Read dhopadhola 1 Kigana kwoŋ Kerin 12 Bible Online

1 Kigana kwoŋ Kerin 12 - dhopadhola bible

1 Kigana kwoŋ Kerin 12

¹Me a ji ma jobino bongi Daudi i Ziklag, munyo oyido go kinyal woth paka mito kwoŋbedo Saulo wod pa Kisi. Jobedo acele cele kwoŋ jolweny matek ma jokonyo go i lweny.

²Oyido jonyalo celo aserin kosa dwiro telin gi cingi gin maracuc kosa maracam, aka oyido jobedo jonono pa Benyamin, wade pa Saulo.

³Jatel oyido obedo Ahiyeza, Yowas, joje wot Sema ma wok Gibeya. Yehiel kodi Pelet wot Azimaveth, Beraka, Yehu ma wok Anathoth,

⁴Isimaya ma wok Gibeon, jalweny matek kwoŋ cwo piero adek aka jatel pajo; Yeremia, Yahaziel, Yowanan, kodi Yozabad ma wok Gedera.

⁵Eluzay, Yerimoth, Belia, Semaria, kodi Sefatiya ma wok Harif.

⁶Elikana, Isia, Azarel, Yoezer, kodi Yasobeyam ma jo wok Kora.

⁷Yowela kodi Zebadia, wot Yeroham ma wok Gedor.

⁸Me a nyingi jolweny matek wok i nono pa Gad ma joriwere gi jolweny pa Daudi munyo go nitie i thim. Oyido joŋeyo swa oro kwote kodi abor, joger paka simbwore, aka jodwir paka amudhe ma got.

⁹Jatel obedo Ezer, Obadia obedo mar'ario, Eliab mar'adek,

¹⁰Misimana mar'aŋwen, Yeremia mar'abic,

¹¹Atay mar'aucel, Eliel mar'abirio,

¹²Yowanan mar'aboro, Elizabad mar'abuŋwen,

¹³Yeremia mar'apar kodi Makibanay.

¹⁴Cwo megi wok i nono pa Benyamin oyido jobedo jotel ma cwo gana, kodi cwo miya.

¹⁵Me a cwo ma joŋado malawa Yordan munyo pi mol i thenge mere i dwe marapena, to jokedho ji m'oyido jobedo i milelo yuwok ceŋ kodi yupodho ceŋ ma malawa.

¹⁶Jonono pa Benyamin megi kodi jonono pa Yuda jobino bongi Daudi kama go oyido opond'iye.

¹⁷Daudi okadho romo gi jo aka owaco rijo ni, “Ka wibino paka merin konyan, afoyo gi neno win. Riwere win gi wan! To ka wimito camo ran sereko ri jokwor paran, makada nende akitemo timo riwin raco, Were pa kwarere mawan laŋeyo to miyo win gir'acula.”

¹⁸Kenyo cuny pa Were obino kwoŋ Amasay, jatel pa cwo piero adek, aka owaco ni, “Wabedo aperin, awi Daudi; aka kodin, awi wod pa Yese! Siem rin, aka siem ri jono ma jokonyin! Kole Were perin ama konyin.” Kenyo Daudi ojolo jo, aka oketho jo jotel jolweny pere.

¹⁹Jolweny megi wok i nono pa Manase joriwere gi Daudi munyo obino gi Jofilistia lweny gi Saulo. Kucel go k'okonyo Jofilistia, kole kerin pajo jolworo nike Daudi oyido nyalo camo rijo sereko ri jadwoŋ pere Saulo, ameno jodhiro dok i Ziklag.

²⁰Me a jolweny ma nono pa Manase ma joriwere gi Daudi munyo odwoko: Adina, Yozabad, Yediael, Mikaili, Yozabad, Elihu kodi Zilethay. Jomituka ma kitipin ma cwo gana.

²¹Jotiyo ri Daudi paka jomituka pa jolweny pere kwoŋbedo oyido jobedo jolweny matek. Rumacen jobedo jomituka pa jolweny pa Joisiraili.

²²Kole kisi ndelo cwo manyen joriwere gi jolweny pa Daudi, cuka jolweny pere jolokere madwoŋ, paka jolweny pa Were.

²³Me a welo ma kitipin pa jolweny ma jobino bongi Daudi i Hebron wiro ker pa Saulo wobedi apa Daudi, cungo kwoŋ wac pa Rwoth.

²⁴Wok i nono pa Yuda, cwo m'otiek jo aka ma jonitie gi kwote kodi abor obedo 6,800.

²⁵Wok i nono pa Simeo obedo cwo 7,100 m'otiek jo.

²⁶Wok i nono pa Levi obedo cwo 4,600.

²⁷Yehoyada, nyakwar Aron, kodi cwo 3,700.

²⁸Zadok, jayac ma jalweny, kodi jomituka piero ario g'ario ma jobedo wade pere.

²⁹Wok i nono pa Benyamin, nono pa Saulo obedo cwo 3,000. Jonono pa Benyamin madit mere jomedo woro Saulo.

³⁰Wok i nono pa Efrayim obedo cwo 20,800 jolweny matek aka ma joŋeyere i pecin pajo.

³¹Wok i nono ma yupodho ceŋ ma Manase obedo cwo 18,000 m'oyer kadho ketho Daudi kere.

³²Wok i nono pa Isakar, obedo jotel 200 kanyacel gi cwo m'oyido jotelo. Cwo me oyido joŋeyo gima Isiraili ripo timo kodi sawa maber wotim'iye.

³³Wok i nono pa Zebulun obedo cwo 50,000 ma joŋeyo oro kisi gilweny aka joyikere konyo Daudi gi atoŋa acel.

³⁴Wok i nono pa Nafital obedo jotel 1,000 kanyacel gi cwo 37,000 ma jonitie gi kwote kodi abor.

³⁵Wok i nono pa Dan cwo 28,600 m'otiek.

³⁶Wok i nono pa Asiha cwo 40,000 ma joyikere lweny.

³⁷Nonin ma yuwok ceŋ ma Yordan; nono pa Ruben, Gad kodi yuwok ceŋ ma Manase obedo cwo 120,000 ma joŋeyo oro kisi gilweny.

³⁸Jolweny me je, ma joyikere lweny, jokadho i Hebron, gi kinen ma ketho Daudi kere ma Isiraili. Joisiraili ma jodoŋ je oyido joriwere gi atoŋa acel.

³⁹Jobedo kenyo gi Daudi ma ndelo adek, munyo jocemo aka jomedho, kole Joisiraili megi oyido jotedo rijo.

⁴⁰Aka joger pajo bende, wok bor cako i nono pa Isakar, Zebulun kodi Nafital, ji jokelo punde, ŋamia, dhok kodi rombo ma jotiŋo cemo, moko, nyandere m'othwo, vini kodi mo. Me je oyido nyutho siemirok m'oyido nitie i Isiraili gipi.