Read dhopadhola 1 Kigana kwoŋ Kerin 11 Bible Online

1 Kigana kwoŋ Kerin 11 - dhopadhola bible

1 Kigana kwoŋ Kerin 11

¹Kenyo nonin je ma Isiraili jobino bongi Daudi i Hebron aka jowaco rigo ni, “Neni, wabedo ji acel aka remo acel.

²Cango munyo Saulo oyido fodi kere mawan, oyido itelo Joisiraili i lweny aka Rwoth ocikin nike ibino telo ji pere to ibedo jadhum pajo.”

³Ameno jotel ma Isiraili je jobino bongi Daudi i Hebron; aka kere Daudi otimo gi jo cikirok ruwaŋ Rwoth aka jowiro Daudi gi mo bedo kere ma Isiraili cungo kwoŋ wac ma Rwoth owaco ri Samwiri.

⁴Daudi kodi Joisiraili je joŋanjo kadho i Yerusalem, meno Yebus, kama Joyebus oyido jonitie iye, ji ma lowo no.

⁵Joyebus jowaco ri Daudi ni, “Ikiladonjo ka.” To makada nende, Daudi omako kapondo Zayon, ma pama ilwoŋo ni tindi madwoŋ pa Daudi.

⁶Daudi oyido owaco ni, “Ŋat'otel monjo Joyebus labedo jamituka jolweny!” Aka Yowab wod pa Zeruya am'otelo monjo to bedo jamituka.

⁷Daudi okadho bedo i kapondo Zayon, aka ocaki lwoŋo nike tindi madwoŋ pa Daudi.

⁸Daudi ogeto tindi madwoŋ me thoko, cako i kam'oyido othor iye piny tundo yuthenge ma yuwok ceŋ matendere, aka Yowab oyiko thenge m'odoŋ je.

⁹Daudi omedo lokirok matek, kole Rwoth Were pa lwak jolweny oyido nitie gi go.

¹⁰Me a nyingi jolweny pa Daudi ma jotek. Kanyacel kodi Joisiraili, jokonyo go bedo kere, paka Rwoth oyido ociko; aka jokuro ker pere matek.

¹¹Marapena obedo Yasebim janono pa Hakmon m'otelo ji adek lweny gi cwo 300 aka joneko joje i lweny acel.

¹²Ŋata luwo go kwoŋ cwo adek ma jotek me oyido obedo Eliazar wod pa Dodo janono pa Aho.

¹³Go oyido nitie gi Daudi munyo Jofilistia jocokere kenyo lweny i Pas Damim, aka cwo ma Isiraili joringo.

¹⁴To go kodi Daudi jocungo i dier ndelo aka jolwenyo gi Jofilistia. Rwoth imiyo go loyo madwoŋ.

¹⁵Ndelo acel, cwo adek kwoŋ cwo piero adek ma jotek joloro piny i ŋungu ma Abidulam, kama Daudi oyido nitie iye, kucel kitipa pa Jofilistia oyido joketho kambi i milelo Refayim.

¹⁶I waŋceŋ no Daudi oyido nitie kam'okanere, aka Jofilistia oyido jonitie i Bethelehem.

¹⁷Daudi owinjo nike mito dok peco aka owaco ni, “Bedi nyatoro moro oyido nyalo miyan pi amadha wok i waŋ pi manitie i waŋkac ma Bethelehem!”

¹⁸Kenyo cwo adek ma joŋeyere jorire gi i kambi pa Jofilistia, jotwomo pi wok i waŋ pi ma waŋkac ma Bethelehem, aka jokelo ri Daudi. To Daudi k'onyalo madho; to konjo woko paka mic ri Rwoth,

¹⁹aka owaco ni, “Rwoth, akinyali madho pi me! Dinyo ocale p'amadho remo pa cwo me ma jojala kwo pajo!” Ameno go okwero madho.

²⁰Abisay omin Yowab, aka wod pa Zeruya am'oyido obedo jatel pa cwo piero adek ma jotek. Go olwenyo g'abor pere kodi cwo 300 to neko jo, aka oŋeyere swa kwoŋ cwo adek.

²¹Go oyido oŋeyere swa kwoŋ cwo piero adek, aka obedo jamituka pajo; to go oyido k'oŋeyere swa paka cwo adek ca.

²²Benaya wod pa Yehoyada ma wok Kabizel bende oyido obedo jacwo ma jamaker; otimo gigipiny madongo kweth, to neko kiri jolweny madongo ario ma Jomowab. Ndelo moro go odonjo i bur munyo pe cwe to neko simbwor.

²³Go bende oneko jacwo m'ogaŋere ma Jamisir m'oyido nitie gi toŋ. Benaya omonjo go g'abiro, aka omayo Jamisir toŋ wok i cinge to neko go gine.

²⁴Me a tim ma miseni ma Benaya wod pa Yehoyada otimo, aka omiyo go nyinge kwoŋ cwo adek ca.

²⁵Go oyido oŋeyere kwoŋ cwo piero adek, to oyido k'oŋeyere swa paka cwo adek ca. Aka Daudi oketho go paka jatel pa jokur pere.

²⁶Me a cwo pa Daudi ma jomaker; Asahel omin Yowab oyido obedo acel kwoŋ cwo piero adek; Elihanan wod pa Dodo ma wok Bethelehem,

²⁷Samoth ma wok i Harod, Helez ma wok i Pelet,

²⁸Ira wod pa Ikes ma wok Tekowa, Abieza ma wok Anathoth,

²⁹Sibekay ma wok Husa, Ilay ma wok Aho,

³⁰Maharay ma wok Netofa, Heled wod pa Bana ma wok Netofa,

³¹Ithay wod pa Ribay ma wok Gibeya i Benyamin, Benaya ma wok Pirathon,

³²Huray ma wok milelo cegin gi Gas, Abiel ma wok Ariba,

³³Azimaveth ma wok Baharum, Eliaba ma wok Salibon,

³⁴Hasem ma wok Gizon, Yonathan wod pa Sage ma wok Harar,

³⁵Ahiyam wod pa Sakar ma wok Harar, Elifal wod pa Ur,

³⁶Hefer ma wok Mekera, Ahija ma wok Pelon,

³⁷Heziro ma wok Kamel, Naray wod pa Ezibay,

³⁸Yowel omin Nathan, Mibihar wod pa Hagar,

³⁹Zelek ma wok Amon, Nahor ma wok Beroth, aka jago pa Yowab wod pa Zeruya,

⁴⁰Ira kodi Gareb ma jowok Jatir,

⁴¹Uriya Jahiti, Zabad wod pa Alay,

⁴²Adina wod pa Siza (jatel i nono pa Ruben, kodi kitipa pere won ma jolweny piero adek)

⁴³Hanan wod pa Maka, Yosafat ma wok Mithan,

⁴⁴Uziya ma wok Asitera, Sama kodi Yehiel wot Hotham ma wok Arower,

⁴⁵Yediael wod pa Simiri, kodi omin Yoha ma jowok Tiza,

⁴⁶Eliel ma wok Mahava, Yeribay kodi Yosavia wot Elinam, Ithima ma wok Mowab,

⁴⁷Eliel, Obed, kodi Yasiel ma jowok Zoba.