Read dhopadhola 2 Kerin 4 Bible Online

2 Kerin 4 - dhopadhola bible

2 Kerin 4

¹Onyo citho ma kitipa pa jotuci wac Were okidho bongi Elisa to waco rigo ni, “Jadwoŋ, cworan otho! Paka iŋeyo, go oyido woro Were, t'onyo pama ŋat'oyido banja go pesa obino tero wotan paka cul ri banja pa cworan.”

²Elisa openjo citho no ni, “Atim rin aŋo? Waci ran aŋo m'initie gine peco?” Aka citho odwoko ni, “Ongoye gimoro kwanyo woko agwata mo.”

³Kenyo Elisa owaco rigo ni, “Wok woko, kway joger perin agwatin ma ninono.

⁴Kenyo in kodi wotin donji win i ot, cegi thigo, aka icaki konjo mo iy'agwatin. Kethi kisi m'opoŋ gicen.”

⁵Ameno dhako no odonjo i ot pere gi wote, ocego thigo, okwanyo agwata mathin ma mo nitie iye, aka okonjo mo i agwatin ka wote jokelo rigo.

⁶Munyo agwatin je jopoŋ, openjo ka agwata man oyido nitie. Acel kwoŋ wode odwoko ni, “Ongoye man.” Aka mo ocok cwer.

⁷Dhako no ogik bongi Elisa jatuci wac Were m'owaco rigo ni, “Tana mo aka iculi banjin perin, aka in kodi wotin wikwo gi m'odoŋ.”

⁸Ndelo acel, Elisa okidho Sunem, aka dhako m'oŋaŋ ma bedo kenyo olwoŋo go cemo i ot pere. Ameno noknok ka Elisa okidho Sunem oyido cemo i ot pa dhako no.

⁹Aka dhako no owaco ri cwore ni, “Neni onyo, aniaŋ nike jacwo ma noknok bino ka, obedo ŋataleŋ.

¹⁰Weyi wageti rigo kisika mathin i wi ot, waketh'iye meza, kom, kodi tala, ŋey go wobedo kenyo kisi ka owendo riwan.”

¹¹Ndelo acel Elisa odwoko i Sunem to idho ywomirok i kisika no.

¹²Owaco ri Gehazi ŋeca pere wokidhi wolwoŋi dhako no. Munyo dhako no obino,

¹³Elisa owaco ri Gehazi ni, “Penji go gim'anyalo timo rigo ro mindin je ma go obedo gine riwan. Poyi go mitan akidhi bongi kere kosa jamituka jolweny akethi rigo wac maber.” Dhako no odwoko ni, “Anitie gi gim'amito je i dier ji paran won.”

¹⁴Elisa openjo Gehazi ni, “Aŋo m'atimi rigo?” Gehazi odwoko ni, “Adieri go ongoye gi wode aka cwore oti.”

¹⁵Elisa owaco ri Gehazi ni, “Lwoŋ go wobin ka.” Dhako no obino to cungo i dhiot,

¹⁶aka Elisa owaco rigo ni, “I hongo me oro ma bino, ibino bedo gi wodin.” Dheno odwoko ni, “Be jadwoŋ, in ibedo jacwo pa Were, ikir'iwondan!”

¹⁷To paka Elisa oyido owaco, cegin i hongo no oro ma luwo dheno onywolo wode.

¹⁸Munyo nyathi otieko dongo, oluwo bamere ndelo acel i dier jokeco.

¹⁹Aka owaco ri bamere dicel ni, “Wiyan fudhan! Wiyan fudhan!” Bamere owaco ri ŋeca pere ni, “Ter jayac bongi min.”

²⁰Aka munyo otiek tero nyathi bongi min, min otiŋo go i tiende tundo sawa aucel to tho.

²¹Yokimere okidho to rieyo go i wi kitanda pa Elisa to cego thigo.

²²Kenyo dheno olwoŋo cwore aka owaco rigo ni, “Or ran ŋeca gi punda. Amito kidho bongi jatuci wac Were Elisa. Abino dwoko piyo.”

²³Cwore openjo go ni, “Raŋo ikidhi bonge konon? K'obedo ndelo ma dwe manyen kosa Sabato.” Dheno odwoko ni, “Ikir'irembi.”

