Read dhopadhola 2 Kerin 16 Bible Online

2 Kerin 16 - dhopadhola bible

2 Kerin 16

¹I oro ma dhum pa Peka wod pa Remalia, paka kere ma Isiraili, Ahaz wod pa Yotham obedo kere ma Yuda

²munyo jaoro piero ario aka odhumo i Yerusalem ma oro apar g'aucel. Go k'oluwo kite maber paka kwari mere Daudi; kwanyo woko otimo gima k'osangala Rwoth Were pere.

³To oluwo kite marac paka kerin ma Isiraili. Go omiyo kiri wode paka cowirok awaŋa ri cal, kanyo luwo gimienirok ma ji ma Rwoth oyido oriemo woko i piny no oyido jotimo munyo Joisiraili jobino kenyo.

⁴Ahaz omiyo cowirok to waŋo buban i kalamo cal je, i wi tendere, kodi i tiendi yen m'oyukino.

⁵Kenyo Rezin kere ma Siria kodi Peka kere ma Isiraili jomonjo Yerusalem aka jomako, to jok'okengila Ahaz.

⁶I hongo acel no kere ma Edom omako tindi madwoŋ Elath kendo, aka oriemo woko Joyuda m'oyido jobedo kenyo. Joedom jobedo kenyo kiri konon.

⁷Ahaz ooro cwo bongi Tiglath Pilesa, kere ma Asiria gi mikwenda ni, “Abedo ŋeca perin m'omiyere. Biye bothan kwoŋ kerin ma Siria kodi Isiraili ma jomonjan.”

⁸Ahaz okwanyo feza gi zahabu wok i Ot pa Rwoth kodi wok i kakan pa kere aka odhiro paka mic ri kere ma Asiria.

⁹Kere ma Asiria owinjo go, aka oŋanjo gi jolweny pere kwoŋ Damasiko omako to neko kere Rezin aka okadho gi ji i Kir paka jotwec ma lweny.

¹⁰Munyo kere Ahaz okidho Damasiko romo gi kere Tiglath Pilesa, oneno migam kenyo aka odhiro ri Uriya jacway ri Were i wi migam cal mere kodi gigipiny mathindho thindho je.

¹¹Ameno Uriya ogeto migam ma cale gine aka ocowo mafodi Ahaz k'odwoko.

¹²Munyo kere Ahaz odwoko wok i Damasiko oneno nike migam oyido orumo,

¹³aka omiyo iye cowirok awaŋa mar'ogwaŋe kodi ŋano, aka okonjo cowirok ma vini i wi migam kodi remo paka mic ma siem.

¹⁴Migam ma ywel m'oyido omiy Rwoth oyido nitie i dier migam manyen kodi Ot pa Rwoth, to Ahaz ocoro i thenge ma yumalo ma migam manyen.

¹⁵Kenyo kere Ahaz omiyo Uriya cik ni, “Or migam paran madwoŋ me ri cowirok awaŋa m'odikin kodi cowirok ma ŋano pa kere kodi ji, kodi mic pa ji ma vini. Konji iye remo mar'ogwaŋe m'omiy, to weyi migam ma ywel ran ma thieth.”

¹⁶Uriya otimo paka kere owodho or.

¹⁷Kere Ahaz okwanyo adec ma magal ma ywel m'oor i Ot pa Rwoth aka okwanyo galayere m'oyido nitie i wi jo; go bende okwanyo pipa ma ywel m'oyido nitie yuŋey thwondhe apar g'ario ma ywel to jengo jo i misingi ma tele.

¹⁸Aka ma kisangala kere ma Asiria, Ahaz bende okwanyo woko wema m'oyido ioro ma lamo i ndelo ma Sabato, to cego woko kama kere oyido donjo gine Ot pa Rwoth.

¹⁹Gigipiny man je ma kere Ahaz otimo ondiki i kitawo ma kigana ma mako kwoŋ kerin ma Yuda.

²⁰Ahaz otho aka oyiki go i limbo pa kerin i tindi pa Daudi madwoŋ, aka wode Hezekia olunjo go paka kere.