Read dhopadhola 2 Kerin 22 Bible Online

2 Kerin 22 - dhopadhola bible

2 Kerin 22

¹Yosia obedo kere ma Yuda munyo jaoro aboro, aka odhumo ma oro piero adek g'acel i Yerusalem. Yokimere Yedida oyido nyar Adaya ma wok Bozkath.

²Yosia otimo gim'osangala Rwoth, oluwo kite pa kwari mere Daudi, ma k'otangatanga racuc kosa racam.

³I oro mar'apar g'aboro ma dhum pa Yosia, ooro Safan jandiko wod pa Azaliya aka nyakwar Mesulam i Ot pa Were gi cik ni,

⁴“Kidhi bongi Hilikia jadwoŋ pa jocway ri Were i wi migam womiyin welo ma pesa ma jocway ri Were i wi migam ma jotiyo i waŋkac jocoko wok bongi ji.

⁵Waci rigo womiy cwo ma joneno nger m'iyiko Ot pa Rwoth jowoculi

⁶jopac, jogeto, kodi jondijo ma geto, aka jowonyew mbawo kodi telin m'ioro ma yiko Ot pa Rwoth.

⁷To wikiri wipenji kwan ma pesa ma wimiyo, kole jo jogenere.”

⁸Safan omiyo Hilikia cik pa kere, aka Hilikia owaco rigo nike onwaŋo kitawo ma Cik i Ot pa Rwoth. Hilikia omiyo Safan kitawo to soma.

⁹Kenyo Safan ogik bongi kere aka okowo rigo ni, “Ŋecin perin jotieko tero pesa m'oyido nitie i Ot pa Rwoth aka jomiyo cwo ma joneno nger m'iyiko iye Ot pa Rwoth.”

¹⁰Kenyo Safan kendo owaco ri kere ni, “Anitie ka gi kitawo ma Hilikia omiyan.” Safan osoma malo ri kere.

¹¹Aka munyo kere owinjo wac ma kitawo ma Cik, oyeco woko nangin pere.

¹²Kenyo kere ooro Hilikia, Ahikam wod pa Safan, Akibor wod pa Mikaya, Safan jandiko, kodi Asaya ŋeca pa kere ni,

¹³“Kidhi win wipenji ran kodi ji ma Yuda Rwoth fonji ma kitawo me. Rwoth omako nge gi wan kwoŋbedo kwarere mawan jok'otimo gima kitawo me waco nike iripo timo.”

¹⁴Hilikia, Ahikam, Akibor, Safan, kodi Asaya jokidho penjo dhako m'ilwoŋo ni Hulida, jatuci wac Were m'oyido bedo i kama nyen loyo i Yerusalem. (Cwore Salum, wod pa Tikiva aka nyakwar Harhas oyido kuro kanzin ma Ot pa Rwoth.) Jotito rigo gim'otimere,

¹⁵aka Hulida ooro jo gik bongi kere jowowaci rigo

¹⁶mikwenda me m'owok bongi Rwoth, “Neni, abino miyo Yerusalem kodi ji mere je gir'acula, paka ondiki i kitawo ma kere osoma.

¹⁷Jokweran aka jomiyo cowirok ri werin man to jokwinyo nge paran gi gima jotimo. Nge paran oliel kwoŋ Yerusalem, aka kilakwe.

¹⁸To ri kere ma Yuda, m'ooro win penjo Rwoth, wac win rigo ama, Rwoth, Were pa Isiraili waco nike iwinjo wac m'ondiki i kitawo,

¹⁹aka ipusere t'imwole ruwaŋan, iyeco nangin perin t'iywaki munyo iwinjo nger m'atisa miyo Yerusalem kodi ji mere gir'acula. Abino miyo wobedi kabedo ma bwoko jo, kabedo ma ji jobino oro nyinge ma kwoŋo. To atieko winjo kwayo perin,

²⁰aka akibino kelo gir'acula i Yerusalem kafodi ikwo, Abino weyin itho i siem.” Cwo no jogik bongi kere Yosia gi mikwenda me.