Read dhopadhola 1 Kigana kwoŋ Kerin 14 Bible Online

1 Kigana kwoŋ Kerin 14 - dhopadhola bible

1 Kigana kwoŋ Kerin 14

¹Hiram kere ma Tire ooro jomikwenda bongi Daudi gi kasike ma yath vini gi jobol ot, gi jogeto ot gi tele geto ri Daudi peco pa kere.

²Aka Daudi oniaŋ nike Rwoth oyido oyero go bedo kere ma Isiraili aka oyido tiŋo malo ker pere ro Joisiraili.

³I Yerusalem Daudi onywomo mon man, aka onywol rigo nyithindho man.

⁴Me a nyingi nyithindho m'onywol rigo i Yerusalem: Samuwa, Sobab, Nathan, Solomon,

⁵Ibihar, Elisuwa, Elifelet

⁶Noga, Nefeg, Yafiya

⁷Elisama, Beliada kodi Elifelet.

⁸Munyo Jofilistia jowinjo nike owir Daudi gi mo paka kere ma Isiraili, jolweny pajo jokidho dwaro go; to Daudi owinjo aka oŋanjo romo gi jo.

⁹Jofilistia jotundo i milelo Refayim to jocokere kenyo.

¹⁰Daudi openjo Rwoth ni, “Amonji Jofilistia? Inomiyan jo i cingan?” Rwoth odwoko ni, “Ey monji jo aka alamiyo jo i cingin.”

¹¹Ameno Daudi obino i Bal Perizim aka kenyo okengila Jofilistia. Daudi owaco ni, “Rwoth otieko baro i dier jokwor paran paka mikula pi.” Aka olwoŋi kenyo ni Bal Perazim.[2]

¹²Munyo Jofilistia joringo, joweyo cal pajo cen, aka Daudi gi cwo pere jotiŋo to jokadho gine.

¹³Jofilistia kendo jogik milelo Refayim aka jocokere kenyo.

¹⁴Daudi openjo Rwoth kendo, aka Rwoth odwoko go ni, “Ikir'imonji jo gi ka, to thoki jo aka iyikere monjo jo gi yuthenge ca, cegin gi yen m'ilwoŋo ni Balisam.

¹⁵K'iwinjo mayindo ma ŋanjo i wi yen, kenyo monji rupiri meno labedo ranyuth nike aŋanjo yuwiyin kikengila jolweny pa Jofilistia.”

¹⁶Daudi otimo paka Rwoth omiyo go or nike wotim, aka oneko Jofilistia wok i Geba tundo kiri Gezer.

¹⁷Dwoŋ pa Daudi otundo i kisi piny, aka Rwoth omiyo kisi piny lworo go.