Read dhopadhola 1 Kigana kwoŋ Kerin 26 Bible Online

1 Kigana kwoŋ Kerin 26 - dhopadhola bible

1 Kigana kwoŋ Kerin 26

¹Paka ri kitipin pa jokur waŋkac wok i nono pa Kohath obedo: Meselemia wod pa Kore, wok peco pa Asaf.

²Meselemia oyido nitie gi wote abirio, cungo kwoŋ nywolirok: Zekaria, Yediael, Zebadia, Jathiniel,

³Elam. Yehohanan kodi Eliehoenay.

⁴Oyido nitie Obed Edom, ma Were omiyo silwany ma wote aboro, cungo kwoŋ nywolirok: Semaya, Yehozabad, Yowa, Sakar, Nethanel,

⁵Amiel, Isakar kodi Peulethay.

⁶Semaya, okayo pa Obed Edom oyido nitie gi wote aucel: Othini, Rafaili, Obed, Elizabad, Elihu kodi Semakia. Oyido jobedo jodongo i nonin pajo ro nyalo pajo madwoŋ aka ario macowe oyido jonitie gi talenta.

⁸Nyikway Obed Edom kodi nyikwaye oyido joromo cwo piero aucel g'ario ma ŋeyo tic me.

⁹Meselemia oyido nitie gi cwo apar g'aboro ma jonitie gi nyalo.

¹⁰Wok i nono pa Merari oyido nitie Hosa; aka wote jobedo: Simiri (bamere oketho go jatel, makada nende go oyido k'obedo okayo),

¹¹Hilikia, Tebalia kodi Zekaria. Kanyacel oyido nitie cwo apar g'adek jobedo jokur ma Ot pa Were wok peco pa Hosa.

¹²Jokur me opok jo i kitipin, cungo kwoŋ pecin pajo, aka omiy jo tic i Ot pa Were, paka Jolevi man.

¹³Kisi peco, mathin kosa madwoŋ obolo kwir ma ŋeyo waŋkac mene ma jolakuro.

¹⁴Selemia otero waŋkac ma yuwok ceŋ, aka wode Zekaria, jacwo m'oyido timo tic maber, otero waŋkac ma yumalo.

¹⁵Obed Edom otero waŋkac ma yupiny, aka wote omiy jo kuro kisikin ma kan.

¹⁶Sufim kodi Hosa jotero waŋkac ma yupodho ceŋ kodi waŋkac m'ilwoŋo ni Saleketh i royo ma malo. Oyido jokuro i weso.

¹⁷I waŋkac ma yuwok ceŋ, oyido bedo jokur aucel kisi ndelo, yumalo, aŋwen, yupiny, aŋwen, aka jokur aŋwen oyido jokuro kakan; ario i kisi acel.

¹⁸Jokur aŋwen oyido jokuro royo ma kadho yu diedipo, aka ario oyido jokuro diedipo won.

¹⁹Me apaka tic ma kur opok ri nono pa Kora kodi Merari.

²⁰Kwoŋ Jolevi Ahija am'oyido telo kakan pesa kodi kakan mic m'omiy Were.

²¹Ladan, acel kwoŋ wot Gerisom oyido obedo kwari kitipin ma pecin m'oromo, kiri gi peco pa wode Yehiel.

²²Nyikway Ladan ario man, Zetham kodi Yowel, oyido jokuro kakan pesa ma Ot pa Were kodi kisikin ma kan.

²³Nyikway Amiram, Izihar, Hebron kodi Uziel bende opok jo tic.

²⁴Sebuwel, janono pa Gerisom, wod pa Musa, oyido neno pesa ma Ot pa Were.

²⁵Luwo kwoŋ omin Elieza, omin Gerisom, go oyido timo wat gi Selomith. Elieza obedo ba Rehabia, m'obedo ba Jesia, ba Yoram, ba Zikiri, ba Selomith.

²⁶Selomith me kodi wutmin oyido jokuro mic ma Kere Daudi omiyo Were, oyido jobedo jotel ma pecin, ma nonin, kodi jotel pa jolweny.

²⁷Jokwanyo gigipiny mogo m'oyido jomako i lweny aka jomiyo ma oro i Ot pa Were.

²⁸Selomith kodi peco pere oyido jokuro kisi gim'omiy ma oro i Ot pa Were, kiri gi mic ma Samwiri jatuci wac Were, Kere Saulo, Abuner wod pa Ner kodi Yowab wod pa Zeruya jokelo.

²⁹Kwoŋ nyikway Izihar, Kenaya kodi wote, oyido omiy jo tic ma dhum, ndiko gim'otimere gi kano kodi thumo banjin ri Joisiraili.

³⁰Kwoŋ nyikway Hebron, Hasabia kodi wade pere 1,700 joje cwo ma jonitie gi nyalo oyido jobedo jodhum ma dini kodi ji i Isiraili yupodho ceŋ ma malawa Yordan.

³¹Yeria oyido obedo jatel pa nyikway Hebron. I oro ma piero aŋwen ma dhum pa Kere Daudi, omeny peco pa Hebron kodi nyikwaye, aka onwaŋ nike cwo ma jonitie gi nyalo ma peco me oyido jobedo Yazer iy'adec ma Giliad.

³²Kere Daudi oyero jotel ma pecin 2,700 wok kwoŋ wade pa Yeria aka oketho jo jodhum ma dini kodi ji i Isiraili yuwok ceŋ ma malawa Yordan, adec pa Ruben, Gad kodi yuwok ceŋ ma Manase.