Read dhopadhola 2 Kerin 19 Bible Online

2 Kerin 19 - dhopadhola bible

2 Kerin 19

¹Munyo kere Hezekia owinjo radwok pajo, oyeco nangin pere i rem to ruko kutiya, aka okidho i Ot pa Rwoth.

²Ooro Eliakim m'oyido obedo jadwoŋ ma cel pa kere, Sebina jandiko ma kapido, kodi jatuci wac Were m'otegino bongi Isaya wod pa Amoz. Jo bende oyido joruko kutiya.

³Me a mikwenda m'omiyo jo waco ri Isaya ni, “Konon obedo ndelo ma kidamba, imiyo wan gir'acula aka wanitie i wickwot. Wacale dhako m'oyikere nywol, to meni loyo ma colo nyathi.

⁴Kere ma Asiria ooro jadhum pere madwoŋ yeto Were makwo. Weyi Rwoth Were perin wowinji yet me, aka womiy joma joluwo gir'acula. Riameno kway ri ji mawan ma jodoŋ.”

⁵Munyo Isaya owinjo mikwenda pa kere Hezekia,

⁶odhiro rigo radwok me, “Ikir'ibwoki r'atise ma ŋecin pa kere jowaco rin nike Rwoth kinyal bothin.

⁷Rwoth bino miyo kere ma Asiria winjo pokopoko ma bino miyo go gik i piny pere, aka Rwoth bino miyo woneki go kenyo.”

⁸Jadhum ma Asiria odok, aka onwaŋo nike kere ma Asiria oyido lwenyo gi tindi madwoŋ Libina, ameno okidho kenyo penjo kere.

⁹Aka munyo kere ma Asiria owinjo nike kere Tirihaka ma Ethopiya oyido bino monjo jo, odhiro balwa ri kere Hezekia ma Yuda ni,

¹⁰“Were m'igeno owaco nike ikibino podho i cingan, to ikir'iyey gino wowondin.

¹¹Itieko winjo gima kere ma Asiria timo ri piny moro ma go mito reyo. Iparo nike ibino kwale?

¹²Kwarere paran joreyo woko tindin madongo Gozan, Haran, kodi Rezef to joneko ji ma Betheden m'oyido jobedo i Telasar, ongoye werin pajo m'onyalo botho jo.

¹³Kerin ma tindin madongo Hamath, Aripad, Sefarivayim, Hena, kodi Iva jonitie kune?”

¹⁴Kere Hezekia ojolo balwa wok i cingi jomikwenda to soma. Kenyo okidho i Ot pa Rwoth to ketho balwa no ruwaŋ Rwoth,

¹⁵aka okwayo ni, “Awi Rwoth, Were pa Isiraili m'obedo i wi cwec ma jobwombi gin, in kende a Were, ma dhumo keri je ma i piny. Icweyo piny kodi polo.

¹⁶Onyo Rwoth, neni gima timere riwan. Ciki ithin iwinji gima Senakerib waco je ma yetin, Were makwo.

¹⁷Adieri Rwoth, kerin ma Asiria jotieko reyo piny kweth, to josika woko lowo pajo,

¹⁸jowaŋo woko werin pajo m'oyido jok'obedo werin kada to cal ma yen kodi telin ma ji ama joyiko gi cingi gin.

¹⁹Riameno Rwoth Were mawan, akwayin, both wan kwoŋ Joasiria, ŋey nonin je ma piny jowoŋey nike in kende, awi Rwoth, iŋat'ibedo Were.”

²⁰Kenyo Isaya odhiro mikwenda ri kere Hezekia ni, “Rwoth, Were pa Isiraili waco ni, otieko winjo kwayo perin rigo ma mako kwoŋ Senakerib kere ma Asiria.”

²¹“Me a gima Rwoth waco ri Senakerib: Ji ma Yerusalem, jocayin aka jotimo ginyero kwoŋin. Jonyero, yu dieŋeyin.

²²Senakerib, ikwoŋan, ikoko ran, t'ipeko waŋin kwoŋan, Were pa Isiraili madwoŋ loyo.

²³Iweyo jodhum perin joyetan, Rwoth. Aka me a gim'iwaco, Atelo cawilin paran kweth, tundo i ŋawirok ma gote ma Lebanon. Aluthere i lul mere, aka aŋolo piny yen sida maber loyo, kodi yen madongo maboyo ma jaboke kweth.

²⁴Athwo jwombe je i lowo ma Misir, aka amadho pi, wok i jwombe ma an won akunyo.

²⁵Senakerib, onyo winji, gima an Rwoth awaco. Acano gime cango con. Aka ikiniaŋ kiri, nike an won, aŋat'amiyin timo gigipiny me. Amiyin kisika woko, tindin madongo m'otinda.

²⁶Kucel ji pajo jolocere, jobedo gi nyawin madwoŋ. Jocale mawuwa madudi, kosa lum ma nyaka twi, dongo i wi ot m'oriewere, to jothwo mafodi jok'otegino.

²⁷T'aŋeyo gima mako kwoŋin je, kiri gi nger m'imako nge swa kodan.

²⁸Atieko neno noro perin, kodi dakirok madit, m'initie gine ran. Onyo abino ketho siraget i umin, kodi kac paran i dhokin, to nyaka adwokin, kam'iwok'iye.”

²⁹Kenyo Isaya owaco ri kere Hezekia ni, “Me ranyuth ma gima kidho timere. Oro me kodi oro ma luwo ibino bedo gi ŋano madudi acama, to i oro mar'adek ibino nyalo cwoyo ŋano t'ikeco, aka ibino pidho yen vini t'icamo olemo mere.

³⁰Aka ji ma joboth i Yuda jobino pidhirok pa yen ma jorwako fuc piny i lowo aka jonyak olemo.

³¹Kole bino bedo ji ma jobino both i Yerusalem kodi got Zayon kwoŋbedo Rwoth omiyere miyo gime timirok.”

³²“Riameno me a gima Rwoth owaco kwoŋ kere ma Asiria ni, ‘Go kiladonjo i tindi madwoŋ me kosa celo asere kad'acel kwoŋe. Ongoye jolweny ma jonitie gi kwote ma jobino core cegin gi tindi madwoŋ, aka jok'othoki mako.

³³Go bino gik gi yo acel m'obino gine, ma k'odonjo i tindi madwoŋ. An Rwoth, atieko waco.

³⁴Kole abino kikwonga tindi madwoŋ me botho, ro an won kodi cikirok m'atimo ri ŋeca paran Daudi.’ ”

³⁵Aka wor no won malaika pa Rwoth okidho i kambi pa Joasiria to neko jolweny 185,000 aka munyo ji jocewi odikin jonwaŋo joriere ma jotho.

³⁶Kenyo Senakerib kere ma Asiria owire to gik Ninivi.

³⁷Ndelo acel munyo go lamo i ot pa were pere Nisrok, wote ario, Adramelek kodi Sareza joneko go g'abor pajo to joringo i piny Ararat. Aka wode man Esarhadon olunjo go paka kere.