Read dhopadhola 2 Kerin 7 Bible Online

2 Kerin 7 - dhopadhola bible

2 Kerin 7

¹To Elisa dwoko ni, “Winji gima Rwoth waco: Rwoth waco ama, ‘Kapa sawa me dikin ibino nyalo nyewo kilo adek ma ŋano maber loyo kosa kilo aucel ma bale gi feza acel i Samaria.’ ”

²Kenyo jakur pa kere ma kere oyido othenere i cinge owaco ri Elisa ni, “Gino kinyal timere; makada nende Rwoth won oyido dhiri ŋano dicel!” Elisa odwoko ni, “In won ibino neno gi waŋin, to ikibino camo cemo moro je.”

³Onyo oyido nitie cwo aŋwen mogo ma jodhowo i dhiot ma waŋkac ma Samaria, aka jowaco ni, “Raŋo wabedi ka cuka watho?

⁴Ongoye kony wan donjo i tindi madwoŋ kwoŋbedo wabino riyo kec kenyo; to ka wabedo ka bende, wabino tho. Ameno weyi wakidhi win i kambi pa Josiria, ka jowey ma jok'oneko wan wabino kwo, to ka jonek wan to watho.”

⁵Ameno munyo piny yutho, jokidho i kambi pa Josiria, aka munyo jotundo, panen, oyido dhano ongoye kenyo.

⁶Kole Rwoth oyido omiyo Josiria winjo dwondi gima mor pa jolweny madwoŋ, gi kayinin kodi cawilin to joparo nike kere ma Isiraili onyewo kerin ma Misir kodi jolweny pajo monjo jo.

⁷Ameno joringo woko ri kwo pajo munyo piny yutho to joweyo wema pajo, kayinin, kodi punde, aka joweyo kambi paka oyido nitie.

⁸Munyo cwo ma jotwo dhowo me jotundo, jodonjo i wema, jocemo, jomedho, aka jokadho gi feza, zahabu, kodi nangin ma jonwaŋo to jokano. Jogik, jodonjo i wema man aka jotimo gimoro acel.

⁹Kenyo jowaco wegi ni, “Wakitim gimo'tire. Konon obedo ndelo ma wac maber. Ka wanoliŋ tundo odikin adieri ibino miyo wan gir'acula. Onyo riameno weyi wakidhi wawaci ri jodhum pa kere!”

¹⁰Ameno jobino to jolwoŋo jokur ma waŋkac aka jowaco rijo ni, “Wakidho i kambi pa Josiria, aka neni, ongoye ŋata waneno kosa wawinjo luwo. Kwanyowoko punde kodi kayinin m'otwey aka wemin oyido jonitie nono.”

¹¹Kenyo jokur waŋkac jokidho aka jonyayo wac i cel pa kere

¹²Piny oyido fodi col, aka kere oay i kanindo pere to waco ri jodhum pere ni, “Weyi awaci riwin gima Josiria jocano timo riwan. Joŋeyo nike kec nitie ka, ameno joweyo kambi pajo kadho pondo kam'othangere. Joparo nike wabino weyo tindi madwoŋ rango cemo ŋey jowomaki wan makwo to jomako tindi madwoŋ.”

¹³Acel kwoŋ jodhum pa kere owaco ni, “Ji ma tindi madwoŋ me je jonitie i kidamba paka ma jotieko tho. Ameno weyi waori cwo mogo gi kayinin abic ma jodoŋ ŋey waniaŋ gim'otimere.”

¹⁴Ameno joyero cwo mogo, aka kere ooro jo gi cawilin ario to ciko jo kidho niaŋ gim'otimere ri jolweny pa Josiria.

¹⁵Cwo no jokadho tundo kiri Yordan, aka i yo malomalo joneno nangin kodi gigipiny ma Josiria jobolo munyo joringo. Kenyo jogik to jokowo ri kere.

¹⁶Kenyo ji ma Samaria joredo aka jonyaga kambi pa Josiria. Aka paka Rwoth oyido owaco, kilo adek ma ŋano maber loyo kosa kilo aucel ma bale oyido itana feza acel.

¹⁷Onwaŋere nike kere ma Isiraili oyido oketho jakur pere m'othenere i cinge kuro waŋkac. Ji jonyono go to tho paka Elisa oyido owaco munyo kere okidho bongi Elisa.

¹⁸Elisa oyido owaco ri kere nike kapa sawa no ndelo ma yawere kilo adek ma ŋano kosa kilo aucel ma bale ibino nyewo gi feza acel,

¹⁹ma jakur pere opiemo to dwoko ni, “Gino kinyal timere makada nende Rwoth won gipi oyido dhiri ŋano!” Aka Elisa odwoko go ni, “In won ibino neno gi waŋin, to ikibino camo cemo moro je.”

²⁰Aka meno a gim'otimere rigo, kole ji jonyono go to tho i waŋkac ma tindi madwoŋ.