Read dhopadhola 2 Kerin 20 Bible Online

2 Kerin 20 - dhopadhola bible

2 Kerin 20

¹I hongo no kere Hezekia two omako aka obothi tho. Aka Isaya jatuci wac Were wod pa Amoz obino bongi Hezekia to waco rigo ni, “Rwoth waco ni, ‘Kethi gigipiny je i kare, kole ikibino bothi, ibino tho.’ ”

²Kenyo Hezekia owire to ŋiyo kor ot aka okwayo ni,

³“A Rwoth, mondo akwayin, poyi paka awotho ruwaŋin i adieri aka gi cunyan je. Aka atimo kisi gim'iwaco nike otire.” Rumacen Hezekia oywaki gi geregere.

⁴Aka mafodi Isaya k'otundo i dier diedipo ma cel pa kere, Rwoth owaco rigo ni,

⁵“Giki bongi Hezekia jadhum pa ji paran iwaci nike Rwoth, Were pa kwarin Daudi waco nike owinjo kwayo perin to neno pigi waŋin. Go bino bothin, aka i ndelo adek ibino nyalo kidho i Ot pa Rwoth.

⁶Go bino medin oro apar g'abic i kwo perin, aka labotho tindi madwoŋ Yerusalem kwoŋ kere ma Asiria; aka lakikwonga tindi madwoŋ me ro go won kodi cikirok m'otimo ri ŋeca pere Daudi.”

⁷Kenyo Isaya owaco ri ŋecin pa Hezekia nike jowokethi nyandere m'onyadhi i bur pa Hezekia ŋey wobothi.

⁸Kere Hezekia openjo Isaya ni, “Aŋo ma nyutho nike Rwoth bino bothan, aka nike i ndelo adek abino nyalo kidho i Ot pa Rwoth?”

⁹Isaya odwoko ni, “Me ranyuth rin wok bongi Rwoth, nike Rwoth bino timo gima go ociko. Onyo imito nike tipo wokadhi yumalo madala apar, kosa wogiki cen madala apar?”

¹⁰Hezekia odwoko ni, “Obedo gima yot miyo tipo kadho yuwiye. Miy wogiki cen.”

¹¹Isaya okwayo Rwoth, aka Rwoth omiyo tipo gik cen madala apar i wi gi kwano sawa ma kere Ahaz oyido ogeto.

¹²I hongo no kere ma Babilon Merodak Baladan wod pa Baladan owinjo nike kere Hezekia oyido two, aka ooro jomikwenda gi balwa kodi mic.

¹³Hezekia ojolo jo aka onyutho jo lim pere, feza pere kodi zahabu, gigipiny maŋwe kur, kodi gilweny pere. Hezekia onyutho jo lim ma keri pere je.

¹⁴Kenyo jatuci wac Were Isaya obino bongi Hezekia to penjo ni, “Cwo me jowok kune aka jowaco ri aŋo?” Hezekia odwoko ni, “Jowok i piny mabor swa Babilon.”

¹⁵Isaya openjo Hezekia ni, “Aŋo ma joneno i cel pa kere?” Hezekia odwoko ni, “Joneno gigipiny je. Anyutho jo gigipiny je.”

¹⁶Kenyo Isaya owaco ri kere ni, “Rwoth Majameni Je waco ni,

¹⁷ ‘Neni, ndelo bino ma gigipiny je ma cel pa kere perin, gigipiny je ma kwarere mewin in jokano tundo konon, ibino tiŋo woter i Babilon. Ongoye gima bino doŋ.

¹⁸Aka megi kwoŋ wotin won, m'inywolo ibino tero jo bedo cwo ma lur i cel pa kere pa kere ma Babilon.’ ”

¹⁹Kere Hezekia oniaŋ nike mikwenda me nyutho nike siem kodi kwe piny bino bedo i hongo pere ma dhum, ameno odwoko ni, “Mikwenda m'imiyan wok bongi Rwoth ber.”

²⁰Gigipiny man je ma Hezekia otimo, tim pere ma miseni, kodi nger m'okuny'iye gikano pi to kelo pi i tindi madwoŋ ondiki i kitawo ma kigana ma mako kwoŋ kerin ma Yuda.

²¹Hezekia otho, aka wode Manase olunjo go paka kere.