²⁴Kenyo go oidho punda, aka omiyo ŋeca pere cik ni, “Miy punda ringo piyo swa, aka ikir'ikadhi moth kono k'awaco rin.”

²⁵Ameno dheno okadho, aka jotundo i got Kamel kama Elisa oyido nitie iye. Elisa oneno go bino munyo go fodi nitie bor, aka owaco ri Gehazi ŋeca pere ni, “Neni, dhako ma wok Sunem eno bino!

²⁶Redi bonge ipenji ka kisi gimoro ber gi go, cwore, kodi wode.” Go owaco ri Gehazi nike kisi gimoro ber.

²⁷To munyo otundo wi got bongi Elisa, okule piny ruwaŋe Elisa to mako tiende. Gehazi oyido cegin ywayo go woko, to Elisa owaco rigo ni, “Weyi go, ikineni nike go nitie i litho makec, aka Rwoth okano kwoŋan, k'owaco ran.”

²⁸Dheno openjo Elisa ni, “Jadwoŋ, cango akwayin ye nyathi? Ndelo no akiwaco rin nike ikir'iwondan?”

²⁹Elisa owaco ri Gehazi ni, “Redi! Kwany luth paran i cingin aka ikadhi. Ikir'icungi motho ŋat'iromo gine je, aka ikir'idwoki ŋat'omothin je. Kadhi tirtir iriey luth paran i wi nyathi.”

³⁰Kenyo yok nyathi owaco ri Elisa ni, “Akwoŋere i nyingi Rwoth makwo kodi rin nike akibino weyin!” Ameno jario jocako woth dok.

³¹Gehazi okadho yuwiye to rieyo luth i wi nyathi to ngoye derino kosa ranyuth ma kwo. Ameno ogik romo gi Elisa aka owaco ni, “Jayac k'ocew.”

³²Munyo Elisa odonjo i ot, oneno nyathi oriere m'otho i wi kitanda pere.

³³Ameno odonjo to cego thigo to kwayo Rwoth.

³⁴Kenyo oriere kwoŋ nyathi, ka ketho dhoke i dhok nyathi, waŋe i waŋ nyathi, kodi cinge i cingi nyathi aka kwoŋ nyathi ocako bedo malieth.

³⁵Elisa oay to wotho i dier ot aka ogik to riere kendo kwoŋ nyathi. Nyathi ogiro dibirio to yawo waŋe.

³⁶Elisa olwoŋo Gehazi aka owaco rigo lwoŋo yok nyathi. Munyo dheno obino, owaco rigo ni, “Wodin ee.”

³⁷Dheno obino to podho i tiendi Elisa to kule piny, okwanyo nyathi pere to kadho.

³⁸Elisa ogik Gilgal kendo munyo kec nitie i piny. Munyo go fonjo jotuci wac Were, owaco ri ŋeca pere nike wokethi dak i mac wotedi rijo kado moro.

³⁹Acel kwoŋ jo okidho i ndelo omo yen moro. Onwaŋo olemo madudi to fono akendin mere kweth m'onyalo tiŋo. Odwoko to ŋado jo to konjo i dak ma go k'oŋeyo nike obedo aŋo.

⁴⁰Munyo otok rijo camo, tekin jobilo, jokoko ri Elisa ni, “Oyiri aka kicamere!”

⁴¹Elisa okwayo cemo moro, obolo i dak aka owaco ni, “Tok rijo cemo moro kendo.” Aka ongoye gim'orac gine.

⁴²I hongo man jacwo obino wok Bal Salisa kelo ri Elisa mugat piero ario m'otimi gi bale m'okec marapena i oro no kodi withi ŋano ma nyaka okec. Elisa owaco ri ŋeca pere nike wopidhi gine kitipa pa jotuci wac Were.

⁴³To ŋeca pere odwoko ni, “Iparo nike gime romo cwo miya acel.” Elisa odwoko ni, “Miy jo jowocami, kole Rwoth waco nike jobino camo to man doŋ.”

⁴⁴Ameno ŋeca pere oketho cemo ruwaŋ jo, aka paka Rwoth oyido owaco, joje jocamo to man doŋ.