Read dhopadhola 1 Kigana kwoŋ Kerin 19 Bible Online

1 Kigana kwoŋ Kerin 19 - dhopadhola bible

1 Kigana kwoŋ Kerin 19

¹Rumacen ma hongo moro, Nahas kere ma Amon otho, aka wode m'ilwoŋo ni Hanun ama olunjo go.

²To kere Daudi waco ni, “Ripo anyuthi mere ri Hanun paka bamere Nahas ndir no otimo ran.” Ameno Daudi ooro jomikwenda bongi Hanun kisekera go ro tho pa bamere. Munyo jomikwenda no jotundo Amon,

³jomic rieko pa Hanun jowaco rigo ni, “Iparo adieri ni Daudi ooro jomikwenda me kisekera in ma woro benin? Daudi ooro jomikwenda pere me bino ŋeyo nyaliŋliŋ ma tindi madwoŋ me ŋey wonyali mako!”

⁴Hanun omako jomikwenda pa Daudi aka olielo adec ye tik gin, oyeco nangin pajo, to riemo jo woko.

⁵Wickwot omako jomikwenda me dok peco. Aka munyo Daudi owinjo gim'otimere rijo, odhiro rijo wac nike jowobedi Yeriko cuka ye tik gin twi.

⁶Munyo Joamon joneno nike joloko Daudi jakwor pajo, joculo kilo 34,000 ma feza kipangisa cawilin kodi jogwey wok i Mesopotamia ma malo kodi wok iy'adec ma Maka kodi Zoba i Siria.

⁷Cawilin 32,000 ma jopangisa kodi jolweny pa kere ma Maka jobino aka joketho kambi cegin gi Medeba. Joamon bende jobino wok i tindin pajo madongo to joyikere lweny.

⁸Munyo Daudi owinjo, ooro Yowab kodi jolweny pere gibe lweny gi jo.

⁹Joamon joŋanjo, aka jocanere i dhiot ma waŋkac ma Raba, aka kerin m'oyido jobino konyo jo oyido jonitie kakendi gin kam'othangere.

¹⁰Munyo Yowab oneno nike jolweny oyido jonyalo monjo go gi yuwiye kiri gi yucen, oyero jolweny mabeyo kwoŋ jolweny pa Isiraili, aka oketho jo kam'oŋiyere gi Josiria.

¹¹Jolweny m'odoŋ Yowab oketho jo i cingi Abisay omin go; aka oketho jo kam'oŋiyere gi Joamon.

¹²Yowab owaco ri Abisay ni, “K'ineno ni Josiria jokengila an, ibin ikonyan; to k'aneno ni Joamon jokengila in alabino konyin.

¹³Bedi jamiseni! Weyi walweny matek ri ji mawan aka ri tindin madongo pa Were mawan. Aka weyi mito pa Rwoth wotimere!”

¹⁴Yowab gi cwo pere jodhire cegin monjo Josiria, to Josiria joringo woko.

¹⁵Munyo Joamon joneno Josiria joringo woko, jo bende joringo woko kwoŋ Abisay aka jogik i tindi madwoŋ. Kenyo Yowab oweyo lweny gi Joamon, aka odok Yerusalem.

¹⁶To munyo Josiria joneno nike Joisiraili jokengila jo, jokelo jolweny ma jowok iy'adec ma Siria kodi yuwok ceŋ ma malawa Yufrete, aka joketho jo i cingi Sobak, jamituka jolweny pa kere Hadadeza ma Zoba.

¹⁷Munyo Daudi owinjo, ocoko jolweny ma Isiraili je kanyacel, aka joŋado malawa Yordan to jobino Helam kama Josiria oyido jocanere iye to joŋiyere gi jo. Lweny ocakere,

¹⁸aka Joisiraili joriemo woko Josiria. Daudi kodi cwo pere joneko cwo ma Siria 7,000 ma jogweyo cawila, kodi cwo 40,000 ma jor'atiendi, aka jowumiya Sobak jamituka jolweny pa Hadadeza, to tho kenyo.

¹⁹Munyo kerin m'oyido jobedo ŋecin pa Hadadeza joneno nike Joisiraili jokengila jo, jotimo siem gi Joisiraili, aka jolokere ŋecin pajo. Aka Josiria lworo omako jo konyo Joamon kendo.