Read dhopadhola 1 Kigana kwoŋ Kerin 22 Bible Online

1 Kigana kwoŋ Kerin 22 - dhopadhola bible

1 Kigana kwoŋ Kerin 22

¹Ameno Daudi owaco ni, “Ot pa Rwoth Were labedo ka. Me migam ma Joisiraili joripo miyo iye cowirok awaŋa.”

²Kere Daudi owodho or ri jopath je m'oyido jobedo i lowo pa Joisiraili cokirok, aka omiyo jo tic. Megi joŋado telin ma geto Ot pa Were.

³Daudi bende omiyo nywenye kweth ma yiko musumalere kodi gigipiny ma riwo waŋkac ma mbawo, kodi ywel kweth m'ongoye ŋata nyalo kipima.

⁴Oyiko ri ji ma Tire kodi Sidon kelo rigo mbawo ma yath sida kweth.

⁵Kole Daudi owaco ni, “Wodan fodi thin aka fodi ongoye gi nyalo, to ot ma go lageto ri Rwoth ripo bedo maŋon aka m'oŋeyere i piny. Riameno alatimo can mere.” Ameno Daudi onwaŋo gigipiny ma mitere ma geto je kweth mafodi go k'otho.

⁶Kenyo olwoŋo wode, Solomon aka omiyo go or geto ot ri Rwoth, Were pa Isiraili.

⁷Daudi owaco rigo ni, “Wodan, oyido acano geto ot ri nyingi Rwoth Were paran.

⁸To wac pa Rwoth obino ran, ka waco ama: ‘Itieko oyo remo kweth aka ilwenyo lweny kweth; ikilageto ran ot ri nyingan, kwoŋbedo itieko oyo remo kweth ruwaŋan i piny.

⁹Neni, ilabedo gi wodin, go labedo jacwo ma siem. Alamiyo go siem i thenge pa jokwor pere, kole ilalwoŋo go nike Solomon kwoŋbedo i hongo pere ma dhum alamiyo Isiraili siem t'akwonga jo.

¹⁰Go lageto ran ot. Go labedo wodan, aka alabedo bamere. Dhum pere labedo i Isiraili cil gi cil.’ ”

¹¹“Onyo wodan, weyi Rwoth wobedi kodin, aka weyi go wokur cikirok pere inyal geto ot rigo.

¹²Aka weyi Rwoth womiyin niaŋ kodi rieko ŋey inyal dhumo Isiraili cungo kwoŋ cik pere.

¹³K'inoluwi cik je ma Rwoth omiyo Musa ri Isiraili, ilakiyindira. Miyere aka ŋey gim'itimo, ikir'iwey gimoro je wobwokin.

¹⁴Paka ri Ot pa Were, gi mindin paran atieko coko zahabu ma kalo tan 3,400 kodi feza ma kalo tan 34,000 ma geto. Medo i wi meno ywel kodi nyweny nitie kweth. Bende anitie gi mbawo kodi telin, t'iripo medo.

¹⁵Initie gi jotic kweth. Nitie cwo ma jolatic i kam'igol'iye telin, aka nitie jobol ot kodi jopac, kiri gi jondijo m'opokere ma jonyalo tic

¹⁶gi zahabu, feza, ywel kodi nyweny. Onyo cak tic, aka Rwoth wobedi kodin.”

¹⁷Daudi omiyo jotel pa Joisiraili je cik konyo Solomon.

¹⁸Go owaco ni, “Rwoth Were mewin nitie gi win aka omiyo win siem i kisi thenge. Go omiyan mako ji je m'oyido jobedo i lowo me, aka nyo pama jonitie i cingi win kodi Rwoth.

¹⁹Onyo kethi win paro mewin kodi cuny win rango Rwoth Were mewin. Kadhi wigeti ot ri Rwoth Were ŋey wikethi iye Kakan ma Cikirok pa Rwoth kodi gigipiny maleŋ je m'ioro i lamo.”