Read dhopadhola 1 Kigana kwoŋ Kerin 16 Bible Online

1 Kigana kwoŋ Kerin 16 - dhopadhola bible

1 Kigana kwoŋ Kerin 16

¹Jokelo Kakan ma Cikirok pa Were to joketho i wema mere ma Daudi oyido ogero; aka jomiyo Rwoth cowirok awaŋa kodi ma siem.

²Aka munyo Daudi otieko miyo cowirok, omiyo ji silwany i nyingi Rwoth pa lwak Jolweny.

³Daudi opoko ji je, Joisiraili je, mon gi cwo, kisi nyatoro mugat gi muma riŋo abula, gi nyingi vini m'othwo.

⁴Daudi oyero Jolevi mogo telo lamo Rwoth, Were pa Isiraili, ruwaŋ Kakan ma Cikirok, ka jowero aka jopako go.

⁵Asaf oyido obedo jatel, aka Zekaria oyido konyo go. Jeyel, Semiramoth, Yehiel, Matithia, Eliab, Benaya, Obed Edom kodi Jeyel oyido jotuko tongol. Asaf oyido goyo ndara.

⁶Aka jocway ri Were i wi migam ario, Benaya kodi Yahaziel oyido jokudho gwara kisi ndelo ruwaŋ Kakan ma Cikirok pa Were.

⁷I ndelo no Daudi omiyo Asaf kodi Jolevi man silwany marapena wero pak ri Rwoth.

⁸Miy foyo ri Rwoth, tuci dwoŋ pere, wac ri nonin gima go otieko timo.

⁹Wer rigo wer ma pak wac gir'aura ma go otieko timo.

¹⁰Sangala win nike wabedo ji pere, weyi jono ma jolamo go jowofore.

¹¹Rangi Rwoth kodi meni pere aka lam go noknok.

¹²Poyi tim ma gir'aura ma go otieko timo, tim pere madongo, kodi thumo banja ma go omiyo.

¹³Win nyikway Isiraili, ŋeca pere, wot Yakobo, ma go oyero!

¹⁴Go obedo Rwoth, Were mawan; or pere obedo ri piny gibe.

¹⁵Go poyo cikirok pere cil gi cil, cikirok pere ri luse gana,

¹⁶cikirok m'otimo gi Abraham, kodi gima go ociko Isaka,

¹⁷m'oridho ri Yakobo paka cik, ri Isiraili paka cikirok ma cil gi cil,

¹⁸ka waco ama: “Alamiyin lowo ma Kanan paka adec perin alunja.”

¹⁹Munyo oyido jonok i welo, nyaka andha, aka jowiloka i lowo ma Kanan,

²⁰jolweda wok i piny kadho i piny, wok i ker acel kadho i ker,

²¹to k'oyeyo moro diyo jo ogwoko jo, aka bwoko kerin ro jo,

²²ka waco ama: “Wikiri wigeyi ji paran m'awiro gi mo, jotuci wac Were paran, wikiri witim rijo raco!”

²³Wer ri Rwoth, pak nyingi go! Tuci wac maber kisi ndelo nike go botho.

²⁴Tuci dwoŋ pere ri nonin, tim pere ma meni ri ji je.

²⁵Kole Rwoth dwoŋ, aka iripo pako go swa, iripo bwonirok rigo loyo werin je.

²⁶Kole werin pa nonin je jobedo nyaka cal to Rwoth ocweyo polo.

²⁷Dwoŋ kodi dhum thoko go, meni kodi ŋono opoŋ i Ot pere.

²⁸Pak win Rwoth ji je ma i piny, pak win dwoŋ pere kodi meni pere.

²⁹Miy win Rwoth dwoŋ ma ripo gi nyingi go, keli win mic aka wibin i Ot pere. Kule win piny ruwaŋ Were Madwoŋ Loyo ka go onenere,

³⁰kirin win ruwaŋ go piny gibe. Piny okethi m'ocwiny ma kinyal yengirok,

³¹Weyi polo wosangala, aka weyi piny wofore, Waci ri nonin je nike Rwoth obedo Kere!

³²Weyi nam kodi cwec mere je jowohola, weyi ndelin kodi dudi mere jowosangala

³³Kenyo yen ma lule jobino koko ri kisangala ruwaŋ Rwoth, Kole go bino thumo ri piny banja.

³⁴Foy Rwoth, kole go ber; aka mar pere kiwire cil gi cil.

³⁵Waci rigo ni, “Both wan, awi Were jaboth mawan, aka dwoki wan wok i dier nonin ŋey wafoyin aka wapaki nyingin maleŋ.”

³⁶Pak Rwoth, Were pa Isiraili pak go pama kodi cil gi cil! Weyi kisi dhano wowaci ni, “Obedi ameno!” Pak Rwoth!

³⁷Kenyo kere Daudi oketho Asaf kodi Jolevi wadi telo lamo ruwaŋ Kakan ma Cikirok ma swa. Oyido joripo timo tic pajo kisi ndelo.

³⁸Obed Edom wod pa Yeduthun kodi jonono pere; cwo piero aucel g'aboro oyido jokonyo jo. Hosa kodi Obed Edom oyido jokuro waŋkac.

³⁹Zadok jacway ri Were i wi migam kodi wadi, oyido jotelo lamo Rwoth i kalamo i Gibeon.

⁴⁰Kisi odikin kodi othieno oyido joripo waŋo cowirok gikululu i wi migam paka ondikere i Cik ma Rwoth omiyo Joisiraili.

⁴¹Heman, Yeduthun kodi ji man oyido oyer jo wero wer ma pak ri Rwoth ro mar pere makirum.

⁴²Heman kodi Yeduthun oyido jokudho gwara to jotuko ndara ka iwero wer ma pak. Jonono pa Yeduthun oyido jokuro waŋkac.

⁴³Kenyo kisi dhano odok peco, aka Daudi bende odok peco pere.