Read dhopadhola 1 Kigana kwoŋ Kerin 28 Bible Online

1 Kigana kwoŋ Kerin 28 - dhopadhola bible

1 Kigana kwoŋ Kerin 28

¹Daudi ocoko i Yerusalem jodhum ma Isiraili je, jodhum ma nonin, jodhum ma jotimo tic ma ker, jotel ma pecin, jokikewera lim kodi ogwaŋe pa kere kodi wote, jodhum pa kere je, jotel pa jolweny, kodi jodongo.

²Kenyo kere Daudi oay to cungo aka owaco ni, “Winjan win, wutmin an kodi ji paran. Oyido acano geto ot ri Kakan ma Cikirok, kama tiendi Rwoth Were mawan bed'iye. Atieko timo can je ma geto Ot pa Were;

³to go okweran geto, kwoŋbedo abedo jalweny aka atieko oyo remo kweth.

⁴Kucel Rwoth Were pa Isiraili oyeran kodi nyikwayan dhumo Isiraili cil gi cil. Oyero nono pa Yuda bedo jotel, aka wok kwoŋ Yuda oyero peco pa baba. Wok peco gipi owinjo gi kisangala teran kodi kethan kere ma Isiraili gipi.

⁵Kole Rwoth omiyan wotan kweth, aka wok kwoŋ jo oyero Solomon dhumo Isiraili, ker pa Rwoth.”

⁶“Rwoth owaco ran ni, ‘Wodin Solomon ama lageto ran Ot pa Were. Atieko yero go bedo wodan, aka alabedo bamere.

⁷Alamiyo ker pere wobedi cil gi cil ka go omedere luwo cik kodi or paran paka go timo pama.’ ”

⁸“Onyo riameno i waŋ Joisiraili je, cokirok pa Rwoth, aka paka Rwoth winjo, kur aka rangi or pa Rwoth Were perin, ŋey imedere bedo i lowo maber me, aka iwey paka gir'alunja ri nyithindho mewin cil gi cil.”

⁹“Aka in, wodan Solomon, yey Were pa benin aka tiyi rigo gi cunyin acel kodi paro perin je; kole Rwoth dwaro kisi nyaŋith, aka niaŋ kisi can kodi paro. K'inorangi go, ilanwaŋo go; to k'inojwangi go, go laweyin kicutho.

¹⁰Gwokere pama, kole Rwoth otieko yerin geto Ot pa Were paka kalamo. Onyo tim, aka tim gi miyirok je.”

¹¹Ameno Daudi omiyo Solomon can ma geto Ot pa Were, kisikin ma kan kodi kisikin man, kodi Kabedo Maleŋ Loyo, kabedo ma cwako reco.

¹²Daudi bende omiyo Solomon can m'oyido nitie gine ri diedipo kodi kisikin ma thoko, kodi kisikin ma kano gigipiny ma Ot pa Were kodi gigipiny m'imiyo Rwoth.

¹³Daudi bende omiyo Solomon can ma kitipin pa jocway ri Were i wi migam kodi Jolevi, timo tic ma Ot pa Were, kodi kuro gigipiny ma tedo mere.

¹⁴Daudi onyutho feza gi zahabu marom nedi ma woor ma yiko gigipiny ma tedo,

¹⁵ri kisi tala kodi raŋaw tala,

¹⁶ri meza ma feza kodi ma zahabu m'oyido iketho iye mugat maleŋ.

¹⁷Go bende onyutho zahabu macil marom nedi, ma woor ma yiko uma, acero, agwatin, feza gi zahabu marom nedi ma yiko bakulere,

¹⁸zahabu macil ma yiko migam ma waŋo buban kodi ma timo cawila ri cwec ma jobwombi gi ma joyaro bwombi gin i wi Kakan ma Cikirok.

¹⁹Kere Daudi owaco ni, “Gime je nitie i can m'andiko cungo kwoŋ wac ma Rwoth won omiyan timo.”

²⁰Kere Daudi owaco ri wode Solomon ni, “Bedi matek aka jamisen. Cak tic aka wongoye gima wogeŋin, kole Rwoth Were, Were paran nitie kodin. Go kilaweyan, to labedo kodin cuka inocow tic je ma Ot pa Were.

²¹Jocway ri Were i wi migam kodi Jolevi omiy jo tic atima i Ot pa Were. Jotic ma ndijo nger gi nger joyikere konyin, aka ji je kodi jotel pajo jonitie i cingin.”