Read dhopadhola 1 Kigana kwoŋ Kerin 21 Bible Online

1 Kigana kwoŋ Kerin 21 - dhopadhola bible

1 Kigana kwoŋ Kerin 21

¹Sitan oyido omito kelo kwoŋ Joisiraili teko, ameno omiyo Daudi kwano Joisiraili.

²Ameno Daudi omiyo Yowab jamituka jolweny pere, kodi jotel pa jolweny cik ni, “Kadhi gi jatel perin i nonin ma Isiraili je wok Dan tundo kiri i Berseba, aka wikwan ji. Amito ŋeyo welo pajo.”

³To Yowab dwoko kere ni, “Jadwoŋ, weyi Rwoth Were perin womedi welo ma Joisiraili dipiero apar dicel ma jothoth loyo pama, kole jobedo ŋecin perin, aka weyi i kwo neno ka go timo ameno. To raŋo imito timo gime jadwoŋ? Raŋo imito kelo banja kwoŋ Isiraili?”

⁴To kere omiyo Yowab kodi jomituka jolweny pere luwo cik pere. Ameno Yowab kodi jomituka jolweny jokidho aka jowotho i piny Isiraili gipi, to jodok i Yerusalem.

⁵Yowab owaco ri kere welo ji. I Isiraili oyido nitie cwo 1,100,000 ma jomaker ma jonyalo lweny, aka i Yuda oyido nitie cwo 470,000 ma jomaker.

⁶To Yowab k'okwano jonono pa Levi kodi jonono pa Benyamin. Go k'oluwo wac pa Were.

⁷To Were k'owinjo maber gi gime, aka omiyo Isiraili gir'acula.

⁸Daudi owaco ri Rwoth ni, “Atieko timo reco madwoŋ swa munyo atimo gime! Mondo cwaki ran; rupiri atimo gimiŋo.”

⁹Rwoth owaco ri Gad jatuci wac Were, pa Daudi ni,

¹⁰“Kadhi i wac ri Daudi ni, ‘Rwoth waco nike, amiyin gigipiny adek; yer acel kwoŋ jo anyal timo rin.’ ”

¹¹Ameno Gad obino bongi Daudi aka owaco rigo gima Rwoth oyido owaco, aka openjo go ni, “Iyero aŋo?

¹²Oro adek ma kec bino i lowo perin, dwe adek kanyo i ŋweco kwoŋ jokwor perin, kosa ndelo adek ma two nundu i lowo perin, kodi malaika pa Rwoth reyo woko adec ma Isiraili je. Par kwoŋe aka imiyan radwok m'anoteri ri Rwoth.”

¹³Daudi odwoko ni, “Anitie i kidamba madwoŋ swa; weyi wapodhi i cingi Rwoth rupiri ŋono pere dwoŋ, ma akipodho i cingi nyatoro.”

¹⁴Ameno Rwoth odhiro two nundu kwoŋ Isiraili aka ji 70,000 jotho.

¹⁵Aka Were ooro malaika kisika woko Yerusalem. To munyo malaika pa Rwoth oyido cegin kisika woko Yerusalem, Rwoth owiro paro pere ma miyo ji pere gir'acula aka owaco ri malaika m'oyido neko jo ni, “Oromo, lwogi cingin.” Aka malaika pa Rwoth oyido nitie i kisia pa Arauna, Jayebus.

¹⁶Daudi oneno malaika ocungo i hongo, omako abor pere i cinge, oyikere reyo Yerusalem. Kenyo Daudi kodi jotel pa ji m'oyido joruka kutiya jokule piny gi nyim gin i lowo.

¹⁷Kenyo Daudi owaco ri Were ni, “Neni, atimo reco, aka atimo kidakana; to rombo me, aŋo ma jotimo? Weyi cingin, awi Rwoth Were paran, wopodhi kwoŋan gi ot pa baba.”

¹⁸Kenyo malaika owaco ri Gad miyo Daudi cik wokadhi i kisia pa Arauna, aka wogeti ri Rwoth migam.

¹⁹Daudi oluwo or pa Rwoth aka okidho paka Gad oyido owaco rigo.

²⁰Kenyo i kisia Arauna kodi wote oyido jorego ŋano, aka munyo joneno malaika, wote jopondo.

²¹Aka tekin Arauna oneno kere bino, oeye i kisia, aka okule piny gi nyime i lowo.

²²Daudi owaco ni, “Abino nyewo kisia perin ŋey ageti ri Rwoth migam ŋey ji jowobothi two nundu me. Alamiyin cul mere je.”

²³Kenyo Arauna owaco ri Daudi ni, “Jadwoŋ paran kere, miy Rwoth gimoro je m'imito. Megikwe ee ma waŋo paka cowirok i wi migam; adhere kodi majogi pajo ee ma yen, kodi ŋano ma mic. Me je amiyin kere.”

²⁴To kere waco ri Arauna ni, “Be, alaculo kisia kodi megikwe. Akilamiyo Rwoth paka mic gim'obedo aperin, gim'ongoye cul.”

²⁵Ameno Daudi onyewo kisia kodi megikwe gi zahabu piero abic.

²⁶Kenyo Daudi ogeto ri Rwoth migam aka omiyo cowirok awaŋa kodi cowirok ma siem. Daudi okwayo Rwoth, aka owinjo kwayo pere to dhiro mac wok i polo waŋo cowirok pere.

²⁷Rwoth owaco ri malaika wokwany woko abor pere, aka malaika owinjo.

²⁸Daudi oneno nike Rwoth odwoko kwayo pere, ameno omiyo cowirok i migam i kisia pa Arauna.

²⁹Wema pa Rwoth ma Musa oyido ogeto kodi migam m'oyido iwaŋo iye cowirok oyido fodi jonitie i kalamo i Gibeon i hongo no;

³⁰to Daudi k'onyalo kadho lamo kenyo kwoŋbedo oyido lworo abor pa malaika pa Rwoth.