Read dhopadhola 1 Kigana kwoŋ Kerin 17 Bible Online

1 Kigana kwoŋ Kerin 17 - dhopadhola bible

1 Kigana kwoŋ Kerin 17

¹Onyo munyo Daudi otieko ripo peco pere, owaco ri Nathan jatuci wac Were ni, “Neni pama, an abedo i ot m'ogeti gi mbawo matek ma yath sida, to Kakan ma Cikirok pa Were bedo i wema.”

²Nathan odwoko go ni, “Tim gima nitie i paro perin je; kole Rwoth nitie kodin.”

³To wor no Were owaco ri Nathan ni,

⁴“Kadhi iwaci ri ŋeca paran Daudi ni, ‘Rwoth waco nike in iŋat'ikila geto ran ot ma bed'iye.

⁵Wok i hongo m'aboth'iye ji paran Joisiraili wok i piny Misir tundo gunyo ni, fodi akibedo i ot; to oyido awotho gi jo munyo abedo i wema.

⁶I kabedo moro je m'atieko woth'iye gi ji paran Joisiraili, fodi akiluwo gi jotel pajo m'ayero dhumo jo t'awaco nike raŋo jo kigeti ran ot ma mbawo matek ma yath sida.’

⁷Riameno wac ri ŋeca paran Daudi nike An, Rwoth pa lwak jolweny, waco rigo ni, ‘Akwanyin i kwath rombo i sa t'alokin jadhum pa ji paran Isiraili.

⁸Atieko bedo kodin kamoro je m'itieko kadh'iye, aka atieko kikengila jokwor perin je ruwaŋin. Abino miyo nyingin bedo madwoŋ paka jodhum madongo i piny.

⁹Aka abino yero kabedo ri ji paran Isiraili, aka alapidho tiendi jo kenyo i kabedo pajo wegi m'ongoye ŋata bino cando jo kendo; aka cwo ma jomaker jokibino miyo jo litho paka cango,

¹⁰wok cuka ayer jotel ri ji paran Isiraili. Alakikengila jokwor perin je. Aciko gwokin kwoŋ jokwor perin je aka alamiyin nyikwayin.

¹¹K'inotho, t'iyikin gi kwarere mewin, abino loko acel kwoŋ wotin kere; aka abino loko ker pere matek.

¹²Go ama bino geto ran ot, aka alaneno nike dhum pere medere cil gi cil.

¹³Alabedo bamere, aka go bino bedo wodan. T'akibino kwanyo woko mar paran makiwire kwoŋ go paka atimo ri Saulo; m'akwanyo woko bedo kere to akethin.

¹⁴Alaketho go telo ji paran kodi ker paran cil gi cil. Dhum pere kilarumo.’ ”

¹⁵Nathan owaco ri Daudi kisi gima Were owaco.

¹⁶Kenyo Daudi okadho to donjo i wema ruwaŋ Rwoth, obedo piny aka okwayo ama, “Abedo ŋa, awi Rwoth Were, aka peco paran a ginaŋo ma ikelan tundo ka?

¹⁷Aka kiri me oyido obedo gimathin i waŋin Rwoth Were; iluwo kwoŋ nyikwayan i hongo ma bino yuwiye, aka inyuthan luse ma yuwiye Rwoth Were.

¹⁸Aka onyo Daudi owaci rin aŋo kendo; rupiri iŋeyan, awi Rwoth Were!

¹⁹Kole obedo mito perin kodi atoŋa perin timo gime; itimo gigipiny madongo me je ma fonjan.

²⁰Riameno idwoŋ Rwoth Were; rupiri ongoye ŋata pimere kodin, aka ongoye Were man ma cale in, ro gima watieko winjo je gi ithi wan.

²¹Ongoye nono man i piny ma cale gi Isiraili, m'ibotho wok i twec bedo ji perin. Gigipiny madongo kodi gir'aura m'itimo rijo omiyo nyingin dwoŋ i piny gibe. Ibotho ji perin wok i Misir aka iriemo woko nonin man munyo ji perin jowotho.

²²Itieko loko Isiraili ji perin cil gi cil, aka in Rwoth, ibedo Were pajo.”

²³“Aka onyo pama Rwoth Were, ridhi cil gi cil wac m'iluwo kwoŋ ŋeca perin kodi nyikwaye aka tim gim'iwaco.

²⁴Ji jobino tiŋo nyingin malo cil gi cil ka jowaco ni, ‘Rwoth pa lwak jolweny obedo Were i Isiraili.’ Aka ibino kuro dhum paran i hongo je.

²⁵Kole in, Rwoth pa lwak Jolweny, Were pa Isiraili inyuthan, ŋeca perin gime aka itieko waco ran nike ibino loko nyikwayan kerin.

²⁶Aka onyo pama Rwoth Were, in ibedo Were; aka noknok ikuro cikirok perin, aka itieko timo cikirok ma gir'aura me ran.

²⁷Onyo riameno akwayin imiy nyikwayan silwany, ŋey jowomedere forok i wor perin. Kole in, Rwoth Were itieko ciko gime, aka gi silwany perin nyikwayan jobino bedo josilwany cil gi cil.”