Read dhopadhola 1 Kigana kwoŋ Kerin 15 Bible Online

1 Kigana kwoŋ Kerin 15 - dhopadhola bible

1 Kigana kwoŋ Kerin 15

¹Daudi ogeto ot pere won i tindi madwoŋ pa Daudi, aka oyiko kabedo ri Kakan ma Cikirok to geto wema mere.

²Kenyo Daudi owodho or nike Jolevi kende ama jowotiŋ Kakan ma Cikirok pa Were, kole jo ama Rwoth oyido oyero tiŋo kodi tiyo rigo cil gi cil.

³Ameno Daudi ocoko Joisiraili je i Yerusalem kelo Kakan ma Cikirok pa Rwoth i kabedo pere, ma go oyido oyiko.

⁴Kenyo ocoko kanyacel nyikway Aron kodi Jolevi.

⁵Wok i nono pa Kohath obino; Uriel, m'otelo wade pere 120.

⁶Wok i nono pa Merari obino Asaya, m'otelo wade pere 220.

⁷Wok i nono pa Gerisom obino Yowel, m'otelo wade pere 130.

⁸Wok i nono pa Elizafan obino Semaya, m'otelo wade pere 200.

⁹Wok i nono pa Hebron obino Eliel, m'otelo wade pere piero aboro.

¹⁰Wok i nono pa Uziel obino Aminadab, m'otelo wade pere 112.

¹¹Daudi olwoŋo jocway ri Were i wi migam; Zadok, Abiatha kodi Jolevi aucel, Uriel, Asaya, Yowel, Semaya, Eliel kodi Aminadab.

¹²Daudi owaco ri Jolevi ni, “Wiŋati wibedo jotel ma nonin pa Jolevi. Lokere win macil kodi Jolevi je, ŋey winyal kelo Kakan ma Cikirok pa Rwoth Were pa Isiraili i kabedo m'atieko yiko.

¹³Kwoŋbedo oyido wingoye ma tiŋo marapena, Rwoth Were omiyo wan gir'acula ro lamo go i nger ma kiripi.”

¹⁴Ameno jocway ri Were i wi migam kodi Jolevi jolokere macil ŋey jowokeli Kakan ma Cikirok pa Rwoth Were pa Isiraili.

¹⁵Jolevi jotiŋo i gute i goki jo, paka Rwoth omiyo Musa or.

¹⁶Daudi bende omiyo jotel pa Jolevi cik yero Jolevi m'opokere wer kodi tuko wer i tongol kodi ndara.

¹⁷Ameno Jolevi joyero Heman wod pa Yowel, wat pere Asaf wod pa Berekia kodi Ethan wod pa Kusaya wok i nono pa Merari.

¹⁸Bende joyero jome konyo jo: Zekaria, Jaziel, Semiramoth, Yehiel, Uni, Eliab, Benaya, Maseya, Matithia, Elifelehu kodi Mikineya. Jokur waŋkac Obed Edom kodi Jeyel.

¹⁹Jower, Heman, Asaf kodi Ethan oyido jotuko ndara ma ywel.

²⁰Zekaria, Aziel, Semiramoth, Yehiel, Uni, Eliab, Maseya kodi Benaya oyido jotuko tongol ma dwondi jo ma malo.

²¹Matithia, Elifelehu, Mikineya, Obed Edom, Jeyel kodi Azazia oyido jotelo gi tongol ma dwondi jo ma piny.

²²Kenania oyido obedo jatel pa Jolevi ma jower paka go oyido oŋeyo wer.

²³Berekia kodi Elikana oyido jobedo jokur ma Kakan ma Cikirok.

²⁴Sebania, Yosafat, Nethanel, Amasay, Zekaria, Benaya kodi Elieza, jocway ri Were i wi migam oyido jokudho gwara ruwaŋ Kakan ma Cikirok, aka Obed Edom kodi Jehia bende oyido jobedo jokur ma Kakan ma Cikirok.

²⁵Ameno kere Daudi, jotel pa Joisiraili, kodi jomituka jolweny jokadho i ot pa Ebed Edom omo Kakan ma Cikirok, aka jotimo kalima madwoŋ.

²⁶Aka kwoŋbedo Rwoth okonyo Jolevi m'oyido jotiŋo Kakan ma Cikirok pa Rwoth, jomiyo cowirok ma thwondhe abirio kodi wot rombo abirio.

²⁷Daudi oyido oruko kanzu ma nanga mafoth, paka Jolevi m'oyido jotiŋo Kakan ma Cikirok, kodi Kenania jatel pa jower bende. Daudi bende oyido oruko law pa jadwoŋ pa jocway ri Were i wi migam.

²⁸Ameno Joisiraili jokelo malo Kakan ma Cikirok pa Rwoth gi koko ma siemirok, derino ma gwara, milowe, ndara kodi wer ma tongol.

²⁹Paka oyido itero Kakan ma Cikirok pa Were i tindi madwoŋ, Mikal, nyar Saulo oleŋo waŋe gi dirisa aka oneno kere Daudi mielo ka por malo ruwaŋ Rwoth to cayo go i cunye.