2 Kerin 14 Bible Online

2 Kerin 14 - dhopadhola bible

2 Kerin 14

¹I oro mar'ario ma dhum pa Yehowas wod pa Yehoahaz paka kere ma Isiraili, Amaziya wod pa Yowas obedo kere ma Yuda

²munyo jaoro piero ario g'abic, aka odhumo i Yerusalem ma oro piero ario g'abuŋwen. Yokimere oyido obedo Yehoadin ma wok i Yerusalem.

³Go otimo gim'otire ruwaŋ Rwoth, to k'otimo paka kwari mere Daudi, kwanyo woko paka bamere Yowas.

⁴Go k'onyeko kalamo manyakafir, aka ji jomedere miyo cowirok kodi waŋo buban kenyo.

⁵Tekin Amaziya cwiny i dhum, oneko jodhum ma joneko bamere, kere.

⁶To go k'oneko nyithindho pajo, oluwo cik ma Rwoth omiyo Musa ni, “Jonywol kiripi neko jo ro reco pa nyithindho pajo, aka nyithindho kiripi neko ro reco pa jonywol pajo; to kisi nyatoro iripo neko ro reco pere won.”

⁷Amaziya oneko jolweny ma Edom 10,000 i milelo ma cumbi to mako tindi madwoŋ Sela aka olwoŋo ni Yokithel, nyinge ma fodi nitie gine kiri konon.

⁸Kenyo Amaziya ooro jomikwenda bongi kere Yehowas ma Isiraili, munyo mito jowolweny.

⁹To kere Yehowas dwoko ni, “Ndelo acel kasugu kudho i gote ma Lebanon odhiro mikwenda ri yath sida ni, ‘Miyan nyarin wonywomere gi wodan.’ Ogwaŋ madudi oluwo to nyono kasugu no piny.

¹⁰Onyo Amaziya, ikengila Joedom, aka ipoŋ gi noro. Yeŋ gi dwoŋ perin aka ibedi peco. Raŋo irango teko ŋey ipodhi, in kodi Yuda kanyacel?”

¹¹To Amaziya okwero winjo. Ameno Yehowas kere ma Isiraili oŋanjo gi cwo pere aka olwenyo gi Amaziya i Bethsemes i Yuda.

¹²Isiraili okengila Yuda, aka jolweny joringo pecin pajo.

¹³Yehowas otero Amaziya paka jatwec, aka obino Yerusalem to turo woko kor ot ma tindi madwoŋ wok i Waŋkac ma Efrayim tundo i Waŋkac ma Sonda, boro ma romo mita miya ario.

¹⁴Okwanyo feza je kodi zahabu je ma go onwaŋo, gigipiny je ma Ot pa Rwoth kodi lim je ma cel pa kere to tero i Samaria. Go bende omako ji.

¹⁵Gigipiny man je ma Yehowas otimo kiri gi tim pere ma miseni i lweny kwoŋ kere Amaziya ma Yuda ondiki i kitawo ma kigana ma mako kwoŋ kerin ma Isiraili.

¹⁶Yehowas otho aka oyiki go i kaliel pa kerin i Samaria, aka wode Yerobowam mar'ario olunjo go paka kere.

¹⁷Kere Amaziya okwo ma oro apar g'abic rumacen ma tho pa kere Yehowas ma Isiraili.

¹⁸Gigipiny man je ma Amaziya otimo ondiki i kitawo ma kigana ma mako kwoŋ kerin ma Yuda.

¹⁹Oyido ocan neko Amaziya, ameno go oringo i tindi madwoŋ Lakis. To jokwor pere joluwo go kenyo to joneko go.

²⁰Otiŋ delkwoŋe i kayina to itero i Yerusalem aka oyiki go i kaliel pa kerin i tindi madwoŋ pa Daudi.

²¹Kenyo ji ma Yuda joketho Uziya wode ma jaoro apar g'aucel paka kere.

²²Uziya omako Elath aka ogeto kendo to dwoko ri Yuda rumacen ma tho pa bamere.

²³I oro mar'apar g'abic ma dhum pa kere Amaziya wod pa Yowas paka kere ma Yuda, Yerobowam wod pa Yehowas obedo kere ma Isiraili, aka odhumo i Samaria ma oro piero aŋwen g'acel.

²⁴Otimo reco kwoŋ Rwoth, ka luwo kite pa Yerobowam wod pa Nebat, m'omiyo Isiraili timo reco.

²⁵Omako adec je m'oyido obedo apa Isiraili wok i ger ma Hamath tundo i Nam ma Araba, cungo kwoŋ wac ma Rwoth oluwo luwo bongi ŋeca pere jatuci wac Were Yona wod pa Amitay ma wok i Gath Hefer.

²⁶Kole Rwoth oneno nike litho pa Joisiraili oyido kec; oyido ongoye ŋat'okony jo.

²⁷To oyido k'obedo atoŋa pa Rwoth nike worey woko Joisiraili kicutho aka cil gi cil, ameno obotho jo luwo kwoŋ kere Yerobowam mar'ario.

²⁸Gigipiny man je ma kere Yerobowam mar'ario otimo, tim pere ma miseni, kodi nger m'odwok'iye Damasiko kodi Hamath ri Isiraili ondiki i kitawo ma kigana ma mako kwoŋ kerin ma Isiraili.

²⁹Yerobowam otho aka oyiki go i kaliel pa kerin, aka wode Zekaria olunjo go paka kere.